SORPREZAS MARAVIYOZAS

(Teksto-Odio)

(Yazarın yazısını sesli dinlemek için tıklayınız)

Dezde 3 semanas Israel bive kon una dinamika de akontesimyentos favoravles, ke mos kayen del sielo komo sorprezas maraviyozas malgrado las preokupasyones politikas internas kreadas por muestros politisyanos ke no se arestan de peleyarsen i de amenazarsen de azer muevas eleksyones. No mos gusta del todo de ir a votar por la kuatrena ves en un anyo, koza ke no los ayudara a mi sensyo, a poder trokar muncho la aritmetika egzistente de la Kenesset. El primer ministro Netanyahu malgrado su preokusayon profonda de poder ser kondanado en kavzo ke se topara kulpavle de korrupsyon no se arresta de lavorar por el bien de Israel a afrontar la koronavirus ke no mos decha reflo.

La primera sorpreza favoravle fue el anonsyo tres semanas antes de la sosieta Chevron, la kuala merko por sinko miliardas de dolares la sosieta Noble Energy, uno de los sosyos prinsipalos de los pozos de gaz en mar de Israel. El ministro de la enerjia el prof. Yuval Steinitz, sovre este akordo, se orgolyo al nombre de Israel diziendo ‘’esto fue el dalkavo klavo infingado al serkolyo del boykot arabo’’.

La sosieta de karburantes Chevron fue fondada por la famiya Rockefeller en los Estados Unidos en Kalifornya, al prensipyo del sieglo pasado i es oy en dia la tresera mas grande kompanyia de idrokarvon fosil del mundo. Dirijada por personas tradisyonalistas ke no kijeron en el pasado tratar kon Israel pormo del boykot aplikado por la Arabia Seudita i los payizes del Golfo Persiko, supito trokaron de politika despues ke Israel de fakto ampeso, ay pokos anyos, a tener relasyones stratejikas kon estos payizes arabos kon los kualos no uvo konfliktos direktos, aparte del palestiniano. Ken save si no fueron eyos ke miraron a influensar los dirijentes arabos a rekonoser Israel de ‘ fakto i de yure’ para permeterles de entrar al merkado de gaz israeliano.

Israel ansi entra al merkado valutozo i ganansyozo de la enerjia, lo ke mos aze gustar de saver ke las jenerasyones futuras israelianas seran benefisyozas de este dezvelopamiento. Chevron avrira la puerta de la Evropa al gaz israeliano, el kual kon el de Chipro grasias al pipeline, el mas largo del mundo ke se aspera de ser fraguado en los anyos vinideros entre Israel Chipro i la Gresya , mos permetera de venderlo sin difikulta.

El komite Sheshinski, formado por el ministro Steinitz, en sus estudyos sovre el pozo Leviathan el kual empeso su produksyon el anyo pasado, establisyo ke fin el anyo 2064 el governo israeliano resivera a lo menos 200 miliardas de shekel de dasyos. Esto fue konfirmado por las otoridades de taksasyon del ministaryo de finansyas antes una semana, las kualas adjustaron ke muevos pozos pujaran este profito.

De otra parte, es verda ke el mundo se alechara en un futuro serkano de la enerjia fosil , ma malgrado esto, el gaz ke es el meno konteniente en oksid de azot i en dioksid de sulfur (ashufre) sera empleyado anchamente al nivel de 30% del menester de enerjia en todo el mundo. Dunke no ay espanto de no poder venderlo.

En mizmo tiempo Israel en los anyos vinideros nesesita de eskabuyirse enteramente del peham i del fuel, devra dunke dezvelopar su industria de enerjia solar al nivel de 70% del menester, a lo mas tadre fin del anyo 2030 i kompletar el resto kon gaz.

Israel no tenyedo riyos grandes i poko montanyas altas no podera produzir enerjiya idrolika o kon ayre,dunke la solas alternativas son el gaz i el sol. Los israelianos no devran kesharses, de agora en delantre, de sus destinos, porke poko tiempo antes ken de eyos se sonyo ke un dia la Medina va ser enerjikamente endependiente i mizmo una potensya de enerjiya.

La sigunda sorpreza fue el anonsyo viernes pasado del primer ministro Netanyahu del establesimyento de relasyones diplomatikas, ekonomikas, kulturalas, defensivas i mas kon Los Emirates Arabos Unidos del golfo Persano. Despues de 26 anyos un muevo payis arabo desidyo de rekonoser Israel de’’yure’’. Ez verda ke egiste una pas yelada entre el Ayifto i una otra kon la Jordania ma esta deve ser entendida i vista kon un otro ojo. El payis es chiko ma muy influente en las relasyones interarabas, el avrira por siguro la puerta a otros payizes arabos komo el Oman, el Bahrain i puede ser el Katar malgrado ke el emir Sheyh Tamim bin Hamad Al-Tani esta en pleto kon el resto de los arabos sunitos por ser dishiplo de los Ermanos Muzulmanos komo Tayyip Erdogan prezidente turko. Ken save si el Sudan de aki fin del anyo 2020 no establesera relasyones diplomatikas kon Israel.

Todo modo de akordo tiene su presyo . En el akordo ke se firmara en la Kaza Blanka en prezensya del prezidente Trump las 2 partidas dechizaron komunamente a unirsen kontra el inimigo Iraniano. Israel en este kavzo podera si nesesitara kontrolar los muvementos militares iranianos de muy serka, i de mirar de koordinar kon los emiratis una defensya del Emirato. Por kontra Israel se angajo a no nasyonalizar en partida Yehuda i Shomron komo lo aviya programado, aksyon ke se atraza por una peryoda keno no se save. El fakto de esta dechizyon es de salvar la facha de los dirijentes del Emirato enfrente de los palestinianos i de sus aliados, ke gritan a la traisyon. Israel grasias a su diplomasiya fue kapache de konvenser finalmente en partida el mundo arabo ke la pas deve ser echa entre los umanos ke achetan de bivir sin konflikto uno al lado del otro. Malorozamente los palestinianos kontinuan a no estar de akordo sovre esto punto, pekado.