ONDE VAS TURKIYA?

(Teksto-Odio)

(Yazarın yazısını sesli dinlemek için tıklayınız)

La mayoriya de los djudios turkanos biviendo oy en Israel mos demandamos esta kestyon, Turkiya onde vas?. Munchos de mozotros nasidos en Estambol, Izmir, Edirne, Bursa i mas ke mos engrandisimos, en muestra chikes en la Republika Turka estuvimos debasho de la influensa de los prensipios del Kemalizmo establisidos por el fondador de la Republika Kemal Ataturk(padre de la nasyon). Kada demanyana diziamos en la guarte de la eskola alinyados en rangos sovre la klasa a la kuala aparteniamos kon una boz fuerte “ So Turko, so djusto, so laboryozo” i a la fin de este largo diskorso ajustavamos” Ataturk tu sos el mas grande,orozo el ke se siente turko”.

En klasa, en las lesyones de istoria i de kompatriotizmo los profesores mos ambezavan ke la Turkiya se fondo sovre los prensipyos de la laisidad, ke la relijyon i el estado son separados, la kreensa del puevlo es koza personal i no deve de ninguna manera influensar las dechizyones politikas i administrativas. Ademas mos ambezaron la nesesita de la limpieza de la lingua ke durante anyos grasias a las institusyones linguistikas purifiaron el idioma de los biervos arabos i persanos i de punta de vista teknika dieron lugar a biervos tomados de las linguas evropeas. La lingua komo lo savemos es la baza prinsipala de la kultura del umano. A traverso la lingua i la relijyon la influensa araba en el Imperio Otomano fue muy grande. Ay istorianos ke dizen ke Estambol mando al Medyo Oriente governadores i armada para turkizar a los otoktones arabos, ma es el kontraryo ke afito.

La lista de las reformas echas en este payis es larga sovre todo ke Ataturk no solo troko la grafia araba en grafia latina, el dyo fin al Kalifa de los sultanes turkos, lo ke kere dizir fin de la dominasyon relijioza del mundo muzulmano. Ansina la basilika Santa Sofia fraguada por los bizantinos, ke fue aboltada en 1453 en mishkita la deklaro museo. Lo ke no es el kavzo aktual.

Estos todos trokamientos fueron echos en una perioda onde solo 25 milyones de sivdadinos bivian en el payis. El rejimen de akel tiempo era diktatoryal, los opozantes relijyozos no podian alevantar kavesa sin riskar sus vidas. Ma al impesijo de 1952 kon la demokratizasyon del sistema administrativo las kozas trokaron. Las orasyones dichas en turko ampesaron a ser resitadas en arabo en la lingua del islam. Apoko apoko mas la povlasyon pujo mas el fondamentalizmo islamiko se espandyo, fina ke Necmettin Erbakan politiko influente de los anyos 1990 kreyo la doktrina “Vista Nasyonala” ke fue adaptada por el poder aktual de Tayyip Erdogan ke se izo Prezidente egzekutivo en trokando la konstitusyon del rejimen del payis. Oy en dia la povlasyon turka es serka de 83 milyones kon serka 20 por sien de fonfamentalistos ke keren mizmo ke la situasyon ‘ante’ del otomanizmo relijyozo seyga restablisido.

El AKP (partido politiko de Erdogan) pretende ke las teoriyas de vinir atras es asimilar la realidad aktuala, es retornar al islam del tiempo otomano. Enteramente kontraryo a lo ke Ataturk miro de establisir. Una grande partida de los turkos blankos( oksidentalistos) kualifikan este movimento relijiozo de ‘fetishizmo’ ke se deve luchar despues de serka 100 anyos de laisizmo onde nunka fue defendido la praktika de la relijyon. Eyos dizen ademas, achetar de ir atras en una manera de enganyar el puevlo en mayoriya poko instruido para konverserlo ke la kultura araba es parte de la kultura turka. En las televizyones un punyado de pokos meyoyudos eskritores, gazeteros, investigadores i mas, kon sus avladeros estan días enteros, maraviyandose en azyendo la propaganda del islamizmo politiko i de la kultura araba. Esto representa un shok paramozotros djudios turkanos ke miramos la Turkiya de afuera. Savemos bien ke la influensa araba aze pujar el antisemitizmo i krea una inimista enverso de Israel no solo al nivel de los dirijentes turkos ma mizmo de la povlasyon de Anatolia, ke mos demandamos si eyos renkontraron un djudio en sus vidas.

La Turkiya por supuesto no deve de alecharse del oksidente si mizmo la Evropa Unida no la kere en su seno. No devra de ninguna manera alecharse de la sivilizasyon oksidentala tal ke Ataturk la kijo. Erdogan entelijente, ma disiplo de la doktrina de los ‘Ermanos Muzulmanos’ devra arestarse de mesklarse de los echos interyores de los payizes arabos o de ayudar organizasyones kriminalas komo el Hamas i entender ke los dirijentes del mundo sivilizado inkluendo mizmo la China, no son bovos i saven muy bien ke el islam politiko, el panislamizmo,nunka podera konkistar sus payizes i dominarlos sovre los prensipyos de su relijyon. Se lo akodraremos ke ni en el oksidente i ni en el medyo oriente egziste simpatía enverso los turkos achakes del pasado otomano, la sola eksepsyon a este estado es la kerensya de los djudios enverso los turkos ke nunka se alvidaran de la ospitalidad ke Bayazit, sultan otomano, les mostro en resivyendolos enel 15en sieglo en sus tyerras.