(Yazarın yazısını sesli dinlemek için tıklayınız)
Una de las konseguensas de la Korona fue ke en el internet el sistema zoom se izo muy popular achakes ke la mayoriya de la povlasyon achunkada en su morada, no tenía munchas posibilitas de komunikar entre eya. Munchisimos de programes fueron i seran echos grasias a esta manera de fizikamente poder verse i charlear entre las personas ke partisipan al evenemiento. Bien entendido en Israel las universitades , las asosiasyones , las sosietades de technolojiya i mas, no mankaron de adoptar este modo de komunikasyon para sus lavoros . Ke manko para la Asosyasyon de los Turkanos de Israel (Itahdut Yotsei Turkia) ke mira siempre de estar a la punta del progreso technolojiko para poder komunikar kon sus miembros nombrozos en el payis i mizmo en el etranjero de adoptar el sistema zoom.
Es ansi ke verso la fin de la semana pasada sovre la propozisyon echa de su prezidente Ovi Gulersen, la IYT demando a 5 dammas bien konosidas, miembras de la asosiasyon a kontar en un program zoom sus chikes en Estambol, sivdad onde nasyeron i se engrandesyeron ke yamaron “Savor de Boka”. Kada una de eyas dezvelope una partida diferente de sus vidas en la sivdad maravioza ke fue i ke es Estambol. Mos dieron sus sentimientos sovre diferentes sujetos de la vida del sieglo pasado en esta sivdad onde sus famiyas bivieron o biven en diferentes foburgos evropeos i asiatikos de esta megapol en la kuala oy en dia ay mas de 16 milyones de sivdadinos.
Akompanyadas kon los tangos en ladino kantados por la famoza kantadera Karen Sharhon i el famozo kantador Izzet Bana las sinyoras aparesyeron en el ekran una detrás la otra kon un perfekto lenguaje djudeo-espanyol ke mos tresalimos de oyerlo. La primera fue Fani Ender ke avlo del foburgo Kuzkuncuk ke se topa en la partida asiatika del Bosfor i de su famiya. La sigunda Mimi Salti nasida en Galata mos konto su vida en el apartamento Kamondo i de siertas kustumbres i maneras de gizado.
La tresera fue Meri Schild , ke se engrandesyo komo un ijo, porke en su famia no uvo ijos. Su vida en la grande isla de la mar Marmara, yamada Prinkipo en grego i Buyuk Ada en turko mos akodro a munchos oyentes muestra chikes deskudya. La kuatrena dama Sara Yanarocak partikularmente mos avlo de los aparejos de bodas i de achugares i mos kanto una kantiga yamada ‘aprontar el achugar’ kon su grupo de muzika “Erensya Sefaradi”. En final Nelly Barokas mos konto konsejikas de un yamado Avramachi, i unas de Elia Karmona editor konosido del Jurnal “El Jugeton” ke aparesyo entre los anyos 1909 i 1931 en Estambol.
Todas estas sinyoras mos dieron a konoser sus sensibilidades, sus nostaljiyas de la vida ke tuvieron en Estambol despues de la Sigunda Gerra Mondiala, ke malgrado las estrechuras materiales eyas eran aya orozas i kontentes de sus egzistyensas. Oy en biviendo en la Medina supieron kon briyo sovreguardar sus uzos i kustumbres i la lingua de sus abuelos ke mos da plazer de sintirla i mos aze sonyar a munchos de mozotros muestro pasado en Turkia.
Por los ke dezearan ver este program vos rekomendo el sityo de
Keria akodrar a esta okazyon a los septikos ke deklaran ke en serka muesto lingua esta para despareser estos djineros de aktividades provan una ves mas ke no es verda lo ke pretenden.Serka 8 mil personas seguiron el program fin oy en dia koza ke no se asperava del todo. Ay aktualmente un entereso pujando en la mueva jenerasyon de la manseves sefaradita de desendientes de ladino avlantes a ambezar i a estudiar el idioma por el internet. Todos los esforsos echos a este sujeto deven resivir aplozos enkorajantes. No ay duvda ke las institusyones akademikas tienen sus rolos importantes en este kampo por ke el tema del ensenyamento depende de las reglas i los modos de ambezar ke eyas krearan.
Ademas se deve enkorajar la djente ke avla esta lingua a uzarla en sus vidas de kada dia kon su dorredor kada ves ke tiene la okazyon de praktikarla. Mos renderemos kuento ke los sityos en ladino son un buen remedyo para sovreguardar la lingua. El foro Ladino Komunita ez un egzemplo, todo en no siendo perfekto. Lo ke emporta es de pueder interesarse a lo ke se dize mizmo si el stilo i la grafia no koresponde siempre al standard establisido por Aki Yerushalayim.