EL FENOMENO UNRWA

(Yazarın yazısını sesli dinlemek için tıklayınız)

El Ofis de asistensia i de lavoro de las Nasyones Unidas para los refujiados de la Palestina en el Medyo Oriente fue kreado por la Asamblea Jeneral en el anyo 1949 un anyo despues de la gerra de independesia de Israel kontra las armadas arabas ke sus butos eran de destruyirlo, mizmo antes ke veyga su nasimiento. Koza ke no reucheron i ke provoko miles de refujiados de las dos partes. Serka de 670 miles arabos biviendo en el mandat Inglez Palestinyano fuyeron la gerra a los payizes vizinos i en poko tiempo despues, todos los payizes arabos sinfalta forsaron al egzilo kaji de un milyon de djudios biviendo en el Medyo Oriente i en el Magreb ke fueron aronjados de sus lugares, peryendo todas sus moradas i ademas sus valores ke les fueron tomadas kon fuersa. Bien entendido komo kada konflikto uvo matansinas i inimistades ke duran dezde mas de 70 anyos.

Porke las grandes potensias de akel tiempo sintieron la nesesita despues la Sigunda Gerra Mondiala de establisir este Ofis solo para los arabos i no azer la mizma koza para los djudios? Es ke los djudios no lo meresian? Muncho se avlo, se eskrivyo i dainda se kontinua a debatir esta kestyon ke no se save si los politikos antisemitas por una ves entienderan ke oy Israel no es el payis de 1948, ke su povlasyon depasa los 9 milyones de sitadinos , es militarmente fuerte i ekonomikamente adelantado , sentro de teknolojia i de sensya ke tiene el derecho de reklamar de la komunita mondiala los mismos derechos ke fueron rekonosidos a los arabos. En la istoria en el sieglo pasado vimos despues de los konfliktos, komo los turkos i los gregos , los indianos muzulmanos i budistos de la India, los alemanes i los polonezos se metieron deakordo para un kambyo de sus povlasyones i ansina apaziguarsen para poder bivir en pas, mizmo yelada.

Oy en dia la dependensya de la umanita enverso la enerjia fosil kambya i en estos dalkavos meses se ve ke la konsumasyon del bruto kayendo,eya no representa mas un faktor de amenaza. Los produktores arabos no estan mas en la situasyon de los anyos 70 del sieglo pasado para poder diktar sus kondisyones inimigas en las Nasyones Unidas i en las kantchelerias de los payizes del oksidente kontra Israel i los djudios. Malgrado el rasizmo, el djihadizmo i la ajenda de destruyir Israel ke no se enfasian de repetar dezde 72 anyos los ekstremistos muzulmanos no estan mas vistos mizmo en el mundo muzulmano kon un buen ojo. Munchos payizes arabos detras de puertas serradas ampesan, mizmo kon timididad a establisir de fakto relasyones kon Israel.

Ma de otra parte el diskorso de inimista ambezado en las eskolas de la UNRWA kontinua .. 72 anyos el mundo finansa este Ofis ke debasho la kacha de ambezar a las muevas jenerasyones de los egzilados en 684 eskolas a ser djente sivilizada, demokratika i no se mas kualo, aplikan el kurrikulum de la Otoridad Palestiniana ke ansenya i indotrina los mansevos a konkistar la Palestina entera kon la fuersa de las armas. Kontraryo a la rekonsilyasyon de los puevlos ke es el faktor mayor de la egzistensia de la Nasyones Unidas, esta eskrito en los tekstos por echemplo, el modo de las echas malas de Dalal el Mugrabi el kual era el kapo de la banda de teroristos ke mataron en un bus 38 israelianos inkluendo 13 kreaturas.. O se ambezan kantikas enkorajando a matar todos los malos djudios una ves la rekonkista de la Palestina realizada.

Aktualmente mas de 46mil elevos estudian en 96 eskolas del Ofis ke son dirijadas por 1500 profesores en Gaza, el los territoryos de la Otoridad Palestiniana, en el Libano, Jordania i en Siria. Ma las eskolas en Siria estan por las oras serradas achakes de gerra interna. Komo no dar razon i rengrasiar al presidente Trump ke finalmente fue el primer a rekonoser la verdad i a anular el ayudo ke los Estados Unidos davan kada anyo, el kual fue mizmo pujado por la administrasyon Obama. La kontribusyon amerikana ke reprezentava serka el 38 por siento del kapital anual de la UNRWA esta ves es kompensado por los payizes evropeos. La Fransia, la Norvergia , el Luksenburgo, La Belchika i la Alemanya dublaron sus partisipasyones anualas. Ansina se entiende ken es ke kere bien a Israel! El proverbo dize karas vemos korasones no savemos.

Este fenomeno uniko en la estorya de las Nasyones Unidas fue fondado kon la presyon de la kaye araba para ayudar a todas las personas i sus desendientes direktos ke peryeron sus moradas i sus remedyos de sovrebivir a empesar del Junyo 1946 fin al Mayo 1948 i ke fueron forsados de egzilarse por kavza de gerra. Eyos biviendo durante el Mandat Inglez fueron achetados komo ser refujiados en el Libano, Siria, Jordania, Gaza, los teritoryos Palestinianos aktuales i en otros lugares en el mundo. Aktualmente son 4.7 milyones de almas i resiven asistensya humanitarya, edukasyon(¡)para los mansevos i servisyo sanitaryo. La kestyon es, deke los payizes ke resivieron a estos refujiados, los establisieron en getos i no les dieron dingun derecho sivil. La razon prinsipala para munchos es de tenerlos sempre debacho la mano para akuzar Israel de todos los males del Medyo Oriente en la arena internasyonala. Me parese ke ya vino tiempo ke esta komedia se arete i ke la UNRWA dispareska, visto ke Israel enteramente asimilo los djudios oryantales, i ke los payizes arabos deven de azer la mizma koza.