ES KE DESPUES KORONA KAMBYARAN LAS MENTALIDADES?

( Yazarın yazısını sesli dinlemek için tıklayınız)

La eksperiensa echa durante la pandemiya del koronavirus mos decha en penseryo i mos demandamos komo el mundo umano se rijera una ves ke eya se eskapara. El tema tiene munchas variantes i en estos diyas de epidemia, las espekulasyones son bastantes grandes. Ay ke dizen ke nada va trokar en las mentalidades de la djente, otros pretenden ke la konsensia kolektiva de los umanos sera otra i ke influensera un komporto diferente en frente de la natura i de la vida sosyo- ekonomika de los payizes en jeneral, una ves el virus vensido.

A mi avizo digo, ke la primera alternativa es mas justa, ke las kozas van a ser identikas komo lo pasado i ke una ves ke la melizina se topara los umanos se olvidaran presto de lo ke bivieron i sufrieron durante esta pandemiya. Van a regretar puedeser la peryita de miles de kavzos de muerte i kada komunidad laika o relijioza komemorara a su manera la disparisyon de sus sujetos . Korona aze sufrir el mundo entero sin diskriminasyon i no nesesita pasaporte para movirse de un payis a otro. Esto mos prova ke en el oksidente komo en el oriente la solidarita entre los payizes no egzisten, kada payis es por si i ke mizmo uvo rovoz de produktos de primera nesesita komo las maskas, guantes i mas entre eyos. Me demando a kualo serven las Nasyones Unidas, La Evropa Unida, el Nato i otros paktos semejantes kuando sotometidos a un inimigo invizible no son kapaches de unirse i defenderse en juntos.

Malgrado todo, este virus mos ambezo una koza ke mos aze pensar profundamente komo komportarse en la komunidad en la kuala mos topamos. Ser mas volontaryo para los proyektos komunales i akudir a los ke estan en situasyon mala. Mostrar un rekonosimiento sensero a los doktores, a las infirmieras i a los infirmieros, al personal techniko i administrativo de los ospitales, i de darles el kavod nesesaryo. Espero ke a la fin de la pandemiya los mansevos komo los aedados no se diran de si para si ‘a la hamada este mundo, miraremos de komer, bever, estar orozos sin pensar el dia de amanyana porke ay murir’.

De otro lado los politikos, ke dirijan los payizes onde la technolojiya enflorense, deven demandarsen ke una vez el momento difisil pasado, kualas seran las konsekuensas ekonomikas de amanyana , de ser konsientes de sus enkapachedades de no poder saver en el futuro komo rejirsen enfrente de una mueva pandemiya i de meditar kon sangre fiya la kapachita limitada de la intelijensya umana.

En Israel la situasyon no esta brillante, ma malgrado ke las otoridades politikas metieron muncho tiempo a orgonizarsen i forsar los haredim a estar en sus kazas, se pode pretender ke la kontaminasyon esta debasho de kontrol, muncho mas bien de los payizes oksidentales i en las komunidades djudias de la diaspora . El ayudo de las institusyones de defensa nasyonala i de la armada trucheron un apoyo muy grande a ke se tope ekuipamiento viniendo del ajeno i el kontrol de la sivdades onde la epidemiya esta grande. La mortaldad no esta tanto nombroza komo se penso i Israel esta en una situayon muncho mijor en komparasyon a los payizes evropeyos del sud, de los Estados Unidos i de los payizes musulmanos del Medyo Oriente.

Dezde la epidemiya los puevlos empesaron a dechar de lado sus inimistades i kon timidita miran a ayudarsen en el kampo de la medikeriya en kreando un trafiko de personas ke en el pasado serkano no egzistia, ke mizmo no se avlava del todo. Esto es lo ke akontense kon los palestinianos de Yehuda i Shomron i Gazza. Israel forma el personal sanitaryo arabo palestiniano, les ambeza a luchar kontra el virus, les da ekuipamiento i mas. Oy un kalmo relativo persiste entre eyos i mozotros koza ke oguramos ke sea de tura.

Guay ke la situasyon kon el Iran i la Siria no es la mizma. Malgrado ke el Iran sufre muncho de la pandemiya en tenyendo miles de kavzos de mortalda no troka de una ‘iota’ su politika de inimistad enverso Israel i Los Estados Unidos. Ademas tenyendo miliardas de dolares en su trezoro nasyonal el kemanda ayudo del oksidente i de las institusyones finansiaryas internasyonalas en el solo buto para poder kontinuar a finansar sus proksis sirianos, libanezos i yemenitas . Los mollah no saven kualo es ‘verguensa’. Ademas estos sanguinaryos no toman del todo en konsiderasyon la situasyon grava en la kuala se topan las sosiedades iranianas i sirianas en estos momentos de epidemiya , kontinuan en sus kaminos de guadrar el poder del payis en amahando l’ardor de los demokratos iranianos a ke no se soslevanten. Trump no esta deakordo a afloshar las restriksyones ekonomikas inflijadas a esta payis, i a mi avizo tiene razon.

El voluntarizmo simpatetiko en Israel es sempre alto, por mo de esto, kale rogar al D. bindicho a ke mos ayude en dandomos la emuna. Ademas tener konfiensa en los siantifikos israelianos ke en serka lo esperamos toparan la kura demenesteroza kontra este virus maldicho i ansina ayudaran a la umanita entera a eskabuyirse de esta plaga. No olvidar ke muestra terra es santa i es el lugar onde akontese maraviyas.