( Yazarın yazısını sesli dinlemek için tıklayınız)
Kuando en el mundo se manifestan krizas i desgrasyas naturalas, el umano realiza i empesa a pensar sovre la verdadera natura del komportamyento del sivdadino enfrente de lo ke akontese. . Su moralita, su umanita, su patriotizmo i ademas su lealdad - su derechedad- enverso un otro umano aparesen en el momento del apreto. El virus Kovid 19 aparesyo doz mezes antes i esta matando miles de personas en el mundo sin pueder arestarlo. Bien entendido i Israel fue apegado de esta maldicha grip sovre la kuala las otoridades sanitaryas no estavan prontas.
Malgrado la difikulta del momento el governo se organizo kontra esta pandemiya a la kuala no egziste melizina. El solo remedyo ke se topo es de enserrar la povlasyon en kaza i ansi ganar tiempo para ayudar a la siensa medikala de topar entremientes un remedyo . De otra parte el governo demando a todos los sivdadinos sin diferensya de relijyon i de kolor de piel, ke sean laikos, relijiozos, djudios, arabos musulmanos, kristyanos, druzes, cherkeses i mas de tomar siertas mesuras para ke no se apegen el uno del el otro de este virus muy danjorozo. No se deve abrasar, tomar la mano, estar en grupo , mizmo kon la famiya. Emplear maskas i guantes despartes de ser atansyonado a lavarse las manos kada nada. El virus se transmete de la saliva, del kontakto fiziko, dunke guadrarse de toparse en lugares publikos komo las sinagogas,las iglezyas ,las mishkitas, los stadyos i mas. El governo serro las eskolas, los restorantes, los lugares de lavoro i mas. Demando ayudo de la armada para ke la polisia pueda ser prezente en todos los distriktos del payis i ansi kontrolar a la povlasyon ke no eskuchan los ordenes.
Surpreza, de no pueder juzgar kon sangre fiya, la manera komo los relijiozos de las sivdades de Bnei Brak serka de Tel-Aviv, de Mea Shearim en Yerushalayim se komportan. Estos barvudos ke no eskuchan radyo, no miran a la televizyon i ke no sienten lo ke se les dize persisten a irse a las sinagogas, a las bodas, a los funerales i a renkontrarsen en las kayes. No uvo remedyo ke de defender todo modo de trokamyento de lugar, i de ovligar a los rabis lideres de estas komunidades de dar las instruksyones menesterozas para ke sus dishiplos no salgan mas de sus moradas. Es ansi ke oganyo las famiyas no se ajuntaran para la fiesta de Pessah. Koza ke va kedar en la memoria de las jenerasyones chikas del dia de oy, drama ekseptionala.
En el sektor arabo muzulmano las kozas no fueron mijor ke de los haredim. Eyos al presipyo se konvensyeron ke las orasyones echas en las mishkitas los salvaran de todo modo de virus. Ma los lideres aklarados arabos fueron kapaches de meter orden en las ideas de los miembros de los kazales i las sivdades arabas, ansi eyos esperan ke no daran munchas peryitas en almas komo los haredim.
Komo en un payis komo Israel, sivilizado, a la punta de la teknolojiya moderna puede aver djente semejante, sin moralita, sin patriotismo, sin kerensya del otro? Difisil de poder responder. Me parese ke la politika de los governos de los ultimos 40 anyos permetieron a ke la anarchiya se establiska apoko apoko en las komunidadaes relijiozas djudias i musulmanas del payis. La mentalidad yerrada de serar los ojos sovre la edukasyon mos kavzo muncho mal. La aplikasyon del slogan “a la fin todo se enderecha” no es i no va ser bueno para los israelianos. Ver miles de mansevos solo kon una edukasyon relijioza, sin ningun saverisyo de istorya, de matematika, de siensas i mas no mos ayudara a ser un puevlo uniforme kon valores nasyonalas i demokratikas.
Los lideres ortodoksos de setenta i sinko anyos i mas ke ordenan grandes grupos de mansevos los kualos reprezentan una grande partida de la manseves relijyoza israeliana, no son muy atados a las valores siviles de la sosieta israeliana i no sienten ninguna animasyon de responsabilidad nasyonala. Para eyos la komunidad relijyoza es diferente i ajena a la komunidad laik kon la kuala no se deve tener relasyones . La epidemiya de Korona kreo un muevo fakto sovre el kual la nasyon israeliana deve ser unida para gerreyar kontra este virus . Ansi la paradigma doktrinal de la nosyon haredi deve trokar dize una grande mayoriya de los intelektuales.
Vino el tiempo ke el governo i los miembros de la Keneset se alechen de sus politikas de kompromiso kon los representantes de los haredim i de las otras minoridades i votan leyes para sovreguadrar muestra demokrasiya i la unyon nasyonala en dando a entender a estas elites ke sin ‘El’ miles de almas sin pekado ivan despareser.