VINO TIEMPO DE SER OPTIMISTO

Estamos a fin del anyo 2019 , fiestamos Hanuka i el mundo kristyano la Navidad,( el nasimiento de Yeoshua). Son días relaksados ke mos dan la oportunidad de apuntar las echas i las desiziones de los prensipales politikos de la umanitad i de juzgar lo ke mos konviene i lo ke no mos konviene a mozotros israelianos.

En Israel lo ke mos da sar i preokupasyon es la inimista de los arabos i de los iranianos ke dezde muncho tiempo se konportan komo inimigos del solo payis djudio, de Israel i ke sus dirijentes gastan un mabul de dinero para azermos una gerra diplomatika i informatika al nivel mundial. Finalmente eyos intendieron ke kon la fuerza militar no podran destruyir Israel.

Para eyos todos los remedyos son valivles basta ke el resultado danye a los djudios en jeneral. La organizasyon yamada ‘boykot, divestimiento(kitar todo, desnudar)i penalizar’ (BDS) establisida kon el apoyo de la Otoridad Palestiniana mira prinsipalmente a azer eskayer a Israel en la opinion internasyonala i a deklarar su egzistensia nula i illejitima. Malorozamente esta institusyon ke dyo raises en el oksidente i en los payizes musulmanos logra anchamente en su lavoro kon el ayudo de los sirkolos de siedra evropeo i amerikano ke apuntan Israel komo illejitimo, dunke ke no tiene derecho de egzistir.. Sin olvidar ke los fashistos del oksidente inimigos del djudaizmo, en este sujeto, se ajuntan ekskluzivamente al punto de vista sosialisto antisemito.

Orozamente ke los governos oksidentales de vista toman sus prekosiones i azen votar por sus parlamentos leyes ke kastigan el antisemitizmo i el anti israelianizmo komo lo izo la Fransia el mez pasado. Israel de su parte para alkansar a defenderse kontra el BDS ovra de toda su fuerza, ma malgrado esto no parviene a ganar la batalya ke durera ken save kuantos anyos mas.

Apunto tambien la politika enterna yerrada de los suksesivos governos israelianos de siedra komo de derecha de no dar kontentes a la nasyon djudia, de no darles el sentimiento de un Israel ’fuerte’, i ‘demokratiko’ i esto sin razon. Israel representa en muestros tiempos en el Medyo Oriente una otoridad sin la kuala nada se puede dezvelopar jeopolitikamente. Mizmo los dirijentes iranianos deven pensar muy muncho, antes de desidar de atakar Israel a la ora de oy. No mos alvidaremos la Rusia en Siria se izo vizina de Israel i eya no pensamos ke sera en su enteresso de no tener buenas relasyones kon Israel i de no permeter al estado djudio de atakar las bazas iranianas en la Siria i en el Irak oksidentalo. Ansi sobresale la posibilita de munchos trokamientos en la politika araba sunnita ke se esta dezvelopando estos dalkavos mezes.

La Arabia Seudita, Los Emirates del Golfo Persiko, Umman ,el Egipto i la Jordania del espanto de ser atakados por un Iran en posesion, un dia, de la arma atomika, no tienen otro remedyo ke de estar en buenos termos de vizindado kon Israel i de ajuntarsen a el la ora vinidera para luchar kontra esta potensia persana. Sovretodo ke Trump renomado de no ser fidel de su palavra, ke sera por siguro elido komo presidente en las eleksyones del anyo vinidero, los arabos kon amargua se renden kuento ke no pueden mas apuyarsen a el para ke los tome debasho de sus alas. Dunke no les kedo otra puerta a batir ke Israel para ser protejados. La kestyon palestiniana i la inimista enverso Israel dezvelopada en la opinyon araba sunnita durante mas de 70 anyos a poko a poko se esta aflochando i no pasa dia ke los manaderos medyatikos de los payizes en kestyon no agan deklarasyones en favor del judaizmo. Esperamos ke durante la anyada 2020 munchos payizes arabos a la eksepsyon del Yemen, Libano i la Siria miraran de establisir de yure sus relasyones kon Israel kon el kual de fakto estan en kontakto.

De otro lado, el puevlo israeliano deve votar en serka por la tresera ves visto ke los miembros del Likud i sus aliados relijiozos no fueron kapaches de tener por sigunda ves 61 deputados en la Keneset. La siedra flaka kon el sentro Kahol Lavan (blu i blanko) i eyos no podieron tener la majorita. El primer Natanyahu akuzado por la justisia del payis de diferentes akuzasyones no se kere travarse de la vida politika i dechar el kampo libero a mas mansevos de el provoko esta tresera votasyon en un anyo.

Todo en saviendo ke remplasar Natanyahu no es fasil, el puevlo de Israel devra en estos momentos kompikados sovre todo enfrente de las difikultades al seno de la arena internasyonal, apresiar su lavoro pasado i de meter de lado sus defektos por una ultima ves i votar por el en dandole la majorita en el parlamento ke reklama. No mos alvidaremos ke en Israel egziste kuatro jeneros de povlasyon a saver: los laikos, los relijiozos, los haredis i los arabos. Todos estos biven en perfekta armonía i todos devran ser representados en la Keneset.

Lo oguro a ke el governo ke se formara se preokupe prinsipalmente de la defensa, de la sanedad i de la eduksayon todo en okupandose a mijorar la vida de los proves i sus kreaturas, el futuro de la patria.

Ay de kualo ser optimisto.