EL MITO DE DOS ESTADOS

Sin rekonosimiento legal de Israel komo estado djudio por los estados arabos i la administrasyon palestiniana no se puede avlar de 2 estados para dos puevlos vizinos.

Antes dos semanas vos eskrivi por Yehuda i Shomron i miri de darvos a entender mis argumentos deke estas tierras istorikamente djudias, dezde el Imperio Otomano no aparteniendo a dinguna entita politika son territorios disputados i no okupados sovre las leyes enternasyonalas. Oy vos dare mas faktos ke deven ser tomados en konsiderasion si la idea de los payizes oksidentales de krear 2 estados uno djudio (ke egziste) i un arabo palestiniano (en forma de ser kreado) , uno al lado de otro biviendo en pas, kon frontieras rekonosidas por akordos internasyonales, prevale. Alora se nesesita de diskutir una vez mas el tema de la ‘linya vedre’ establisida en el akordo de armistisyo del 1949.

Los palestinianos apuyados por los 58 payizes musulmanos pretenden ke la ‘ linya vedre’(yamada en mizmo tiempo linya del 1967) , deve ser la baza de la frontiera entre Israel i la antita palestiniana, ma ke podran azer siertos chikos trokamientos , en todo kavzo, sin trokar la superfisia egzistente en favor de una de las partes. Ansi mos demandamos, Israel no tiene dingun derecho sovre las tierras ke konkisto en una gerra de defensa, en la gerra de 6 dias? Es ke todos los lugares onde se establisieron los djudios durante los ultimos 50 anyos , inkluendo el lugar el mas sakro al djudaizmo el Kotel , kayen sovre los prinsipyos internasyonales i son achetados komo esbivlamyento de la ley internasyonala?

La rezolusion 242 de las Nasyones Unidas dize ke Israel devra travarse en kavzo de un akordo de pas de ‘territoryos ‘okupados, ma no de ‘los teritoryos’ komo pretenden los arabos. El teksto ingles difera del teksto arabo. Dunke para mozotros el teksto ingles prime i deve ser achetado komo final, es lo ke da derecho a Israel de negosiar trokamientos de territoryos en kavzo de un akordo final. Yehuda i Shomron son territoryos muy importante para la defensia de Israel i de Yerushalayim, dunke deve de kedar en mano del estado djudio.

La linya de 1967 kuvre el Kotel, la vieja parte djudia de la sivdad de Yerushalayim, lugares ke de dinguna manera no es posivle de darlos debasho de la jurisdikson de otro payis. No se puede alkansar a un akordo si Yerushalayim, kapitala de Israel, sea divizada de kualker manera i abandonada en partida.

El kuatren pakto de Jenevra, sovre todo su artikolo 49-6 no tiene nada de aver kon la politika israeliana en Yehuda i Shomron visto ke Israel no transfero i no tiene la intisyon de transferar kon fuersa los otoktonos arabos afuera de estos lugares. Eyos seran liberos en kavzo de akordo de estarsen o de irsen de sus lugares aktuales.

Este artikolo fue ajustado al pakto de Jenevra despues de la sigunda Gerra Mondiala para ke no se repete lo ke los nazistos izyeron. Entonses los inimigos de Israel empleyan este argumento sin dinguna baza juridika solo para azer opozisyon i inimistad, komporto obseno sigun mi. Israel espesialmente devra kon pasensia i kon diplomasia mirar a konvenser los evropeos ke sufrieron del nazismo a achetar el punto de vista politiko suyo. En kurtas palavras diremos ke las tierras kontroladas por Israel afuera de la linya vedre son sujeto a negosyasyones anteriores entre las partidas ke dezean pas en el Medyo Oriente. Ademas, no mos alvidaremos ke los sityos de establisimiento israelianos en Yehuda i Shomron son en konformidad kon la ley internasyonala porke el artikolo 80 del ‘Charter’ de las Nasyones Unidas memorizo la deklarasyon Balfour,la deklarasyon de San Remo, el mandato Inglez para la Palestina, en los kualos la sis-Jordania es achetada komo tierra djudia.

En kokluzyon el mundo arabo devra rekonoser estos derechos a Israel ,donde esta de akordo la administrasyon aktuala de los Estados Unidos. Se podra en konsikuensa establisir un estado palestiniano arabo independiente al lado de Israel. Ademas inevitablemente sin ke Israel sea achetado komo estado’ djudio’ no sera posivle de establisir un estado palestiniano, los arabos i el mundo muzulmano deven finalmente despues de tantos anyos de gerra i de inimistad achetar la realita de la prezensya de Israel en el Medyo Oriente.