LOS SEFARADIS EN ESTADOS UNIDOS

Los primeros sefaradis ke yegaron a Amerika del Norte, lo ke oy es Estados Unidos, no fueron los ke vinieron de los paizes ke azian parte del Imperio Otomano, sino ke un punyado de refujiados djudios ke se avian fuyido en 1654 de Recife, en Brasil. Eyos eran desendientes de los djudios de Espanya ke avian topado azilo en Portugal, kuando fue proklamado el dekreto de ekspulsion, en 1492, ma ke pokos anyos despues fueron konvertidos eyos tambien, por la fuersa, kontinuando djuntos kon esto a ser djudios, en el sekreto de sus kazas. Mas tadre, kuando la Inkizision empeso a persegirlos ayi tambien, munchos de entre eyos emigraron a otros paizes i entre otras a Brasil, ke era entonses una kolonia olandeza, esperando poder bivir ayi en paz.

La vida kalma ke eyos tenian en Recife se termino en 1654 kuando esta kolonia kayo en manos de los portugezes. Saviendo ke la Inkizision los bushkaria ayi tambien, eyos abandonaron sus kazas i sus aziendas i bushkaron otros lugares onde puedieran aresentarsen. 23 de eyos se embarkaron sovre una nave, en un largo i duro viaje durante el kual fueron atakados por pirates ke tomaron todos sus bienes. Eyos salvaron de la muerte solo kuando los pirates fueron aferrados por una nave mas grande, la St. Charles, a bordo de la kuala yegaron en un terrivle estado al porto de New Amsterdam, oy New York, ke en akeya epoka era ainda una kolonia olandeza.

A sus arivo eyos fueron muy mal resividos por el governador ‘holandez de la sivdad, Peter Stuyvesant, ke refuzo de darles azilo, deskriviendolos komo “djente repunyante”, ke no son del mizmo nivel sosial ke la povlasion de su kolonia. Ma, malagrado todas las difikultades i obstakolos ke enfrentaron, eyos persistieron, asta ke en fin de kuento el governador los aksepto komo sivdadinos a kondision ke sean “transparentes”, o en otras palavras, ke bivieran sin azersen notar, tomando kudyo de todos sus menesteres, sin resivir ningun ayudo del governo. En una grande mizura sus reushidad a kedar en New Amsterdam es devida a la intervension de diversos faktores i entre eyos la Dutch West India Company (Kompaniya Olandeza de las Indias Oksidentalas), ke algunos de los miembros de su komite de direktores en Olanda eran rikos merkaderes djudios ke tenian grande enfluensa en la ekonomia olandeza.

Kon el tiempo, uno de los djudios ke se aresentaron en New Amsterdam, Asher Levi, entendio ke el i sus amigos estavan pagando taksas al governo olandezo ma sin ke les sea permetido de gozar de sus derechos de sivdadinos. Komo lider de este chiko grupo de personas el reusho, kon su obstinasion, a azer akseptar a los djudios komo sivdadinos kon yenos derechos. El fue el primer djudio en la istoria de Amerika a kumplir el servisio militar, aun ke este servisio se limitava a azer la guardia en las puertas de la sivdad.

En el interval de pokos anyos los djudios ke avian yegado de Recife reusheron a ganarsen el derecho de aresentarsen en New Amsterdan, la New York de oy, negosiar, viajar, servir en la armada, kumplir libremente sus servisios relijiozos i ser konsiderados komo sivdadinos kon yenos derechos.

Eyos fueron los primeros sefaradis en Amerika i tambien los fondadores de la komunidad djudia amerikana. Kon el tiempo eyos izieron importantes kontribusiones a la ekonomia amerikana: i djugaron un rolo muy importante en la aviertura de kaminos en los teritorios del oeste de EEUU.

Munchos de eyos yegaron a ser figuras selebres i muy konosidas en la istoria amerikana komo Aaron Lopez de Newport, ke se enrikesio de la peshka de balena i yego a tener 30 naves ke viajavan a Evropa i otras 100 para el transporto a lo largo de las kostas del paiz. Judah Touro, ke nasio en 1775, devino una de las personas mas rikas de New Orleans. El es konosido por los donos ke izo al puevlo amerikano, aziendo fraguar la primera biblioteka publika de Estados Unidos ke en realidad fue tambien la primera de su djenero en el mundo, sin neglijar a sus korelijionarios sea en Amerika i sea en la Tierra Santa, para los kualos izo fraguar sinagogas, orfelinatos i otras institusiones mas.

En 1776 ya bivian en Amerika unos 2000 djudios, en sus mayoria desendientes de los sefaradis ke avian yegado de Recife. Los sefaradis de los Balkanes yegaron mas de 100 anyos despues, a prinsipios del siglo 20, komo konsekuensa de la dekadensia del Imperio Otomano i la kriza ekonomika ke ezbrocho ayi.

En segito a la provedad kavzada por esta kriza, ansi ke las presiones politikas i la ovligasion de servir el askerlik, munchos djovenes sefaradis partieron a paizes de Evropa, Afrika, Amerika del Sud i sovretodo a Estados Unidos.

No konosiendo el inglez estos sefaradis enfrentaron grandes difikultades i empesaron sus vida en EEUU en un muy basho nivel ekonomiko: algunos komo vendedores ambulantes, otros lavorando en fabrikas komo simples ovreros..

Un otro obstakolo ke kavzo grandes difikultades en la absorpsion de estos sefaradis en sus muevo paiz fue el fakto ke eyos no konosian el idish, lengua avlada por los eshkenazim ke ya bivian ayi i formavan entonses la mayoria de los djudios amerikanos. Pasaron munchos anyos asta ke los sefaradis, ke sus lengua maternal era el ladino, pudieron konvenser a los eshkenazis ke eyos tambien eran djudios.

Ma en fin de kuento i a lo largo de los anyos, todas estas difikultades fueron superadas. Oy, no solo ke las diferensias sosiales i ekonomikas entre sefaradis i ehkenazis kaje i no existen mas, sino ke a la kontra, el problema ke preokupa mas a los djudios de EEUU, sefaradis komo eshkenazis, es el de la grande asimilasion i de los kazamientos mikstos, kon non djudios, ke estan indo i pujando kada dia mas, en las dos komunidades.