Una ermoza estorya de jenerosidad i ermandad

En este mundo yeno de problemas grandes i de konkurensia virulenta, de ves en kuando meldamos o sintimos una koza ke mostra i prova ke el sentimiento de kompasion, piadad i umanidad no se puede kitar de la alma de la persona. Ansi fue la estorya de lo ke okurio en pasadas en uno de los matches (konkurensia esportiva) de Lacross de mujeres (Women's Lacross) entre el ekipo Israeli i el ekipo de Kenya.

Yo no savia lo ke es Lacross, i meldi en Wikipedia. Lo emportante aki es saver ke las djugadoras se visten chapines/kalsados komo los de futbol (soccer en inglez), ke tienen las projeksiones en el taban para ke no se arezvalen en koriendo. (En inglez estos se yaman "cleats.")

Era la kampionada de Lacross para ekipos de mansevas de edad 19 o menos, ke tuvo lugar en Peterborough, Ontario (Canada) el 6 de augusto pasado. El ekipo Israeli gano kontra Kenya 13-4. Seguro ke las Israelianas se alegraron, ma pensaron ke no era djusto, porke las ijikas de Kenya no tenian los kalsados espesiales, i se estavan arezvalando i kayendosen en djugando. El dia de antes avia echo luvya i los kalsados de tennis ke vistian no les dava la seguridad de korrer sin arezvalarsen.

Las ijikas avlaron kon el padre de una de eyas, Michael Duvdevani, i desidaron ke keren aregalar los kalsados menesterozos a las ijikas del ekipo de Kenya. Mezo sus grupo de Whatsapp tomaron el okey de los otros parientes, i Duvdevani demando del antrenor (coach) de Kenya a saver el boy de los piezes de kada una de las djugaderas, i merko los kalsados.

Al dia, el antrenor de Kenya trusho a su ekipo a ver el match entre Israel i Beljika, kon el preteksto de ver la manera ke djugan los de Beljika porke al dia sigyente Kenya iva djugar kontra Beljika. En realidad, las Israelianas kerian ke vinyeran para prezentarles los kalsados. Fue una grande sorpreza a las ijikas de Kenya kuando despues del match, el grupo Israeliano les prezento los kalsados de djusta mezura para kada una, kon sus nombres eskritos enriva del kuti! Las ijikas se abrasaron kon grande amistad i sentimiento de ermandad!

Al dia sigyente, kon sus muevos kalsados, el ekipo Kenya gano kontra Beljika 17-3.

Seguro ke estas ijikas van a kedar amigas, i las de Kenya van a tener amistad por Israel por todas sus vidas. Amistad i ermandad es lo ke tenemos menester todos.

Podesh ver fotos i videos de este episodo en:

https://www.kveller.com/israeli-teen-lacrosse-players-gift-cleats-to-opposing-kenyan-team