LOS DJUDIOS DE SALONIKO I LA INDUSTRIA DE LOS TESHIDOS DE LANA EN EL IMPERIO OTOMANO

Saloniko, la “sivdad-madre” en Israel onde kresio i se dezvelopo una de las mas grandes i briyantes komunidades del djudaizmo sefaradi, es famoza entre otras por el numero de kales i yeshivot ke tenia, por la intensa aktividad relijioza i kulturala ke la karakterizo durante largos anyos i tambien por el echo ke los lavorantes del porto eran todos o kaje todos djudios i ke este era el solo porto en el mundo en el kual no se lavorava en dia de shabat.

Una koza menos konosida es ke en esta komunidad se dezvelopo, en el siglo 16, el prinsipal sentro de la industria de ropas de lana en el Imperio Otomano. Poko manko en realidad, para ke esta sivdad se iziera, para el Oriente Medio, lo ke fue para Evropa entera i otras partes del mundo, Manchester, el prinsipal sentro de la industria de tekstil ingleza.

Los djudios ekspulsados de Espanya, en el anyo 1492, trusheron a Saloniko, en Gresia, i a Safed, en Erets Israel, la teknolojia de los teshidos de lana, fondaron ayi muevas emprezas i en el interval de pokos anyos reusheron a konkistar los merkados en kaje todas las partes del Imperio Otomano. Los djudios de Saloniko se avian espesializado entre otras, en la produskion de ropas de lana empleadas para las uniformas de los soldados del Imperio Otomano. Durante largos anyos eyos gozaron de un monopolo kaje absoluto en el abastesimiento de los menesteres de la armada otomana en este kampo.

En desparte de la teknolojia ke trusheron los djudios de Espanya, ay otrunos kuantos faktores ke ayudaron al dezvelopamiento de Saloniko komo sentro der la industria de tekstil.

El primero i mas importante de eyos es ke Saloniko se topava sovre los prinsipales kaminos ke atavan el Norte de los Balkanes kon el Sud i el Este kon el Oeste, i ke por ayi pasavan las karavanas kon merkansias de un paiz al otro. Saloniko tenia tambien, i ainda tiene, un ekselente porto ke le permetia de eksportar a todos los otros portos del Mediterraneo.

Si se adjusta a esto el fakto ke la sivdad se topa en medio de una rejion muy apropriada al elevaje de karneros i a la produksion de lana, kon dos grandes rios ke abastesen agua en abondansia i kon minas de las kualas se ekstraye los kimikales de los kualos ay menester para el tratamiento de la lana, ya se puede entender ke en el siglo 16 i asta el primer kuarto del siglo 17, la industria de los teshidos de lana enfloresio en Saloniko i permetio a miles de djudios de esta sivdad de mantenersen de este lavoro i prosperar en el.

Sigun los manaderos istorikos, la povlasion de la sivdad se engrandesio muncho grasias al dezvelopamiento de este ramo i de apenas 14000 almas ke kontava antes ke vinieran los ekspulsados de Espanya, en menos de 10 anyos eya yego a tener 30.000.

El trokamiento vino en el primer kuarto del siglo 17 kuando, de una parte pujo la konkorensia de la industria tekstil ingleza, i de la otra parte, el governo otomano pujo sus dasios i apezgo su mano sovre los teshidores djudios en Saloniko.

En lugar de ayudarles a luchar kontra la konkorensia ingleza, el governo del Sultan tomo una seria de mizuras kontra las emprezas de tekstil de los djudios de Saloniko, ke no parvenian a abasteserle ropa de buena kalidad al presio oferto por los inglezes. Komo konsekuensa de esto la industria tekstil de Saloniko eskayo rapidamente i despues de poko tiempo desparesio enteramente.