EL INDULKO I LA MUMIA

Mihael Molho, al kual devemos algunas de las mas importantes ovras ke tratan de la komunidad djudia de Saloniko, dedika en su livro “Usos y Costumbres de los Sefardies de Salonica” todo un kapitolo a las praktikas de majia ansi ke a las kreensias i superstisiones en esta komunidad.

El eskrive, entre otras, ke las praktikas de majia al seno de los diversos puevlos, son tan viejas komo las primeras relijiones, si no son aun mas viejas de eyas. Los djudios tambien, eskrive el, adoptaron a lo largo de sus istoria munchas de estas praktikas, ke se embezaron de los puevlos al seno de los kualos bivieron.

Algunas de entre eyas eran atadas a las hazinuras i a otros males ke atakavan al ombre i para los kualos a vezes era difisil si no imposible de topar kuras efikases. Oy naturalmente, kon los progresos de la medisina i el dezvelopamiento de milizinas efikases komo los antibiotikos etc. pokos solo tienen ainda rekorso a estas praktikas. En la mayoria de los kavzos eyas ya fueron kaje enteramente ulvidadas, pasando del kampo de la majia al kampo del folklor, de los uzos i kostumbres ke tenian muestros antepasados i de los kualos es a penas si mos akodramos oy.

Uno de los mas interesaantes de entre estos uzos era el indulko. Un uzo sovrel kual ay poka informasion serioza, en desparte de lo ke fue eskrito por el sosiologo djudio Rafael Patai. El apunta ke el indulko es una prova de luchar kontra las “fuersas negras”, los demonios o “los de abasho”, los “mijores de mozotros” (sigun la terminolojia empleada por los sefaradis eyos mizmos) ma kon un metodo diferente del ke era uzado en otros kavzos.

Si en jeneral se perkurava, por exemplo, de protejarse kontra “los de ahasho” en entornandose de medios de proteksion, komo las “kemeot” (amuletas), o las mezuzot de kaza, plantas komo la ruda i mas, en el kavzo del indulko se bushkava - djusto a la kontra - de milizinar al hazino en apaziguando a los “mijores de mozotros”, en ofresiendoles lo ke se pensava ke les agrada mas, i espesialmente dulserias. De ayi viene, sigun Patai, el nombre “Indulko”, de la rayiz “dulse”.

Patai kontinua i da una deskripsion muy interesante del indulko. Bazandose sovre el livro “Kenesiya leshem Shamayim” (Arekojimiento pormodo del Sielo) publikado en 1874, en ebreo, por Rabi Menashe Matlub Siton, el eskrive ke en primer lugar la kaza del hazino ke devia ser tratado era alimpiada bien, kitando de eya todos los livros de ley i otras kozas atadas a la relijion. Esto era echo para ke “los de abasho” no tengan miedo i vengan libremente al “konbite” ke les era aprontado en esta kaza.

A vezes se kitavan las mezuzot tambien. De mizmo devian de salir todos los ke bivian ayi, salvo naturalmente el hazino i la persona, jeneralmente una mujer vieja, ke azia el indulko i era yamada la “endulkadera”.

Despues, en lo ke el hazino estava en kaza solo kon la endulkadera, esta tomava un poko de trigo o sevada, lo mesklava kon miel i lo echava al deredor de la kama del hazino ansi ke en los 4 kantones de la kaza i otros lugares de mas. Lo mizmo era echo tambien kon las otras kozas aprontadas de antes - komo asukar, leche o sal i mizmo mumia - i entonses eya empesava a dizir algunos prekantes, demandando i implorando a los “de abasho”, de tener piada del hazino, i retornarle su fuersa i salud. O, si se tratava de una mujer ke estava moviendo repetadamente, se les demandava ke ”…deshen bivir a sus ijos i ijas”.

Todo esto, i algunas kozas mas, era echo 3 vezes i repetado despues 3 noches, i en siertos kavzos 7 o mizmo 9 noches, una detras de la otra.

Los rezultados del indulko, sigun lo ke se kreiya, venian en un periodo de asta 40 dias. Si asta entonses el hazino no se milizinava, es ke su malatia era inkurable.

Patai eskrive sovre la mumia tambien, mensionada por el rabino Siton en su deskripsion del indulko. La mumia es una sustansia uzada en algunas de las praktikas de majia ke eran muy komunes, sigun lo dishimos, asta pokas diezenas de anyos atras. Ma estas eran praktikas sekretas, de las kualas era defendido de avlar, i komo konsekuensa de esto, muy pokos solo saven agora kualo era exaktamente esta mumia, i de onde venia.

Sigun las eksplikasiones de Patai, parese ke la palavra mumia es de orijin persana. En persano, en efekto, la palavra mum sinyifika sera i tambien bitumen, pez. La pez ke avia en la rejion del Mar Muerto era yamada “mumia” por los arabos, ke avian tomado esta palavra de los persanos. Eyos uzaron esta palavra tambien para la materia kon la kuala los antiguos ejipsianos enbalsamavan sus muertos, malgrado ke la materia uzada para esto no era pez sino ke un djenero de rezina. Una de las konsekuensas de este yerro fue ke la palavra momia fue empleada para los kuerpos embalsamados eyos mismos, i no solo para la materia kon la kuala eran enbalsamados.

En la Edad Media, medikos arabos i djudios uzavan, para kurar siertas malatias, la mumia tomada de momias ejipsianas, estando konvensidos de su efikasidad espesiala.

Ma el numero de las momias era limitado i kuando ya fue difisil i mas tadre imposible de obtener momias, se empeso a uzar una mumia diferente. Sigun Patai, esta mumia era una materia aprontada kon guesos de personas muertas, preferablamente enbalsamadas o a lo menos ke se sekaron en el sol del dizierto.

Es probable ke la efikasidad de esta materia, si es verdad ke era efikas, provenia de su efekto psikolojiko, del sekreto i misterio ke enbolvian todas estas praktikas majikas i de la atmosfera de tension i espanto en la kuala era echo el indulko.