Rakí kon mezé

Alha a la tadre. No tinía yo nada de azer, i tú saves, uno puede estar batal el día entero, ama el meoyo no desha de lavorar, i me akodrí entre otras kozas de una koza ermoza ke me pasó muncho tiempo antes. Na, te lo vo a kontar: estava yo un día kaminando por la kaye Corrientes (Buenos Aires), kuando ensupitó me topí kon Nissim Sarano (en ganeder ke esté) ke komo mí, salió a dar un dolash.

Donpués de saludos, abrasos i hadras al estilo de mozotros, tú ya saves, desidimos de ir a bever un rakí (ke se izieron varios) kon mezé, al Café Izmir, muy alavado entonses.

Bueno, "A la salud!", dishimos, i veo ke Nissim kita una koza de adientro de la aldukera, la mira, mete kara komo de dizgusto i beve rakí.

Segimos echando lashón un poko, i enkomendimos otr`ún rakí.

De muevo este benadam aze lo mizmo, kita lo de la aldukera, mira, mete kara de dizgusto i beve el rakí.

Avlamos un poko más, i le demandí si kería bever un kavo rakí.

Me dize: "Aspera, déshame ver." Ontr`una ves kitó akeyo de la aldukera, lo miró, i esta ves no metió kara de dizgusto. Al kontrario, se sonriyó i disho, dando una dada en la meza: "No bevo más!"

"Addió!", le dishe yo, "No sto entendiendo lo ke vas aziendo. Deké no me lo esplikas, así bivas tú?"

"Está bueno" me dize, "Ya te lo vo a esplikar: lo ke kito i meto en la aldukera es la fotó de mi esfuegra. La vo mirando i vo beviendo. Kuando empeso a verla linda, no bevo mas!"

Kontado por JAIME BENSIGNOR

Redaktado por MATILDA KOEN-SARANO