LAS MANOS ATADAS DE ISRAEL

En los momentos aktuales Israel esta en konflikto avierto kon el Hamas ke konkesto kon fuersa i kruelda la banda de Gaza en rompyendo kon la Autoridad Palestiniana de Abu Mazen. Los dirijentes aktuales de la banda disiplos de la doktrina de los Ermanos Musulmanos , ayudados militarmente i enkorajados por el Iran dezde 7 mezes luchan kontra Israel kon muevos argumentos i teknikas diferentes .

Dia no pasa ke no manden mansevos, aedados, kriaturas, mujeres a la frontiera kon Israel para mirar de pasarla en kemando karuchas de lastik, rompiendo las kanjelas de proteksyon para matar u arevatar soldados israelis. Ademas la mueva taktika es de mirar de kemar los kampos de kultura al deredor de la banda koza ke se aze kon balones unflados kon gaz sanitaryo ke traversan la frontiera trayendo bombas de fuego ke kemaron i keman sharas, kampos de agrikultura i mas. En desparte estos ultimos días un ‘graad’ kon 20 kilos de egsplozivo kayo en sima de una morada en Beersheva aziendo grande danyo, ma lores al D. sin kavzar muerte.

Enfrente de todo esto, Israel, payis d’una splendor inegualable,endependiente, militarmente fuerte , potensya ekonomika, , protejador grasias a su Korte Suprema de los derechos umanos i de una demokrasia ke aze modrer los dedos mizmo en Oksidente, ke aze? No grande koza i porke? Por la simple razon ke los payizes fondadores de la Evropa Unida , inimigos kayados , dezde munchos anyos pretenden ser los protektores de los Arabos palestianos, lo amenazan . Eyos pretenden ke Israel no deve defender su puevlo en uzando su grande fuersa porke el puevlo palestiniano ke esta debasho de okupasyon es flako i tiene el derecho de luchar para su independesia. Sovre eyos kada vez ke Israel ataka sientos de palestinianos son matados i miles de firidos se arastan en los ospitales. Por kontra las katyushas i los graades no kavzan una mortalidad importante en Israel!! Kurioza manera de akuzarmos de no desharmos matar!. Grasias a muestra injenialitad ke tenemos en Israel de krear sistemas de proteksyon muestras piedritas son chikas ma kualo dizir kuando el Hamas forsa a miliones de israelianos a eskonderse dia komo noche de sus raketes ke krean un atmosfera de paniko.. Kualo dizir por los tuneles ke yegan en el teritoryo israeliano? En pokas palavras miran de empozarmos silensyo i politika de la kayades kuando somos atakados.

Miraremos de juzgar i de entender la ansya de la siedra evropea i de los ke pretenden ser kontra la politika israeliana , ma ke no se deskulpen kuando los akuzamos de antisemitizmo sovre las deklarasyones ke azen regularmente las kualas dan ganas de gumitar . Estos son argumentos de una vieja epoka sovre la inimista kontra el djudio., esta mos trespasa. .Eyos miran de izolarmos en la sena politika i diplomatika, ma se alvidan ke el karakter djudio es bien formado para luchar por su egzistensia. Los 70 ultimos anyos de la istoria moderna lo prova kon su demazia.

De otra parte Israel deve luchar al seno de la Organizasyon Mondiala (UN) onde se toman la mayoriya de las dechiziones kontra el. La organizasyon komo fonksyona oy, es dirijada por las grandes potensias i grupos de payizes ke miran sus enteresos komunes. Israel en este konteksto es protejado solo por los Estados Unidos. Sin el apoyo de el Israel se devria topar komo un parya de la umanitad. Los 58 payizes musulmanos en esta platforma a la unanimita miran grasias a sus petrol i sus dinero de merkar o de amenazar los chikos payizes de votar komo eyos en todo modo de dechizion ke se formula kontra Israel. Ansina muestros inimigos de Gaza i sus akolitos obtienen la mayoriya del tiempo, la kondemnasyon de Israel. Fin ke este sistema kontinuara Israel sera el payis el mas kondenado de la tierra.

En desparte de esto Israel deve luchar para ke el Iran su proxy Hizbullah no se enrezien en Siria. No esta muy fasil de negosiar kon Putin, porke la Rusia vende armamiento al Iran i no le konviene de azerlo aravyar. En mizmo tiempo muestro uniko aliado los Estados Unidos tendra en serka eleksyones parlamentarias , Israel deve estar attento a no ayudar a los demokratikos a ke pujen sus miembros en el Senato i metan el presidente Trump en minoria.

Por todo esto Israel tiene las manos atadas i no se permete de dar un chaketon fuerte en Gaza. Los politikos israelianos están amostrando el palo, ma sin konsekuensas. De mi perspektiva Israel no devra en el estado aktual negosiar kon el Hamas. Porke el Hamas no entiende ke la fuersa. Vino tiempo de likidar a los lideres islamistos, ma no en estos momentos kritikos. El Hamas de su parte viendo ke Israel no esta aremeneandose kontinua a mandar balones de fuego, i djente ariento de los 300 metros de la zona tampón para kemar karuchas de lastik i romper las kanjelas.

A los sivdadinos israelianos, no kedo mas ke de asperar la vinida otra vez del shef de los servisios de ransenyamento egipsyano Kamel Abbas en la banda de Gaza, en Ramallah i Yerushalayim kon la esperansa ke topara remedio a un akordo de arrestar el fuego mizmo temporaneamente..