Difisil de no ser pesimisto en pensando a muestros ermanos biviendo en Turkia. Dizde mezes ke la situasyon politika entre Israel i la Turkia se amurcharse, kada dia ke pasa el prezidente Erdogan i su doredor dirijente no mankan de atakar en publiko a Israel. Eyos dizen .ke Israel es un payis teroristo, ke masakran a los palestinianos de Gazza i ke no achetaran nunka la desizion de los Estados Unidos te rekonoser Yerushalayim komo kapital del estado djudio. Yamaron dalkavomente a sus ambasador atras i aronjaron kon malisya a el ambasador de Israel en Ankara. Vulgaros no eran ma estos dalkavos anyos se izyeron . Insultar, dizir mintiras ser falso no enkombre la klasa dirijente turka. Pekado de dizirlo la Turkia no era ansina del tiempo de Ataturk.
De otra parte la situasyon interna del payis esta un verdadero kaos. La ekonomia esta serka de falitar, la seguridad de los sivdadinos mala i difisilmente kontrolavle. La guerra kon los kurdes sirianos i irakianos kostara miliardas a la kasha del governo. Ademas miliardas de dólares fueron gastados para la infrastuktura nasyonala, koza ke no ayuda a la ekonomia i al dezovreo de los sivdadinos. No savemos kual es el grado de la sumas rovadas por siertos dirijentes. La industria i el negosyo estan lavorando grasiyas al dinero en devizes ke se emprestaron del etranjero i sovre las istatistikas el payis deve de pagar al anyo vinidero 200 miliardas de dólares. Entremientes la lira turka perye kada diya de su valor i los ekspertos la ven a un nivel superior a sinko liras un dólar. El ke se endevdo en devizes etranjeras no sava ande dar la kavesa para topar remedyo para pagar su devda. En kurto la Turkia esta mal i esto es la prinsipal razon por la kuala el prezidente Erdogan desidyo insupito a ke ayga eleksyones jenerales en el payis. Un muevo prezidente kon el muevo parlamento serán eskojidos. A la diferensia de lo pasado, esta vez el prezidente votado será responsable del egzekutivo del payis, lo ke kere dizir ke no vaver mas un governo nominado por la asamblea nasyonala. Erdogan tiene chanses de ser elijido otra ves i de tener sekretaryos ke dependerán del para dirijir el payis, al model de los Estados Unidos. Es ke esto será una manera de demokrasia liberala al model oksidental o se asemejera a una demokrasia polisiera ke no dara nunka libertad de ekspresyon en jeneral,a la partida de opozisyon. Bivir i ver.
El konteksto mos aze pensar sovre los djudios ke dainda biven en Turkia. No se save kon justesa kuantos kedaron a bivir aya. Kuantos están prontos a azer la alia, malgrado ke será difisil para eyos de trokar payis, ambezar una mueva lingua i mirar de kitar sus parnasa en tierra de Israel. Yo les dizere ke todos los olim ke vinieron de Turkia en el sieglo pasado i en muestros diyas se aresentaron sin difikultad i los ke supieron kon pasensia a akomodarse a la manera de vida oy biven orozos i gustozos. Bien entendido uvo ke no pudieron akomodarsen i ke tornaron atrás. Mismo akeyos deven de retornar a Israel, para estar en siguro i no kontinuar a bivir komo sivdadino de sigunda kategoriya, onde la inimista kontra el djudio se izo el motivo de la sosieta turka de oy en dia. Mijor komer pan duro ke de tener la alma en la palma dizian muestros padres.
De mi perspektiva personal dire a los turkanos israelianos, devemos ser solidaryos de muestros ermanos de Turkia. Devemos ovrar kon determinasyon a mirar a konverserlos a vinir a establisirsen en Israel. Devemos además gruparmos detrás la Itahdut Yotsei Turkia para demandar ayuda de la administrasyon Natanyahu, para ke el governo fasilite la vinida de los olim turkos, para ke resivan la mizma asistensia finansiarya de los otros olim ke se toparon en perikolo komo los de Ukranya por egjemplo. No mos alvidaremos Israel alevanto i trusho de Etyopa al payis miles de olim en una noche , somos unikos a saver azerlo.