Israel tiene agora, entre munchos otros , un problema difisil a solusyonar. Los imigrantes ilegales de la Afrika.
Mozotros Judios bushkimos donde emigrar para salvarmos del barbarismo Aleman y el antisemitismo Europeo, y no uvo ken mos aksepte ( ni mezmo los Estados Unidos). Devemos ser los primeros a entender los ke bushkan asylo en otro pays.
Agora kuaje 40000 imigrantes ilegales de la Afrika, por lo mas Musulmanos, se topan en Israel kavzando munchos problemas a los sivdadinos –sovretodo de Tel Aviv. Israel se kere dezbarasar de eyos en pagando dinero a la persona y al pays ke lo va resivir.
Estamos viendo komo juristas, doktores, eskrivanos, intellektuales están contra la desizyon de arondjar a estos extranjeros. Por razones humanitarias, sin duda.
Ma es ke el governo, en tomando la desizyon de reenviarlos esta enteramente en yerro? De una parte kada governo tiene derecho de kontrolar la imigrasion a su pays, Israel kere ser un pays demokratiko Judio. 20 % de su populasion ya no es Judia. Akseptar mas jente ke no son Judios y no pensan ser temporarios aki . No es una desizyon fasil.
Veremos kualo se pasa en la Europa : El resultado de 25 anyos de “multikulturalismo” ke los payses Evropeos adaptaron, seyga por humanismo, seyga por menesteres de lavorantes baratos, kon la idea de ser egalitario kavzo graves problemas ke influensan negativamente el repozo y las valores de los sivdadinos del mundo oksidental.
Los Turkos en la Alemania y la Evropa entera, los Norte Afrikanos en Fransia y en Espania, los musulmanos del Pakistan de la India, Bengladesh, del Sudan y de otros payses Afrikanos en Ingleterra formaron komunidades grandes ke kontinuan a bivir según biviyan en sus pays de orijen..
Los Evropeos kreeron ke estos estranjeros están sufriyendo en sus payses, miseriozos, sin echo, proves, ke ay ke ser humanitarios kon eyos, en permetiendo de bivir según keren, y parnasa. Kreyeron ke kon tiempo, eyos y sus ijos, serán patriotes, van a respektar la bandiera y el himno nasyonal del pays. Ansi fueron siempre los Judios ke vinieron a bivir en las sivdades Europeas..
La Evropa esta entendiendo a ke grado se yerro. No solo en el fakto ke estos no se integraron, ma ke sus demokrasia, derechos sosiales, kon allokasyones familiales, todo esta aktuando en desfavor del pays.(*)
En los kavos 25 anyos, después ke se termino la Guerra Yelada entre los bloques Amerikano y komunisto, paresyo ke la demokrasia es el sistema politiko de preferensia, ke el totalirianismo de Hitler , Mussolini , Stalin, Franco etc. ya desparesio, El mundo se yerro.
“Freedom in the world” es un sondaje annual mostro ke los payses ke se alesharon de las valores demokratikas son mas munchos ke los ke adoptaron de ser demokratos. Estados ke 10-15 anyos antes se konosian kon sus demokrasia, komo la Turkiya y la Hungaria están kayendo en un governo autoritario.
Siertamente, el estado aktual de Europa se deve en grande parte al fakto ke mesmo kon 3 jenerasyones los imigrantes Asiatikos, Arabes y Afrikanos Musulmanos se resisten a integrarsen en las sosiedades ande vinieron a bivir. Este refuzo de las valores judeokristianas humanitarias de Europa se aplika a todos refugiados y migrantes, inkluyendo a los ke arivaron kon barkos superpuevlados y kolapsaron en las costas de Gresia, Italia y Espania desde ke empeso la guerra sivil en Siria, y tanbien a generasiones de Pakistanezos y Bengladesíes en Ingletierra, norteafrikanos en Fransia y Turkos en munchos lugares de la Europa.
El resultado de 25 anios de eksperiensa “multikultural” no produsio komunidades multikulturalas. Al kontrario, vemos kartieres de Londra, Paris “okupados” por eyos, kon eskolas, mesquitas, mujeres tapada, cafes solo para hombres barvudos, tabelas en Arabo, komunidades “monokulturales “ islámikas estan siempre aparte, asta pretender y ekzijir la islamizasyon del pays.
En permetiendo ke akel musulmano se pueda kazar kon 2-4 mujeres y defendiendo la poligamia a su proprio sivdadino, el mezmo governo Ingles o Fransez kavzo ke las leyes de Ingletierra o de la Fransia no seygan las mezmas para todos los sivdadinos. La subvension para kada kriatura izo ke los ke tienen 12 kriaturas resivan alokasyones sin menester de lavorar. En Europa se organizan teroristas ke izyeron aktos de tante danyo a la vida y al turismo.
Esta povlasyon importo a la Europa de nuevo el antisemitismo, kuando avia adoptado leyes ke defenden la enemista de Judios y la negasion del holokosto. Siertos de los Afrikanos ilegales trayen kon eyos tanbien riskos medikales ke Israel es obligada de evitar.
Ansi es ke Israel se ve en el ovligo de tomar desizyones difisiles y de aspekto no muy humanisto. Estos “ilegales” tienen tanbien kriaturas ke les nasyeron en Israel y no konosen otro pays.
Esta es la razón de los ke se oppzan a la desizyon y keren k seyga revizada.De otra parte, para siertos lavoros Israel necesita ovreros del extranjero.
Una politika ekilibrada y bien kontrolada –humanizmo y interesos del pays- puede ser la solusion la mas lojika en lo ke konserna los imigrantes ilegales de Israel.
----------------------------------------------------------------------------------
(*)Kavamente se publikaron livros ke solo de sus titoo se entiende de kualo se trata : The Strange Death of Europe: Immigration, Identity, Islam de Douglas Murray, The End of Europe: Dictators, Demagogues, and the Coming Dark Age de James Kirchik, Reflections on the Revolution in Europe: Immigration, Islam and the West datado de 2010 por Christopher Caldwell. Soeren Kern tambien analizo el efeto de la imigrasyon de los payses Musulmanos en Alemanya, Suedia y toda la Ingletierra. Una koza serioza se esta pasando , y no solo en la Europa, kon impakto al mundo entero.