WİLLİAM JAMES SİDİS

Syempre me plaze meldar artikolos i romanes de biografiya. En pasadas bushkando un livro meldi este artikolo ke lo topi muy enteresante lo traduizi del turko, lo kije partajar.

WİLLİAM JAMES SİDİS era un djudyo Ruso, konosido komo la mas entelijente persona del mundo.

William, nasyo el 1 de Avril en el anyo 1898 en Boston, en una famiya de emigrantes djudyos Rusos. Su padre Borris Sidis era akademisyen de psikolojiya en la Universidad de Harvard. Su madre Sarah Sidis, era medika.

Su enteresante i trajika istorya de William, empesa kon la alfabe, ke se la ambezo kuando teniya 6 mezes. A los 18 mezes meldava la revista New York Times i a 3 anyos avlava latino.

A los 8 anyos avlava ingles, latino, grego, ebreo, fransez, alman i ruso.

La primera klasa la eskapo en dos diyas, la sigunda en una semana, la tresera i kuatrena klasa en 15 diyas i la sejena i syetena klasa en 40 diyas. A los 8 anyos kijo entrar a la universita Harvard i parvino a dar todos los egzamenes kon buen grado, malgrado todo, la universita no lo aksepto achakes de su edad.

A 11 anyos de muevo entro a los egzamenes, por siguro reucho, esta ves fue akseptado i a los 16 anyos eskapo su edukasyon kon buen grado. Dospues de kompletar su estudyo en Harward empeso a estudyar derecho. Kuando eskapo la sigunda universita William avlava kaji 40 linguas. De no kreer.

A lo ke konto su mujer, William se ambezava una lingua en unos kuantos diyas i puediya traduisir en otras linguas. Mezmo envento liguas muevas ma no fue akseptado por los linguistas.

Un diya su ermano chiko, lo yevo a un psikologo i le izo testos IQ. Las valores salyeron entre 250 i 300.

Kuando vino a 20 anyos, empeso a entrar a partidos sosyalistos i komunistos i empeso a azer mitinges en el primo del mez de Mayo. Por esto fue arestado por el governo i entro en prizyon.

Komo su padre era una persona muy kontado, kompleto sus anyos de prizyon en su kaza.

Kuando fue akuzado, las gazetas se olvidaron de su entelijensa empesaron a kritikarlo duramente.

Los ke lo felisitavan lo arebasharon por sus ideas sosyalistas.

Ansi kontunuo su vida leshos de la sensya. Esta manera el mundo kedo afrito de una persona muy presyoza i muy entelijente.

William James Sidis muryo en New York el anyo 1944.

Esta semana no kije eskrivir sovre la gerra porke ya estamos byen tristes, penseryozos, diya i noche enfrente la televizyon bushkando kanales, kon esperansa ke vamos a oyir haberes buenos. Ma malorozamente de diya en diya se fue para mas negro. De leshos no mos vyene de la mano nada lo ke puedemos es azer orasyon i arogar a los syelos.

Para darvos un poko moral va terminar mi eskrita kon una poesiya ke es en mezmo tyempo, las palavras de la kantika "beharvot hanegev" en judeo espanyol.

POR VER TU BANDYERA NE NUEVO BRİYAR

DİMOS A LA TYERRA ALMAS SİN GOZAR

DİMOS A LA TYERRA MUESTRA MANSEVES

MUNCHAS MADRES YORAN A LA KAYADES

MADRES AMARGADAS NO SUFRİYESH MAS

NO SERAN PERDİDAS VUESTRAS LAGRİMAS

Sİ DE NUESTRA SANGRE NASYO İSRAEL

TANTO KE BİVİMOS BİVERA İ EL.

Apretar al boton para ver todos los eskritos