top of page

UNA VİDA DEDİKADA AL DJUDAİSMO


(Teksto-Audio)

(Yazarı sesli dinlemek için tıklayınız)






Meldar livros me plaze muncho. Sovretodo enverano, seya en kaza seya en la plaj me da plazer. El tyempo de la pandemiya, tanto meldi, un tyempo dospues no kije ni meldar ni zoom ni nada. Agora esto oroza ke ya empesi a meldar de muevo. El livro de alkavo ke esto meldando es la vida de DONNA GRACİA NASSİ LA SENYORA Mezmo ke konosko muy byen esta vida yene topi plazer de meldarla de muevo. La konosko porke atras unos kuantos anyos, djuguimos la vida de esta famoza damma.


Yo kuando djugo un rolo me konsentro a akea persona, meldo la vida, seya en las provas seya en la shena no so yo so akea personaje. Munchas vidas djugi en estos 35 anyos de shena. Komo SARA BERNHARD- HÜRREM SULTAN- GOLDA MEİR İRENA SENDLER Todas estas mujeres eran fuertes de karakter ma kreygo ke GRACİA NASSİ fue la mas korajoza.


La pyesa empesava esta manera:

GRACİA--- nasi en 1510 en Lizbon la kapitala de Portugal. Mi famiya me izieron baptiz en la eglisya kon un nombre Espanyol BEATRİCE DE LUNA. Ma mi nombre djudio es HANNA. Hanna es un nombre ebreo, en Espanyol kere dizir gracia. Mo yo, ya lo se este nombre nunka no kale ke lo diga…


Me akodro kuando teniya 6 anyos, una tadre, mi madre me lavo, me vistyo i me yevo al budrum de abasho de muestra kaza. Abashimos de unas eskaleras aleskuro… no no me espanti porke teniya la mano en la mano de mi madre….supito se alelumbro la kamareta… mi padre asendyo los kandelares… vide una meza byen grande, enriva de la meza avia vazos de vino i yervas ke no konosiya los nombres… mi nono İzak Nassi paso a la meza me tomo en la pyerna….estamos debasho de tyerra todos estan avlando a la kayades… todos tomaron los vazos de vino mi nono i mi padre empesaron a kantar una kantika en otra lingua… LE SHANA ABA BE YERUŞALAYİM ABELUYA…. mi madre empeso a darme a entender:


-Gracia mozos semos djudios, ijos de İsrael, esta noche es noche de pesah, estamos selebrando la salidura de ayifto ke fuimos syervos a Paro.

-madre no esto entendyendo mosos kualo semos??? İjos de Jesu ijo de la santa Maria u ijos de İsrael???

-djudyos mi kerida, ke dyos mos pardone… oyeme bueno! amanyana es paskalya vamos a ir a la eglisya vamos a bezar los pyezes de la Santa Maria i vamos a bever el vino ke sinyifika la sangre de Jesu.


Afilu ke era muy chika akea noche entendi ke devo de bivir dos vidas. Una: ija del doktor de Lizbon Beatrice De Luna ke se va kada alhad a la eglisya… dos: inyeta de İzak Nassi Hanna Gracia ke asiende kandelas de shabat i selebra la fiesta de pesah debasho de tyerra a laskondidas. akea noche les di palavra a mi famiya ke nunka no va perder la alma del djudaismo.


Ansi empesa la vida difisil de Gracia Nassi… de la Espanya a Lizbon, de Lizbon a Anvers, de Anvers a Venedik, Hollanda, İmperyo Otomano i en fin Safed.

La pyesa se termina kon las palavras de remorso.


GRACİA---- esto en los diyas de alkavo de mi vida… muy kansada i hazina… no mesto espantando de murir… solo lo ke kero es ke dingunos no se apatronen de mi İstorya… porke lo djusto yo lo se… vana dizir ke troki de ley i me ize baptiz en la eglisya, korri detras de la rikeza , traisyoni mi puevlo , tuve amores pasyonados, todo es verdad… ma una koza kero ke sepash. Siempre miri shabat, nunka no komi pan en pesah, ni karnes kortadas por otros mas ke hahames djudios.

Yo HANNA GRACİA NASSİ vo lo digo de alma i de korason…

en mi puerpo puedeser ay JESU ma en mi alma solo… solo ADONAY.










Etiketler:

Comments


Bizi Takip Edin
  • Facebook Basic Square
  • Twitter Basic Square
  • Google+ Basic Square
bottom of page