UN REKUERDO DE SHAVUOT

(Teksto-Audio)

(Yazarı sesli dinlemek için tıklayınız)

Los anyos dalkavos, todos mos izimos dependyentes de la konputadora i del internet. Por siguro ke la teknolojia es menester para adelantar ma kale achetar ke peryimos los sentimyentos… kon un mesaje estamos avizando las envitasyones, kon un e-mail estamos ogurando moed alegre i kon un whatsupp estamos demandando hatir de 25 amigas entimas en una ves. Las repuestas estan kon un dedo ke kere dizir okey, kon una kara en ves riyendo en ves yorando i ansi estamos entendiendo en ke estado esta la persona. Si la kara ke mando esta riyendo es ke ya esta buena, si no esta riyendo, entonses le respondemos kon una otra kara seryoza i esto kere dizir ke mos embaraso … para mi es mijor de avrir un telefon i oyir una boz u bien de ir a bever un kafe. Ma en este dor esta es la manera i kale konvenir para estar aktual.

Antes munchos anyos mis ijos me ovligaron a ambezarme a uzar la komputadora. En primero no kije i les dishe: “yo ke va azer kon la kompudadora”

Me disheron: “ambezate mama, porke un diya va vinir si no saves empleyar la komputadora es komo ke no saves meldar i eskrivir”.

Tenian razon, oy los bendigo ke me forsaron a ambezarme i esto muy kontenta.

Atras unos kuantos dias resivi un e-mail ke me plazyo muncho diziendo:

dos kozas no vienen a alkansar:

“Una, la palavra mala ke sale de la boka,

Dos, el tiempo pasado.”

Es muy djusto, el tiempo pasado no viene atras; ayer parese, ke ya vino rosh hashana, ya paso el invierno, ya vino purim, pesah i detras shavuot. Shavuot es un moed muy sakro, es el dia ke vino los dies komandamyentos de la ley.

Atras munchos anyos me paso un kavzo por la kavesa, ke me desho trasa, ke no me olvidi.

Kuando eskapa el mes de mayo, tengo uzo de alimpyar la kaza de la Ada. Una demanyana del mez de Junyo, despues de mandar a los ijos a la eskola, sali de kaza para irme a tomar el vapor de las oras mueve i sinko. Yo esto kon dos mosas, dos validjas yenas i dos saksis de rozas. Asperando ke va pasar un taksi, inyervoza ke va peryer el vapor, kon chapetas, kon asigido i la sudor por demazia. Por siguro esto vistida mas neglije porke me va ir a penar. En supito del apartamento de allado sale madam Sara kon el marido (Madam Sara vizina de kuando moravamos en Şişli) bien vistida, kon tayyör blanko, en la mano su fular de dantela i el livro de ley. Kuando me vido, de vista vino allado:

--- Hag sameah Forti… hayrola demanyana matrana este hal kualo tyenes hazina estas?

---

No madam Sara no esto hazina, ma esto muy inyervoza, ay media ora ke esto asperando un taksi i no lo esto topando… nada no es va peryer el vapor!

--- Ande te estas indo dia de moed kon vapor?

--- a la Ada, a alimpyar la kaza i ya kedi muy tarde.

--- a la Ada??? Bravo Forti… no topates otro dia de alimpyar la kaza oy es moed, oy es Shavuot.

Me disho otruna ves hag sameah i se fue. Ma akea mirada no me la puedo olvidar. Akeas oras no topi ke pensar, me averguensi muncho, yo ke era una buena eleva de la mahazike tora i ya este en ganeden, del sinyor Nisim Behar, komo puide azer este modo de yerro.

No se si madam Sara bive, ma si esta meldando esta eskrita kero ke sepa, despues de akea demanyana de moed nunka no me olvidi del diya santo de shavuot.

HAG SHAVUOT SAMEAH.

Yazarın tüm yazıları için tıklayınız