UN PESAH EN LOS DİYAS DEL OLOKOSTO

Esta istorya de Pesah en los diyas del Olokosto (kontada por la Senyora Amelie Jacobovits) esta amostrando komo la poderoza fuersa de la vida de una mujer, esta atando muestro pasado, prezente i futuro.

Noche de Pesah, la famiya entera kon los inyetos asentados en la meza de seder, me izo akodrar el Pesah del anyo 1941. Era manseva akeyos anyos, eskondida en un kanton obskuro en el sentro de la Fransia.

Oy, la fiesta de Pesah ke estomos selebrando kon todo el konfor, el lukso, kon las komidas savrozas, no se pode komparar en mi korason kon el Pesah de sesentidos anyos antes. 1941 fue el Pesah el mas ekstraordinaryo de mi vida. Antes de kontarvos este evenemiento, kero eksplikarvos komo entri a este kanton obskuro.

Estavamos biviendo muy kontentes kon mi famiya en Nurenberg. En el anyo 1933, la vida por los djudios se estava aziendo de diya en diya mas difisil, fin ke, un diya, trupas de Nazistos entraron a Nurenberg, ordonando a todos de travar la bandiera nazista en los edifisios emportantes.

En el anyo 1936, mi padre mos yevo a Paris porke lo aviyan dezinyado komo rabino en la sinagoga de la kaye Cadet. En unos kuantos anyos, komo la situasion se deterioro, mi padre fue ovligado a deshar su posto. En el anyo 1940, kuando los Nazistos empesaron a bombardear Paris, mi madre mos tomo a los kuatro ijos i mos suvio al treno, antes ke venga el asalto grande, un diya antes de la fiesta de Shavuot.

Unos kuantos mezes mas despues, peryendo por entero la trasa de mi famiya empesi a arastarme de kazal en kazal. Una noche, antes del amaneser, me konsinti ke no iva poder ir mas leshos, soni la puerta de un kazalino el kual me tomo ariento de su kaza. Abashimos endjuntos a un bodrum debasho la tyerra. Aya aviya una otra ijika. En unos kuantos diyas, vinyeron dos otros ijikos i una otra ijika. En los primeros diyas, dingunos de entre mozotros no teniyamos el koraje de dizir ke somos djudyos.

Akel anyo, uvo un invierno terivle. Kada demanyana, muy poka luz entrava de las ventanas altas de la pared. Esta luz era la sola koza ke viyamos del mundo de afuera. El kazalino, kada demanyana, mos abashava de estas ventanas, sinko bokados de komida, i un chukal para muestros menesteres. Komparando a las otras kreaturas, se pode dizir ke eramos malgrado todo muy mazalos. Akel invierno difisil, sinko kreaturas, leshos de sus kazas, mos atimos unos kon los otros kon valores muy diferentes de las de oy i kon una amistad grande ke kontinuo la vida entera.

Un diya, mirando por la ventana, uno de entre mozotros apersivio el sol briyando en el sielo. Unos kuantos diyas despues, vimos yervas kresiendo enriva la tyerra. No teniyamos kalenderio.

El sol briyando i las yervas vedres, eran los solos mesajeros de la primavera. Dishimos ke, pode ser ke eran los diyas de Pesah. Kada uno de mozotros viniamos de diferentes klasas del djudaizmo. Ma, todos los sesh teniamos el mezmo dezeyo, ‘azer lo ke se deve para selebrar la fiesta de Pesah’.

El diya sigente, kuando el kazalino mos trusho la komida, le demandimos si mos podiya trayer un poko de arina, una ridoma de agua, unas kuantas gazetas i una koza para asender. Resivimos la arina unos kuantos diyas mas tadre, porke todo estava vinyendo de la Almania del notre. Mezmo el kazalino no teniya nada de komer.

Duspues ke arivo la arina, mos desidimos de asperar unos kuantos diyas mas para asigurarmos ke estavamos en la primavera. Un diya ke el sol estava briyando buen karar en el sielo, mos desidimos de selebrar la fiesta de Pesah. Dishimos si trokamos las vistimientas unos kon los otros, iva ser komo si mos aviyamos merkado vistimientas muevas. Antes ke se aga de noche, deviyamos de aparejar la matza.

Echimos la agua enriva la arina, kemimos las gazetas i kon las dos manos detenimos la arina mojada enriva la flama para ke se toste. Esto iva ser muestra matza.

Akeya noche, selebrimos la fiesta. Uno de entre mozotros saviya el Kiddush. Un otro demando las kuatro kestiones, ke es la parte del seder ke los ijikos chikos resitan. Kontimos estorias del Exodus, ke mos akodrimos de muestros padres i a la fin del seder, kantimos las kantikas de Pesah, ke eskapan la noche.

Nunka no mos podemos olvidar de akel Pesah, sin komidas de Pesah, sin vino, i sin chinis luksuozos. Muestro solo dezeyo era de komunikar kon el Dio. Akeya fiesta fue la mas profonda de todas ke pasimos fin oy.

Esto rengrasyando al Dio, ke me diyo la vida, i ke oy esto podiendo kontar esto todo ke pasimos a mis ijos i a mis inyetos. La prezensya del Dio en mi vida, sus benediksiones i sus mirakolos me izo savlar la vida, komo salvo fin oy el puevlo djudio de todas las desgrasyas.

Yazarın tüm yazıları için tıklayınız