top of page

SOVRE EL HAHAM






Keridos lektores, avlando sovre los miembros de la famiya, un elemento bastante importante era el “Haham”. Haham en la lingua ivrit de oy, se uza para deskrivir una persona intelijente i savyo. El haham de la kehila oy es yamado “El Rav”, o “Rabi”.


En tiempos pasados, el haham no solo era el ke aziya las orasyones en el kal, ma en mismo tiempo vijitava las kazas para kompartir los problemas i ayudar a resolverlos; dar sus bendisyones i sus ideas, i en vezes azer el “pidyon”.


Ansi es ke tenemos bastante refranes i diças sovre el Haham. Entre eyos ay munchos ke mos van a azer sonreir:


  • Afilu ke es haham, se le meneya… (El haham es un ser umano kon todos sus sentimientos… )

  • Ambeza el haham lo ke no kere el Talmud. ( No todo lo ke ambeza el haham puede ser djusto o verdadero.)

  • Bueno darsa el haham, si ay ken oyga.

  • El Dio ke mos guadre de bimbriyo ham, i de lo ke kere el haham.

  • El Dio ke mos guadre de medyo haham i de medyo savyo. ( todo los dos pueden ser danjerosos)

  • Haham i merkader, allegriya para su mujer. ( todos los dos son profesyones respektables.)

  • El haham mete la mano en su pecho, mas muncho por su provecho. (hahames pueden ser oportunistos)

  • El haham por ande kere abolta la ojika. (aktua komo le konviene)

  • Haham sin keila no vale ( el rey es kon su doredor.)

  • Kada uno es haham en su ofisyo.

  • Mas vale haham sin barva ke barva sin haham.


DICHAS :


  • Es mas bonete ke de haham. ( Se dize para un haham no muy savido. El bonete parese mas yeno de savidurya ke la kavesa de’l ke lo yeva.)

  • Haham de Bukarech, embolvido en el kirech. ( se dize para burlarse del haham)

  • Haham de las mezikas. (ke nunka fuye oportunidad de estar ande ay pransos).

  • Es haham ma no de mi kal. (No de mi manera de pensar, no somos de misma idea.)

  • Karika de haham. (odasiozo, ke no tiene muncha verguensa.)

  • -Sinyor Haham, el azno kayo al pozo !

-Es Shabat, deshaldo.

-Rabi es su azno!

-Presto kitaldo, es alma del Dio!















Comentarios


Bizi Takip Edin
  • Facebook Basic Square
  • Twitter Basic Square
  • Google+ Basic Square
bottom of page