
(Teksto-Audio)
(Yazarı sesli dinlemek için tıklayınız)
Dizen avlar del pasado es siman de vejes. No va enyegar ke ya me ize vyeja, es verda ke de idea kero kedar en 45 anyos ma la verda ya la save la sertifika de nasimyento. No solo agora, syempre me plazyo el pasado. Un livro vyejo, una fotografiya, un filmo de epoka me yeva a akeos diyas. Este anyo komo kada anyo diya de kipur me fui a la keila Neveşalom. En entrando a la kaleja me vino al tino komo un filmo los anyos ke bivi en esta kaleja ke me paso la chikes.
En los livros de istorya vemos ke en el 8.en i el 9.en siglo, los djudyos bivyeron en Beyazıt, Bakırcılar, Sirkedji i en el entorno del palasyo Topkapi. Despues ke ensenklo Fatih Sultan Mehmet Estanbol, mando a yamar a todos los djudyos ke biviyan en Anatolia. I miles de djudyos vinyeron a bivir a Estanbol.
El anyo 1492 Espanya. El rey de Aragon Ferdinand kon la reyna de Kastilya Izabela, se adjuntan i kitan un dekreto diziendo ke todos los djudyos kiten la Espanya, si no seran kemados.
Desmamparados, los djudyos, una noche de teshabeav fueron ovligados de deshar sus paisez, sus kazas, sus byenes, sin tomar nada kon eyos mas ke las yaves de sus kazas, kon esperansa ke un dia vana tornar. Se suven a los barkos i vyenen al Imperyo Otomano ke les avyo las puertas. Se enstalan en los sentros emprimero Hasköy i Balat dospues Ortaköy, Kuzguncuk, Haydarpasha, Kadiköy i por siguro en la Kula…
Oy la kula, malorozamente un lugar de vendedores de lampas, un lugar de komersyo. Un tyempo, kon sus keilas, kon sus eskolas djudias, kon sus kalejikas estrechas, kon Chinili han, Boton han, Fresh han, Kamondo han, Bellikas, Sarikas, Moizikos, Davidikos.
Las solombras estan en las paredes en los tavanes altos….ah la Kula… todos se konosiyan, el 95 por syen de los djudyos moravan aya, se viya los moedes, en hanuka todas las kazas se alelumbravan kon las hanukiyas, en purim se vendiya mavlachas i sestikos de dulse en las kayes, pesah todos kaminavan kon paketos de matsa en la mano, Roshashana – Kipur los kales yenos, los selihot otra alegriya i el dia dalkavo de sukot Simhatora, todas las kriaturas kantando “ashiya mi koles syen paras de koles kon fenerikos en las manos.
Uvo amores grandes, espozoryos, kazamyentos, fyestas, todos se alegravan endjuntos, si aviya una desiluzyon todos se atristavan, agora todo troko. Troko los kartyes, troko las vistimyentas, la manera de bivir, la manera de pensar, los estudyos, mezmo las ideas. Pujo las ambisyones, de sorte pujo las ansyas, todos estan penseryozos, seya mansevos seya vyejos por el avenir de sus kriaturas, es verda ke agora en pizando a un botoniko estamos avlando ko las Amerikas ma ya teniya otra savor otra alegriya akeos tyempos
Es por esta razon ke me plaze eskrivir i djugar teatros de las vidas del pasado. ansi empesava la pyesa “REKUERDOS” ke la djugimos unos kuantos anyos antes.
LA VİDA ES UN TEATRO
KE BİVİMOS EN LA SHENA
KON LOS BAYLES İ LOS KANTES
MOZOS LOS DJUGUADORES
LAS LUZES SE ASYENDEN
VEZ DEKORES İ KOSTUMES
U RİYİMOS U YORAMOS
MOZOS LOS DJUGUADORES
MOS VAMOS AL PASADO
TORNAMOS AL DİYA DE OY
EL TYEMPO NO MOS DİFERA
MOZOS LOS DJUGUADORES
DJUGUAMOS KON ESPERANSAS
İ UN POKO DE ANSYAS
SOLO ASPERAMOS PALMAS
MOZOS LOS DJUGUADORES.
Kon esta chika poesia ke kompozi no se si vos puİde dar mis sentimyentos. HAG SUKOT SAMEAH

Comments