top of page

PENSAR PARA NO PEDRER EL SONYO SIONISTO




(Teksto-Audio)

(Yazarı sesli dinlemek için tıklayınız)




Las dalkavas matansinas de Tel Aviv, Beersheva i Bnei Brak no eran solo aktos de terorizmo para kumplir un eskopo politiko, ma de mirar de matar djudyos lo mas posivle. Las dulsuryas i los bonbones distribuyidos en las kayes de Gaza después de estos aktos teroristos sinyalan ke el buto fue alkansado. A esta okazyon de parte de los palestinianos no uvo ninguna demanda politika para muevas negosyasyones o para el establesimiento imedyato de un payis palestiniano independiente. Solo fueron prononsados publikamente en las deklarasyones de los dirijentes del Hamas ke Israel deve despareser en totalita sovre todo en eliminando todos los djudyos biviendo en su pecho.


Nada de muevo de lo ke esta eskrito en la karta konstitusyonal del Hamas. Ansi una vez mas se entiende ke la inimista kontra el djudyo no esta para despareser malgrado la realita aktuala de un Israel fuerte. El eskopo del antisionizmo palestiniano aktual no solo es la kontinuasyon del antisemitizmo klasiko, ma ser mas danjorozo de el, en mirando de organizar pogromes para matar lo mas de djudyos. Oy tenemos una prova mas.


Para mi, el biervo pogrom me akodra la violensa eritada de las matansinas de los djuyos ke areyevaron durante la perioda tsarista rusa. De punta de vista akto no es diferente de la ke se sinyalo oy; un djudyo sin defensya es atakado en la kaye en indose a su lavoro. Orozamente ke Israel es un payis independiente i se save defender. Mas no se pode matar un djudyo sin ke ayga kastigo. De ver la polisiya i la armada ovrar para aferar i kastigar los terroristos, mos da satisfaksyon, konfiensa i sentimiento de seguridad. Ma malorozamente nada no esta abastando para trokar la dotrina de la inimista de los palestinianos. Los terroristos aktuales son los kozakes modernos del pasado i sus butos son de azer pogromes.


Estamos profundamente desturbados de ver ke kon el establesimiento de Israel no vino la fin del antisemitizmo. Theodor Hertzl después del kavzo Dreyfus su diagnostiko fue ke avia de dar una eksplikasyon rasyonala al antisemitizmo evropeyo visto ke los djudyos no tenían una tyerra ke les aparteniya. El dia ke Israel se fondara, Hertzl se kreyo ke el antisemitizmo va despareser. La istorya moderna desmente esta profesiya. La ironiya es ke Israel una vez fondado se izo el sentro de la inimista vieja i del antisemitizmo. Komo pode ser ke el es el solo payis ke afronta un movemento global ke no le rekonose su derecho de egzistir. No abasto el Olokosto ke mato 6 milyones de muestros ermanos, es ke ay mas djente ke keren matar otros 6 milyones kon una bomba atomika? No se tiene visto ni oyido ke un payis tanto chiko sea akuzado por diferentes modos irreelos por el Konsilyo de los derechos del umano de Las Nasyones Unidas.


No egziste una eksplikasyon rasyonala a esta situasyon estranya. Esto no es un fenómeno ke se pode entender de punta de vista de la istorya i de la ley. Difisil de ver ke en kada jenerasyon mueva djente mala se organiza para destruyirmos. Komo entender esta makabra predizyon. Komo mos eksplikamos muestra sovrebiviensa durante 2000 anyos, ke somos la unika i la mas vieja nasyon ke rezistyo a imperyos los kualos desparesyeron en no dechando ni un desendiente. El destino muestro es bibliko i de dinguna manera no deve ser sujeto a trokamyentos de la parte de politikos ke pretenden ke Israel es un payis ke deve ser komo los otros, lo ke normalizara kon el tiempo el puevlo djudyo i ansi el antisemitizmo desparesera.



Agora vino el tiempo de entender ke este sonyo no egzistyo del todo. Israel deve dezveloparse mas, ser la “start up nation” eshemplera del mundo. Milyones otros djudyos devran venir establisirsen en sus tyerras i ansi topar el remedyo de unirmos para poder defendermos. Devemos atakar en la shena internasyonal, si demenester es, a todo modo de institusyon komo el BDS i a el Iran ke mos menasa kon armamiento atomiko, lo ke para mozotros reprezentan modos de muevos pogromes. Ademas devemos realizar ke si keremos sovreguadrar muestro uniko payis moderno djudyo, Israel, regalo divino, devemos pensar por de muevo en profundita los prensipyos del sionizmo, koza ke es muestra misyon divina. Las futuras jenerasyones de israelianos deven ambezarsen porke Israel no es un payis demokratiko komo los otros, ke es un avrigo para la uma djudiya, ke se deve protejar de jenerasyon en jenerasyon para ke el mirakolo del D. perdure.







Comentarios


Bizi Takip Edin
  • Facebook Basic Square
  • Twitter Basic Square
  • Google+ Basic Square
bottom of page