PAJA (Aliansa Djudia Pan Afrikana)

El onze de Djulio 2008, PAJA (Aliansa Djudia Pan Afrikana) aviya selebrado su primera reunion kon los partisipantes de las komunidades djudias de Uganda, Zimbabwe, Nigeria, Etopia, Ghana, Kenya i Los Estados Unidos. Los reprezentantes de las komunidades djudias de Afrika se aviyan reunido en Uganda, para selebrar la enstalasion del rabino Gershom Sizomu, por los rabis konservadores de Los Estados Unidos, komo gran rabino de komunidad.

‘’Es una grande onor para mozotros de azer la primera reunion de PAJA en Uganda’’ aviya dicho el gran rabino Sizomu. ‘’ Mos estamos kreendo ke PAJA va azer su posivle por ke todas las komunidades djudias de Afrika se enfuertesen. PAJA esta lavorando para unir las komunidades afrikanas djudias. PAJA tambien esta mirando a enfuerteser las koneksiones entre los djudios de Afrika i los djudios del mundo entero, para reushir a krear ‘’La Unidad Djudiya’.

PAJA es la ovra de Be’chol Lashon. Be’chol Lashon, ke sinyifika en ebreo ‘’En Kada Lingua’’, es una inisyativa del Instituto de los djudios ke investigen sovre las komunidades djudias en el mundo. Su lavoro es de kreser, enfuerteser los djudios de todas las etnikas, kulturas i rasas. El direktor de Be’chol Lashon, deklaro ke tienen grande potensyal por el kresimiento de komunidades djudias en Uganda, Nijeria i los otros paizes de Afrika.

Los direktores de PAJA estan partisipando a munchas aktividades en sus komunidades. Dr. Rabson Wuriga eskrivio un livro sovre las tradisiones oralas de los djudios de Afrika. El Gran Rabino Gershom Sizamu esta establisiendo una mueva eskola rabinika en Uganda para servir a todos los djudios de Afrika. Otros judios estan fraguando sinagogas, eskolas i aziendo otros projektos.

PAJA se espandio en el Atlantiko entero, para atar los djudios Afrikanos a los djudios pretos de los Estados Unidos. Por la primera vez en la istoria moderna, los lideres de los djudios Afrikanos se aunaron.

Una grande diversidad de djudios egziste en el mundo entero. Los kazamientos miksos, las konversiones i las adaptasiones son la kavza de esta diversidad. Anyos antes, kuando mos diziyan ke este Afrikano es djudio, no mos kreiyamos. Ma oy, egziste djudios de todas las rasas. Ay grandes esfuersos en el mundo entero, para poder krear ‘’Una Unidad Djudia Mondiala''. Rogamos ke esto se realize para poder luchar kon muestros enemigos.

Yazarın tüm yazıları için tıklayınız