Una parte de la muzika de los sefaradis, fue enfluensada de los puevlos ke los sefaradis bivyeron endjuntos. Los Maftirim son unos de estos kantes ke fueron enfluensados de la muzika Turka. Los Maftirim son tekstos relijyozos ebreos kantados kon melodiyas de la muzika mistika muzulmana de los Sufis, Mevlevis i Dervishes...
Los primeros Maftirim son kompozados por el poeto i el kompozitor judyo, Rabbi Shelomo Mazaltov ke bivyo en Estambol en el diisejen siglo, en el tyempo de Suleyman el Maraviyozo (Muhteşem Süleyman). Rabbi Shelomo Mazaltov adapto los makames de la Muzika Ottomana a las poemas mistikas en ebreo.
Esta tadisyon paso a Edirne a la fin del diisetyem siglo. Akeyos diyas, en Edirne aviya una grande komunidad judiya. Los kompozitores relijyozos de esta sivdad krearon mas de sukuenta makames ke fueron kantados kon grande entuziazmo por mas de trezyentos anyos en esta komunidad.
Kon anyos, esta tradisyon komo munchas otras fue olvidada. Anyos antes, en la Sinagoga Neve Shalom de Estambol, aviya un koro de Maftirim, ke kantavan en los diyas de Shabbat i en las fyestas.
Unos kuantos anyos antes, kon la reanimasyon de la lingua i las tradisyones sefaradis, esta tradisyon empeso a vinir atras. En el anyo 1991, un grupo de mansevos en la direksyon del Hazan Aron Kohen se reunyeron para formar un koro kon el nombre “Maftirim Korosu”. En el anyo 1999, este grupo kontinuo en la direksyon de Menahem Eskenazi (el Haham i Hazan de la Sinagoga Hemdat Israel de Kadiköy).
Este koro empeso a kantar estos kantes en las fyestas i en konsertos espesyales. El koro kontinuo a asistir a todos los konsertos ke sembolizan el mozaiko relijyozo de Estambol (estos konsertos se yaman “Living Together”). Unos kuantos anyos antes, en los grandes sentros de muzika de Estambol (komo Atatürk Kültür Merkezi i Cemal Reşit Rey), los Maftirim estuvyeron kantando endjuntos kon los koros muzulmanes i kristyanos.
Unos kuantos enveranos antes, en la izla Prinkipo (Büyükada), los tres koros endjuntos dyeron un konserto maraviyozo al puevlo de la izla.
Aparte de esto, los Maftirim partisiparon al Festival del Enkontro de las Sivilizasyones en Hatay (Hatay Medeniyetler Buluşması Festivali).
Dyeron tambyen un konserto en la inogurasyon de la Sinagoga de Edirne en el anyo 2015. Debasho de la direksyon de Ümit Atalay i Menahem Eskenazi, dyeron un otro konserto kon el Koro de Kulturas Marev ke es afiliyado a Mardin. Este konserto tomo lugar en el Sentro de Kongresos de Haliç en el anyo 2016.
Kada anyo, en el Diya de los Judyos de Evropa, los Maftirim dan konsertos en las sinagogas.
Un album de los diskos de Maftirim, kantados por los mijores hazanes de Estambol, se produizo por el Sentro de Kultura Sefaradi Turka.
Este album va tener una grande valor en el futuro porke va transferar a las jenerasyones futuras, los Maftirim ke es una de las mas ermozas tradisyones de los judyos sefaradis.