MUJERES PRESYOZAS DESKONOSİDAS.

Forti BAROKAS
4 May
3 dakikada okunur

Güncelleme tarihi: 5 May

meldando la istorya djudiya vemos ke munchos ombres famozos desharon sus nombres inolvidavles. Komo Theodor Herzl, Davit Ben Guryon, Moses Menderlson etc. Por siguro ke ay i mujeres muy presyozas komo Golda Meir, Hanna Rovina, Donna Gracia, eyas i munchas.

Ma ay otras mujeres djudiyas ke estan en sigundo plano, ke no se konosen tanto ma ke eran presyozas en la istorya mondial i desharon sus valutozas palavras. Unas kuantas de eyas....

JUDITH LEIBER (1921-2018)

“la reyna de las chantas”.

JUDİTH, Nasyo en Budapest 1921.

 En la sigunda gerra monidal, su famiya fue ovligada a kuzir uniformas de soldados ma eya prefero a azer chantas i las empeso a vender a los soldados Amerikanos. Fue muy reushida, de sorte ke empeso a azerles chantas a las artistas de sinema komo Greta Garbo, Elizabeth Taylor.  Entro en munchas koleksyones de arte, kazada kon Gerson Leiber, muryo a los noventa anyos en una kriza de korason.

Su palavra de alkavo fue:

grasyas a Hitler achakes de el me ambezi a azer chantas.

HEDY LAMARR (1914-2000)

Hedy Lamarr era una emigrante i una estreya de Hollywood. Eya era la mas ermoza i tambyen la mas seksual. Aparte de su karyera de sinema, era eksperimantada en muevas teknolojiyas i eventos. Lo mas emportante lavoro enriva la GPS i WİFİ. Ma syempre fue konosida komo artista ermoza i seksual.

Su palavra de alkavo: entre los analises ke ize topi libertad i me sinti ke estava bivyento en otro syeklo.

FRANCESKA MANN (1917-1943)

Franceska era una balerina ke muryo en Auschwitz a la edad de 26 anyos. Eya se konose komo la balerina ke mato a los nazis. Franceska mato a un ofisyal de la SS antes de entrar a la kamareta de gaz.

Su palavra de lakavo: malorozamente nada no keda en el mundo.

EMMA GOLDMAN (1869-1940)

Sigun el arshivo de mujeres djudiyas, en el siglo XX. Emma fue una anarshista aktiva en la politika Amerikana. Syempre defendyo la libertad de avlar, la libertad sexual, la independensya de las mujers, la edukasyon radikal, la djustisya i los derechos de los lavorantes.

Sus palavras de alkavo: el trokamyento de ideas no se realisa sin revolusyon. La revolisyon es la aksyon del pensamyento libre.

EMMA LÁZARO (1849-1887)

Emma Lazarus fue eskritora i poeta.

Eya era, el otor del poema ‘The New Colossus’ (la manyifika estatua de Apolo en Rodes, una de las syete maravillas del mundo) eskrito en la Enstitua de la Libertad. Syempre dezeo ke los emigrantes tengan una vida mijor. En su poema dize

Dame a mi a los dezmazalados

Ke estan afritos de respirar

En esta tyerra no ay lugar

A los miserables.

Su palavra de alkavo: todo esta klaro komo el diya no es ansi?

MARIANNE COHN (1922-1944)

Marianne en la sigunda gerra mondial, estava salvando a las kriaturas del governo fransez de VİCHİ ke estava okupado por los nazis. La aferaron la echaron en prezo ma eya de la prizyon mezmo kontinuo a salvar kriaturas. Eya fue torturada i matada en la prizyon.

Sus palavras de alkavo: si vengo al mundo de muevo syempre azera lo ke ize.

SARAH SCHENIRER (1833-1935)

Sarah fue pionera de la edukasyon de las ijas i de las mujeres djudiyas ortodoxas. Fondo una eskola de ijas en Polonya yamada BAİS YAAKOV. Eya no fue solo profesora fue kapache a trokar las ideas radikal de las mujeres relijyozas.

Sus palavras de alkavo: keridas elevas el destino de Israel esta en vuestras manos.

El dyo ke mos ayege a ver 1os 100 de Yom Atsmaut sin sar i sin mal.

Forti BAROKAS