Empesi a eskrivir sovre sujetos djudios i investigar la istoria djudia en el Imperio Otomano i la Turkiya kaji kuatro anyos atras. Desde 2017, posiblemente la mas ermoza parte de esta eksperiensiya es enkontrar otros ke se ambezan de mi i por kontra yo me ambezo de eyos. De estos enkontros, munchos eran otros djudios ‘marjinales’ ke trespasan las frontieras de muestras institusyones komunitaryas .
Frankamente, muestras institusyones son totalmente konservadoras, ‘kayadezistas’ en munchas kozas, i en los espasios publikos klaramente governistas. Avlo no solo de los komites de las fundasiones ma sovre todo de los grupos de la manseves, el FKD, i otros. En muestraos espasios komunales, no ay dinguna boz sovre feministas, LGBTQ, siedristos, afilu personas ke dezean estar en solidaridad kon otros puevlos de la Turkiya komo sivdadanos. Akodravos la koza entre muestros lideres i el konsulado israeliano o el echo ke no tuvimos dinguna mujer komo lidera asta oy en dinguna institusyon.
Lo ke kere dizir ke me rendi kuento en los dos o tres anyos ke estas personas egzisten i ke están interesados por saver sovre la komunidad djudia. Desde ke publiki unos artikolos sovre los Vanlis, resivi munchos mesajes de los desendientes de Vanlis uvo diálogos muy rikos. Desde ke avli publikamente del varlik vergisi – kon demandas por oy, no solo komo una trajediya apolitika ke se eskapo sin kulpabilidad – sintí bozes de munchos djudios mansevos ke estan kuryozos.
Mozotros no mos ambezimos pratikes politikos de muestros famiyas apolitikas. Kuando avli en la televizyon del varlik el anyo pasado, la prezentadora me demando ‘kualo es tu demanda’ i estava sorprendido. No me vino al tino ke es posivle de demandar kozas del governo por muestras trajedias. No ay pratik de esto.
No sintimos mas de las memorias eskuras de las familias – solo gotas. La primera djenerasyon bive, la segunda se olvida, i lo ke la tresera se akodra es la línya ke eyos dizen. Mis diálogos kon djudiyos ke estan politizados, me mostran ke esta djenerasyon ke kere akodrarse no es chika. No semos una chika parte de la komunita. No savemos egzaktamente la prezensya djeneralmente progresiva en muestra komunidad porke las institusyones lavoran para silensyarmos i inyorarmos. Estos lavoros alesharon los mansevos de la vida komunitaria. Kuando espasios libres estan fondado, la enerjia i prezensia de ‘otros’ djudios es ineskapavle.
Lo ke kere dizir ke si sos un mansevo o una manseva (o una persona ke no se identifika kon dingun jenero), no estas solo. Estas konversasyones ke deskrivi me dan la fuersa para investigar, demandar, i produsir mas. Alora avlaremos para estar mankos solos – un akto revolusyonaryo en este tiempo de pandemia.
27/01/2021