LOS İNYETOS

(Teksto-Audio)

(Yazarı sesli dinlemek için tıklayınız)

Todos los inyetos son djoyas presyosaz para las nonas. Ke no manken son las alegriyas de kaza. Es verdad ke tomo plazer en estando kon eyos ma munchas kozas me vyene muy kontraryo.

Por empesar la kestyon “organik”. Para mi ermuera es muy emportante.

En pasadas me fui a verlos, el chiko kijo ke le aga biskochikos. Le dishe a la mosa aparejame asukar, arina, kakao etc. Fin ke fui a lavarme las manos todo estava enriva la meza, en todas las papeleras estava eskrito ORGANİK. Demandi guevos de vista me trusho un kuti la marka “gezen tavuk yumurtası”, (guevos de gayinas organik) demandi si ay vanilya,

-ya tenemos me disho la mosika

yo por shaka le dishe:

-mira ke seya organik

-a es melda yasta eskrito.

Demandi azete me dyo un bokal. Le dishe:

- esto es para salatas otro azete dame

-otro azete no se empleya en esta kaza.

En fin ya ize biskochos muy saludozos, organik i dezsavorados.

Otro diya me fui, mi ermuera lavora, dishe les azere dos tres komidikas kuando vyenen ke lo topen pronto.

La mosa me trusho un koli i me disho:

- agora vino de el chiftlik.

Yo ke avro, una papelera de safanoryas una delada otra kon el ramo, una papelera de patatas yenas de lodo, otra papelera avri, fin ke entendi ke es espinaka, aroz, makaron, frutas, manteka, kezos, dulses eskrito (sin asukar), myel, lo mas ke me vino kuryozo fin shavones organik.

Bushko sal, no esto topando, avri los almaryos sal no ay a la fin la buski a mi ermuera

-hanum esto gizando, sal no topi le enkomendare al market?

-Nooooo por sedaka! avre el sigundo almaryo ayi ay un kavanoz eskrive “kaya tuzu” de esta sal mete.

-bueno hanum

Ya lo topi, lo avri, una pyedra, tomi un pedasiko lo derriti i echi a la komida yo ke gosto el makaron se izo pitrich.

En avlando kon los inyetos kale azer muncha atansyon. No kere komer, de vista el chini se va yevar al mupak, no ay ensistir, kuando no esta la madre yo le konto una konsejika le do otras 3 köftikas. Si vamos a salir al park, se va demandar keres irte al park? si disho no, kale ke asperes el ke diga mos iremos, asperi dos oras, ya me vino esfuenyo, el va dar karar kualo se va vistir, si kere vistirse botes se va vistir botes, malgrado ke esta afuera el gardo 40…

mi ijo me enkomenda

-mama no te karisheyes deshalo lo ke kere ke se vista, el es “UN İNDİVİDUAL TYENE SU PERSONALİTA”.

Otro diya estamos djuguando me vyene un telefon avri:

-bonjour Roza ke haber”

vyene mi ijo en koryendo

-mama ke estas azyendo ?

-esto avlando kon la tant Roza

-serralo dospues avlas

ya me mareyi

-dospues te busko Roza

-yene dishites Roza”

A la fin me inyervi

-ke ay, ke me izites serrar no es verguensa

-Mama la mosa ke se salyo se yamava Roza, si oye el chiko este nombre se va akodrar se va atristar.

No paso medya ora el chiko me dize:

-nona ya saves Roza se fue, vino Luba estamos djugando maraviya,

el chiko mas meoyudo del padre.

Lo mas ermozo, fue una konversasyon de una amiga kon la ija. Mi amiga le disho a su ija :

-Hanum, Aylinika ya tyene sinko anyos, agora ke esto en mis fuersas te ayudo, aze el sigundo se engrandesen endjuntos”

La ija le respondyo

-mama ya keremos muncho sigunda kriatura, ma le demandimos a Aylinika, si kere un ermaniko

mos respondyo

-nooooo no kero

- i mozos mos ezvacheyimos

Teniya de dizirle munchas kozas ma komo ya tomi la leson de mi ijo le dishe:

-Bravo! izitesh muy bueno

Aylinika ES UNA İNDİVİDUAL TYENE SU PERSONALİTA”

Kedavos en las buenas oras.

Yazarın tüm yazıları için tıklayınız