LA VYEJA KERE BİVİR PARA MAS VER İ OYİR

Despues de un largo i malorozamente amargo invyerno  (achakes de la gerra ke mos toko al korason),  apoko apoko ya vino la primavera. Kuando vyene la primavera,  lo mas muncho ke me plaze es, ke alargan los diyas. Komo me esperto muy demprano, ay mezes i mezes ke tomo el kafe en mirando al lunar. Bendicho el dyo ya esto bevyendo el kafe en luz del diya, mirando a los arvolikos ke ya estan dando rozikas de kolores a kolores.

Kuando estavamos en los diyas de la pandemiya, estavan dizyendo kuando va eskapar, nada o va ser komo antes, todo va trokar. Yo de mi emparte no di muncha emportansa kualo va trokar, va eskapar i vamos a tornar a la vida normal.

Ma no fue lo ke pensi yo, ke fue lo ke disheron. Por empesar mos olvidimos de bezar i abrasarmos, mos olvidimos de ir a bever un kafe ande una amiga, ya mos esta vinyendo karar, kon emojis de rozas i pasharos mandar un boker tov. Mezmo las envitasyones de bodas, barmitzva i las fyestas todo kon un whatsuup. Mos auzimos al zoom i mezmo a empleyar online de los marketes i botikas.

Los enveranos en las izlas, estamos kaminando kon otobuses i taksis de elektrisite, el torno de la ada ke era kaji una ora, lo estamos azyendo en kinze puntos, por siguro ke para los vyejos moradores de las izlas no es el mezmo plazer.  Mozos semos una jenerasyon ke bivimos lo vyejo i lo muevo endjuntos, si el dyo mos da vidas ken save kualo va mos a ver mas. Ma sigun mi, keres no keres, kale auzar a lo muevo si no, no puedemos ser aktual.

Ken diziya ke kon un telefon entelijente, pizando a una tush, ivamos avlar kon la Amerika, una boda, una fyesta, mezmo un funeral lo estamos vyendo a punto en zoom. Atras 50 anyos yo no teniya telefon de kaza, fuimos ovligadas de asperar kuatro sinko anyos para ke mos venga el torno. El ir vinir a las adas era un evento. La frijider yena de vidreriya, la makina de lavar yena de kalsados, kamas, kolchas i kolchones, chantas i torbas yenas. Solo la radyo i kozas de valor viniyan a la tadre kon el balabay.

Komo troko la vida. Kuando aviyamos visto el filmo de James Bond aviyamos kedado kuryozos ke kon un boton estavan vyendo ken vino a la puerta de abasho. Agora lo tenemos en kada kaza i kuando sona la puerta vemos ken vino. Komo estos miles de egzemplos.

Troko la vida, troko i las ideas mezmo. En reunyones de mi edad las konversasyones mezmo troko.

 Al tyempo kazar kon uno ke no es de tu relijyon, era fin de mundo, era kortar kriya. Agora kuando mos avizan un espozoryo u un kazamyento demandamos

- Ken son los koshuegros? 

 La repuesta es;

-No los konoses   

 De vista ya endendemos ke no es djudyo le dizimos 

-Mazaltov, bueno ke pasen, .

Por egzemplo una si dize,

-El ijo de fulana es gay,

-No ay nada es su preferensya seksual,

-Tu ıja ya kazo?

-No, no se kazaron biven endjuntos,

-No emporta orozos ke esten,

-El ijo de no se ken, dospues de vente anyos se kito

-Si no estava orazo muy bueno izo

-Me fui a la boda de del ijo de Sara, la novya entro al kal la tripa en la boka,

- Bravo! Sara se va azer granmama...

Alegres estaremos i haberes Buenos.

Apretar al boton para ver todos los eskritos