LA PUBLİSİDAD

Al tyempo kuando un elevo gano la universita, no demandavamos ke departamento esta meldando, porke ya saviyamos u medikamento, derecho, enjenyero, administrasyon, ekonomiya, u linguas.

Oy esto demandando a los mansevos kualo meldan, mestan respondyendo unos nombres de departamentos ke no esto entendyendo, esto kedando ovligada de demandar

“en eskapando la universita kualo te vas a azer”.

Por siguro  la sensya troko muncho, mezmo un doktor enternisto tyene sus seksyones diferentes.  Antes te ivas al doktor te egzaminava de punta pye fin kavesa, te dava una kurika.

 Agora ni te toka, te eskrive  un papel kale ke pases por syete makinas i dyez analizes para ke te de un shurup.

En pasadas teniya dolor de pyernas no me plaze muncho ir al doktor ma komo no durmi noches enteras tomi randevu de un ortopedista.

Me fui, solo me demando ke es la kesha. Le di a entender, ni me toko de vista me mando al MR. Me travi MR. No le abasto kale i dopler me disho, bueno me fui al dopler no salyo nada me disho ke kale dopler de kolor i esto me ize, me disho en las pyernas no tyenes nada puedeser ke es de las venas, me mando a un doktor de venas i aya me ize syertos analizes, bendicho el dyo i las venas estan buenas.

Le yevi los raportos, me disho vate a un enternisto.

 El enternisto no topo nada, me disho puedeser ke es  del bel,

“Vate a un norolog”

 Me fui al norolog i el me dyo syertos analizes todo salyo limpyo, me demando:

“Durmes bueno las noches”

 i yo le dishe la verda:

“No durmo muy bueno”,

Pekados tuve de vista me eskrivyo un antidepresan byen fuerte i me mando a un psikolog para ocho seanses.

Aya ize stop de dolashear doktores, torni a kaza tomi un “minoset” me ize un kaviko, yasto mijor…

Desharemos la shaka Oy, la publisidad es muy emportante i por esto lo mas de mansevos estan meldando esta seksyon. Es verda kuando vemos en la televizyon un anonsyo seya de komer seya de vistir seya de limpyeza, es empresyonante, mos vamos  bushkamos akea marka. Ma envezes ya vyene demaziya, en las seriyas de televizyon, en el mas entersante luguar lo korta, aspera medya ora ke ya traye inyervos. Yo topi el punto kuando empeso el reklam me vo vazyo la makine de fregar lo meto todo a su luguar me ago dush avro la kama ya vengo djusta.

En pasadas tomi un telefon de un ombre ke no konosko ma komo se prezento muy amable i disho ke tomo mi numero de mobil de la komunidad no lo serri.

 Se dyo a konoser, el era un lavorante de una firma nombrada JB.

 Aparejaron un anunsyo en Turko ma lo keren azer mezmo en unas kuantas linguas ke estan para deperder. Komo suryani, laz, chechen i siguro en ladino.

El anunsyo lo traduizi i kaliya meldarlo en un minuto.

 Si keres merkar una kaza de la fragua JB, deskuvre i profita del model el mas avatajoso. En el proyekto panoramiko, se vende fraguas sin dingun entereso, a kuento kon presyo efektivo asta 84 meses kon alternativos de pagamyentos personales.

En el mijor sentro de Estambol, a poka distensya de la estasyon de metro, ay tipos de apartamentos  diferentos.  Vini a bivir kon mozotros kon la diferensya de una residensya.

 Vos asperamos a muestro ofis, para ver komo dezeamos de azervos propriyetaryos de una fragua, kon avantajes i al mijor presyo.

Una semana dospues me mandaron un anunsyo periodiko dizyendo:

Unesko deklaro el 21 de febrero komo diya mondial de la lingua materna. Mozos la firma JB realizimos un evento selebrado por primera vez en Turkiya, realizimos anunsyos en linguas maternas ke estan para deperdersen. La lingua materna es muestra kultura i muestra rikeza. Sigun los datos de unesko, en Turkiya tres linguas estan deperdidas i sinko estan en perikolo ke la una es Ladino. Realizimos este anunsyo en ladino, kon la ayuda de la sinyora Forti Barokas grasyas por su traduksyon.

Ke orgulyo de ser la primera en Turkiya de un evento semejante.

Apretar al boton para ver todos los eskritos