LA KANTIKA İNCH’ALLAH DE ADAMO
top of page

LA KANTIKA İNCH’ALLAH DE ADAMO



Inch’Allah es una kantika kompozada i kantada por Salvatore Adamo en el anyo 1966. Adamo eskrivio el teksto de “Inch’Allah”, komo una kantika de pas, un anyo antes la Gerra de Sesh Dias. En el anyo1993, Adamo eskrivio una mueva version de esta kantika, referando a las kreaturas de Israel, i espesialmente a los sesh miliones ke murieron en la Shoah.



La kantika fue defendida en todos los paizes arabos porke tiene sentimentos pro-israelianos, i porke esta mensionando Yerushalayim komo una sivdad judia, espesialmente despues la gerra, kuando la parte oriental de Yerushalayim kayo debasho del kontrol israeliano.



La kantika esta deskriviendo Yerushalayim, de los ojos de un mansevo evropeo ke esta viendo este payis i esta sivdad por la primera vez: un payis ferido despues la gerra, una sivdad espartida entre el Antigo i el Muevo Testamento.



Inch’llah fue orijinalmente eskrito en fransez, ma fue trasladado tambien al italiano. Para una persona aedada, la kantika akodra los anyos de sesenta i setenta, kuando el era mansevo. Para sus ijos, Inch’Allah konta las istorias de sus padres.



Inch’llah kedo komo una balada popular i konosida fin a oy. En el anyo 1993, Adamo la anrejistro de muevo, kon una version mueva, mensionando la Shoah.


Inch’Allah en arabo, sinyifika “Si Dio kere...”

El kantador esta kontemplando Yerushalayim de enriva de una roka. Esta viendo ke los pasharos se estan espantando de bolar a la otra parte, el papiyon se esta demandando si pode alkansar una roza en la otra parte, las mujeres estan pasando sus vidas kotidianas gerreyando para topar un pozo, el arvole de azetuna esta yorando porke su solombra esta kayendo enriva del territorio enemigo.


El kantador esta viendo komo Yerushalayim esta sufriendo: el kamino fraguadro kon sufriensias. El esta oyendo el ‘rekuiem’ por los sesh miliones ke murieron en la Shoah, i esta viendo los sesh miliones de arvoles ensembrados en la arena del dizierto.


La balada Inch’Allah no podiya ser mas mijor senkronizada: una kantika profetika de la gerra de los sesh dias en el otonyo del anyo 1967: la gerra ke libero Yerushalayim enteramente, i kuando Yerushalayim kayo kompletamente en las manos de Israel.


Bizi Takip Edin
  • Facebook Basic Square
  • Twitter Basic Square
  • Google+ Basic Square
bottom of page