LA DALKAVO MANEVRA DE ABBAS

(Teksto-Audio)

(Yazarı sesli dinlemek için tıklayınız)

El prezidente de la Otoridad Palestiniana Mahmud Abbas (Abu Mazen) kontinua a dizir mintiras para konvenser sus donatores etranjeros ke su uniko dezeo es de fondar un payis independiente para sus sujetos arabos ke se topan de debasho de okupasyon, achakito para salvarse de la opozisyon grande ke se dezvelopa kontra el en los teritoryos palestinianos después ke el dechidyo de atadrar las eleksyones de prezidensya i del konsilyo lejislativo. El pretende ke Israel no permetiendo a ke los arabos biviendo en el este de Yerushalayim a partisipar a estas eleksyones i ansi se siente forsado a anularlas por la ora. Abu Mazen inyegador de la Shoa, inimigo de Israel, yeva una politika ke le permetyo de estar en poder dezde mas de 15 anyos i kada vez ke le demandan de renovelar las eleksyones sea por la formasyon Fatah a la kuala el apartiene, sea por Hamas estabesimineto islamisto de Gaza, el kual es su inimigo mortal, bushka i topa achakitos para no azerlas.

En akuzando Israel de no permitir a ke los arabos de Yerushalayim vaygan avotar, le paresyo, ke es un buen argumento para atadrar las eleksyones. Ma la kaye palestinyana no es bova i la mueva jenerasyon de politisyanos en mayoriya buenos edukados no achetan este refuzo i kondanan Abu Mazen de ser enganyador. En realita el governo israeliano no dyo en dinguna manera su avizo a este sujeto. Ademas de los 300 mil arabos biviendo en Yerushalayim i teniendo la karta de identidad israeliana, los elijidaos de entre eyos ke poderan votar poden fasilmente pasar la linya i ir a votar de la parte palestiniana, en los kazales arabos serkanos de Yerushalayim sin ke seygan kastigados. En la vida de kada dia eyos no nesesitan permisyon de las otoridades israelianas para renderse a los kazales vizinos sometidos a la otoridad palestiniana. De otra parte los de Yerushalayim no representan ke manko del 7 por sien de los palestinianos de Yehuda i Shomron i Gaza situasyon ke no pode impedir las eleksyones ke Abu Mazen avia dechizado ke tengan lugar el 22 Mayos de este anyo. De ke, Abu Mazen fikso la data de la eleksyones, no se vido un grande intereso de la parte de la povlasyon araba de Yerushalayim a ir a votar, solo unos kuantos residentes por lo mas politisianos aktivos se enteresaron deklaro la jurnalista palestiniana madre de kuatro kreaturas Nadia Harhash a su kolega del ‘Jerusalem Post’. Rezidente de Yerushalayim la sinyora Harhash ajusto ke la mayoriya de los arabos de Yerushalayim en todo kavzo no tienen intinsyon de ir a votar el las eleksyones palestinianas i mizmo si partisipan sus votos no azeran dinguna diferensya al resultado.

No se save si Abu Mazen era sensero en keryendo azer eleksyones, porke si esto es el kavzo el devia demandar de la Union Evropea i de otros manaderos internasyonales garansiyas de forsar Israel a achetar a avrir postos de eleksyones al enterno de Yerushalayim antes ma no despues del anunsyo. Los analistos politikos palestinianos topan esto muy kuryozo i ajustan ke pode ser ke el lo izo esto intansyonalmente, ke su buto era de kalmar los donadores evropeos i de impresyonar la mueva administrasyon Biden.

Koza ke no fue visto kon un buen ojo de la parte de los politikos evropeos ke miraron a ke ayga eleksyones. Eyos mostran sus deskontentes en frente de la politika palestiniana dirijida por la vieja jenerasyon pudrirá ke no mira ke mas ke sus interesos partikulares. La dechizyon de atadrar estas eleksyones se pensa ke va konprometer el kalmo egzistente aktual entre los palestinianos de una parte i kon Israel de la otra. Se aspera a la fin del Ramadan atakos teroristos de la parte del Hamas i del Cihad islamiko. Tsahal (la armada de defensya israeliana) se apronta para dar repuesta komo es de uzo. Bien entendido para los inimigos de Israel esto va ser una buena okazyon de akuzarlo una vez mas de ser rasisto i mizmo nazisto, de kerer atakar kon una grande fuersa a los povretikos(!) echadores de roketas i balones de fuego sovre Israel o de matar israelianos sin razón en aksyones teroristas o azer danyos a los djudyos de Yerushalayim komo fue siempre el kavzo.

El rezultado de esta manevra politika de Abu Mazen, de atadrar las eleksyones, a mi sentimiento, es de kerer arestar a ke los futuros elijidos al konsilyo dechizados de meter fin a su dirijensya otokratika sean kapache de destrinarlo. Sus adversaryos komo los del Hamas i mizmo komo los de su propyo partido Fatah ke esta kaji divizado, son konvesidos de no dechar mas el kampo libero a la pudridura aktuala de la administrasyon i de poder inflijir esta ves sus ideas.