KUENTOS MODERNOS DE DJOHA IX

PRIZYON

Savech porke Djoha fue kondenado a 13 anyos de prizyon?

En vijitando la Polonya Komunista de los anyos 1950 Djoha se permityo de dizir en publiko ke el ministro del komersyo del payis era ‘tonto’. Durante su djuzgo el fue akulpado de 3 anyos por aver insultado al djuzgador i de 10 anyos por aver kitado en medyo un sekreto de estado!

***

ESPANTO DE MURIR

En la medya edad un astrologo djudyo avia profesado al rey de Espanya ke su favorita se va murir en poko. No paso 3 semanas la donzea se muryo. Al rey le entro punchon i ke le paresyo ke es el ke la mato kon su majia. Lo yamo i le demando: “ Kuando pensas ke tu te vas a murir?”

El astrologo se pensó i suspechyo ke el rey lo va matar le dize:” La verdad no se kuando me va murir, ma lo ke se ez ke el rey se va murir 3 diyas después de mi.”

***

KARNE MOFISIDA

Djoha se lo yevaron delantre del djuzgador por aver vendido karne mofisida. Djoha mira de salvarse i dize:” Sinyor djuzgador es ke será posivle de remeter mi djuzgo a la semana ke viene?” El djuzgador:” por ke?” Djoha :” Porke me esta paresyendo ke su eminensya no esta oy de buena umor !”

***

GANAR EL DJUZGO

Djoha se topo akuzado por su konkerente vizino de butika en Lewinsky el sinyor Bohorchi. El procheso devia tener lugar en serka. Sovre esto Djoha le demando a su avokado si podía mandarle un regalo al djuzgador. El avokado le respondyo en dizyendole:” Pursedaka no agas esto, por ke ay risko de perder el djuzgamiento i además podeser ke te persigan por kerer dar a ’komer’.”

Un mez despues Djoha gana el proseso sovre kualo su avokado orgolyozo de su sukseso le dize:” Vites sinyor Djoha tenia razon de deskorajarte de mandarle un regalo a djuzgador.” Djoha:” ma yo se lo mandi.” El avokado enkandado: ‘Komooo komo le mandates regalo?” Djoha:” Si ma kon la karta de vizita de Bohorachi!”

***

LA KRIZA

Se toparon en medyo de un kriza ekonomika fuerte. Djoha i sos 2 konkerentes Eliya i Sinyuru ke tenian sus butikas de kada parte de la de Djoha peryendo esperanza un dia Sinyuro metyo una pankarta’ Soldos a 30%’ i Eliya al otro dia metyo su pankarta ‘Soldos a 50 %’. En riva de esto i Djoha de su parte metyo su pankarta’Esta es la entrada’.