top of page

KREER EN MİRAKLOS





Yo kreyo muncho a los miraklos, tengo munchos egzemplos. Alora vos kontare una istorya talmudik ke la tengo meldado en un livro.


En una ora byen tadre de la noche, un otobus toma kamino de Tel Aviv a Yerushalayim. Unos de los pasajeros estavan durmyendo, otros despasensyados por arivar a sus kazas una ora mas antes. Komo era una ora byen tadre de la noche, los kaminos estavan asolados i oskuros. El shofor kansado de ir i vinir este kamino diya entero, estava byen atantivo en konduizando ma estava orozo ke es el servisyo de alkavo i pensando ke va arivar a su kaza i va reunir su famiya. Apenas una ora ke tomaron kamino, un vyejiziko kon barva blanka salyo delantre del otobus dizyondole al shofor kon las manos de kedarse. Siguro el shofor kuryozo areto el otobus. Todos los pasajeros en panik, ken kijo abashar ken kon espanto i ken dizyondele al shofor ke tome kamino. El vyejiziko insistyendo i gritando estava demandando piyadades. El shofor ovligado kedo de konduizir i avyo las puertas i le demando

-Ke keres estas oras de la noche?

El vyejo kon una boz triste le respondyo

-Ay un hazino muy perso, aki no ay ni doktor ni ospital si asperas unos kuantos minutos lo va trayer al hazino kualo ay no tomes kamino fin ke vengo.

Todos los pasajeros kuando oyeron la razon le disheron al shofor no ay remedyo devemos de asperar. El shofor ke ya estava byen kansado metyo la kavesa enriva la direksyon, disho a lo manko fin ke vyene el hazino me durmere ke repozen mis ojos. Paso medya ora, una ora, dos oras, ya amanesyo, ni el vyejo nosta por enmedyo ni el hazino ke disho, no ay ken venga, a la fin los pasajeros se desesperaron i fueron a dizirle al shofor ke se desesperte i ke tome kamino. Lo yaman, lo meneyan, el shofor no sesta despertando. Malorozamente el povereto ya estava muerto.


Kuando amanesyo los pasajeros ven ke ande estan no ay ni kazas, ni moradas, ni personas, ni arvoles mezmo.


Si Dyo no mandava a este vyeziko mallah, el shofor en konduizando se iva murir i en mezmo tyempo iva kavzar la muerte de 40 personas ke estavan en el otobüs.


En estos diyas aleskuros i tristes ke estamos pasando, rogaremos al Dyo Santo ke aga un miraklo, ke salve a los ke estan bivos debasho de tyerra, ke ayude a los ke se salvaron i ke seya el dalkavo dezastro. Mas no teneremos oras malas baruh dayan a emet a los ke muryeron i pasensya a los ke kedaron.

















Comentários


Bizi Takip Edin
  • Facebook Basic Square
  • Twitter Basic Square
  • Google+ Basic Square
bottom of page