KİTA BUENO DE LA BOKA

(Teksto-Audio)

(Yazarı sesli dinlemek için tıklayınız)

Ay unos kuantos anyos ke ay una moda de reiki, fengshui, yoga, pensamyentos negatif, pensamyentos pozitif etc.

Yo nunka no me ondei a estas kozas ma komo me plaze ambezar, munchas vezes me fui a konferensyas i semineres a este sujeto i desidi ke en la Tora egziste todo modo de moral, de filozofia i eksplikasyones maraviyozas. En mi chikes, kuando aziyamos planos para el diya de amanyana, mi madre mos dizia “si kere el dyo”, si avlavamos una koza negra “kita bueno de la boka”.

Kijo dizir ke negatif i pozitif no es koza mueva.

No so relijiosa ma me plaze las tradisyones. Achakes de las tradisyones se aunan las famiyas. Syempre digo, bueno ke tenemos la noche de shabat. malgrado ke mis ijos lavoran en ofisyos diferentes. Munchas vezes no vyenen.

El ijo grande tiene un grupo de muzika rock ke se yama DUMAN, una noche de moed puede estar en Berlin en Trabzon en Ankara. El chiko lavora en una estasyon de radyo ke ayi no ay ora porke lo prezenta en bivo. Primeros tiempos mos embarasava ke los ijos no estan en la meza. Agora yame auzi, esto es sus echos, sanos kesten, echos buenos ke tengan, kuando pueden ke vengan. Kuando estamos endjuntos kada diya es moed. El esansyel es ser buena persona i ayudar al ken tyene menester.

Dizyendo ayudar me vino al tino esta konsejika.

En una sivdad, biviya un ombre muy prove. Ande metiya la mano se dezaziya. En la mezma sivdad biviya un otro ombre muy riko ma muy eskaso. El riko, un dia, desido de trokar kaza. i tuvo menester de un portador para transportar los mobles. le rekomandaron al hombre prove, para ke gane dos tres groshes. El prove ke oyo ke ay un echo, se fue en koriendo ande el riko, le disho ke esta pronto para ayudarle.

El riko komo era muy eskaso le dişo al prove:

- Mira! yo paras no te do

-Komo sinyor? Debaldes va lavorar?

-No… yo te va dar 3 konsejos buenos ke te valir muncho en tu vida

El prove, povereto penso i disho desi parasi,

akseptare puede ser un konsejo de el, me aze hayre

i acheto.

Se fue a la kaza, arekojyo todo, tomo las kufas bien pesgadas, yena de vidros i kristales presyozos i empeso a suvir las eskaleras de la kaza mueva.

Kuando vino al treser etaj, el riko le disho;

-ya vino la ora de darte el primer konsejo oyeme bueno:

si te dizen ke el riko i el prove es la mezma koza, no te kreyas

- esto ya se save sinyor…

Pensando ke los otros dos konsejos le puede aprovechar, tomo las kufas se las echo al ombro i empeso a suvir. Kuando vinieron al sinken etaj el riko le dişo oyeme:

-si te dizen ke el arto kon el ambierto es la mezma koza no te kreyas

- esto ya se save sinyor.

Kon esperansa ke el treser konsejo le va valir tomo las kufas i empeso a suvir las eskaleras dalkavo. Kuando vinieron al syeten etaj, muerto de kanserya, ariento la sudor, el riko le dişo:

-agora ya vino la ora de darte el treser konsejo oyeme:

si te dizen ke lo preto kon lo blanko es la mezma koza no te kreyas.

El prove mas no puido rezistir. Kon una birra da una punta de pye a las kufas i las echa de las eskaleras abasho. Todo se rompe i se aze sal i siniza.

El riko no topo de pensar gritando kon inyervos:

- Ey!!! ke izites loko sos?

El prove le respondyo en fuyendo:

-Sinyor! Si le dizen ke en las kufas kedo un vidro sano ke no se kreya.

Yazarın tüm yazıları için tıklayınız