KERER ES PUEDER

(Teksto-Audio)

(Yazarı sesli dinlemek için tıklayınız)

Yo kuando era chika, tenia un dezeo. Me va engrandeser i me va azer profesora. De la ora ke empesi a la eskola primera, me meti a imitar la profesora de la klasa. Tornando a kaza de la eskola, me metiya los antojos de mi papa, tomava una vara en la mano, enderechava en rango todas las almadas ke aviya en kaza i me metiya a ambezarles lo ke me ambezi akel diya.

Munchas vezes komiya una buena saparta de mi madre porke dezordonava la kaza i munchas vezes la de mi nona, porke en aharvando las almadas, saliya polvo.

Kuando pasi a las klasas superioras, aparte ke me arepinti de aharvar las almadas, entendi ke este ofisyo no es muy fasil.

Malgrado esto, los enveranos, para tener un poko de harchlik, dava lisyones a los elevos mas chikos de mi ke avian kedado a egzamenes de reparasyon. Estas lisyones turaron fin ke kedi yo mezmo a la semejante situasyon onde fue menester ke i yo tome lisyones.

En siendo eleva dos lisyones me azian muncha pena. La FİZİKA i la KİMİKA. No me plaziyan, ma no me akordo porke no entendiya deke no me plaziyan. Lo ke me akodro es ke kada anyo kedava de estas lisyones a la reparasyon i estudyava enverano entero para poeder pasar la klasa. Un anyo en los egzamenes de reparasyon no reushi i kedi en klasa. Malorozamente akel anyo no fui kapache de reushir en los egzamenes de estas 2 lisyones i tomi una desizyon muy radikala, deshar la eskola. Muy kuryozo, mi famiya no me protesto por esta idea. Kreygo ke penso, en akel tiempo, ke eskapar una eskola de ocho klasas i saver un poko de fransez ya era bastante para una ija. Me guluzuneyi a lavorar i ganar paras, merkarme lo ke kero.

Me topi un echo en una sosyedad de segurita onde lavoravan 10 ijikas de mi edad. Atorgar ke pasi los mas ermozos diyas de mi vida.

En mezmo tiempo fue una buena eskola para mi, por siguro sin FİZİKA i sin KİMİKA. Entremyentes me espozi, me kazi tuve 2 ijos i esto sin entender los anyos pasar.

Un diya, en avlando kon una amiga muy presyoza, Sara Penso, ke malorozamente la peryimos muevamente, la enviti a tomar un kafe i eya me disho ke esta muy okupada porke esta aparejando egzamenes i ke kale ke estudye. No topi de pensar. Ke lisyones, ke egzamenes a esta edad. Eya ya vido ke me enkanti i es ansi ke empeso a darme a entender.

-Forti ! esta mueva ley ke salyo me se izo un kompleks muy grande

- ke ley salyo??

- no tyenes haber? La primera eskola se izo 8 anyos

-ya tengo haber ma ati ke te sale?

-agora tu i yo semos “ilkokul mezunu”(diplomadas de eskola primera)… esto no me yakisheya ni ami ni a ti. Amaniana es el diya dalkavo de inspriksyon. Va presto adresate a las inskripsyones, toma los livros i entra a los egzamenes, gana los kreditos para resivir la diploma de lise.

-ya estas en ti Sara? Yo va tomar diploma de lise a estos anyos?

-para meldar no ay edad

-kuando va empesar kuando va eskapar?

- empesar es medyo eskapar, amanyana demanyana bushkame te dare las enformasyones ke son menesterozas…

Torni a kaza me vino un penseryo, dishe de mi parami ke me kosta de aprovar. Al diya sigyente de vista, fui a las inskripyones, inchi los formularyos i eskoji las lisyones de literatura,( orozamente ke no era ovligada de tomar las lisyones de FİZİKA i de KİMİKA) tomi los livros i en supito me topi estudyando istorya, literatura, filozofiya i mas.

Me vino un yugo, kada diya despues de eskapar mi echo de kaza, de asentar i de estudyar. Komo lo estava aziendo kon muncho plazer no entendi komo pasaron los diyas. En fin vino el tiempo de los egzamenes, kon grande veluntad kompleti los kreditos i tomi la diploma de lise.

Malgrado ke ya paso anyos ke tomi la diploma, en kada ves ke ay menester de inchir un dokumento, ande demandan el nivel de “edukasyon”, yo marko kon un grande orgolyo el kariko onde esta eskrivyendo

“L İ S E.”

Te rengrasyo SARA PENSO, ganeden bueno ke tengas.

Yazarın tüm yazıları için tıklayınız