ISRAEL ARMA LA EVROPA I SIERTOS PAYIZES ARABOS.

(Teksto-Audio)

Una otra reuchita de Israel, este chiko payis del Medyo Oriente, ke poko antes fyesto su 75e aniversario es uno de los payizes ke produze armamiento defensivo de alta kualidad. El ampeso en pasadas a vender, armamiento sofistikado para defensya aeronotika, el famoso ‘Arrow 3’ a la Alemanya Federala de un valor de 4 miliardas de dólares. En despartes munchos otros payizes de la Unyon Evropea interesados a defenderse despues ke la Rusia de Putin atako a la Ukrania se meten a la kola para resivir misiles anti-misiles de Israel. Para darvos un echemplo, en los dos dalkavos mezes, vos dire ke la Finlandya merko el sistema de misiles ‘David sling’ i la Hollanda el echador de roketas ‘Puls’ kon sus roketas.

La semana pasada el Ministaryo de la Defensya deklaro a la prensa ke durante 2022 Israel vendyo un montante rekor de 12.5 miliardas de dólares de armamiento a diferentes payizes del mundo, lo ke reprezenta una pujita de 120 % sovre los dalkavos 15 anyos. Las istatikas del Ministaryo mos dan a entender ke el 29 % de las vendidas fueron echas a los payizes evropeos, i ke el 24 % a los payizes de los akordos de Avraam (Emirates, Bahrain i Marroko). Estas vendidas son muy importantes visto ke Israel de punta de vista relasyones bilateralas se enrezya muncho en la memoria del publiko ajeno i ademas eyas dan la posibilitad de krear i de dezvelopar muevo armamiento nesesaryo a la defensa del payis, ke dezde su fundasyon se topa en estado de gerra.

Ken se lo pensava antes 70 anyos ke Israel, un dia será entre los lideres del armamiento mundial, este chiko payis oy de 10 milyones de almas, ke a su fundasyon komo estado djudyo vendia solo portokales Yaffa i de ves en kuando plomos Uzi. Este aboltamiento de situasyon, en partikular kon la Alemanya es importante i mos aze pensar profundamente el pasado terrivle entre los djudyos i los alemanes, ke son inimigos de ayer i amigos de oy. Para defender los pozos de gaz en el mar Mediterraneo Israel merko submarinos kon kapachitades nuklearas de la Alemanya, ma por kontra le vende oy ekipamiento de defensya aeronotika, menos de un siglo de pasado de la Shoa. Ansi se espera ke grasyas a su grande kapachita en el kampo de la technolojiya inovativa i de sus reservas de gaz Israel en poko tiempo será visto diferamente en las kanchilerias evropeas, i ke será konsiderado kon mas grande amista.

Oy no ay duvda las relasyones entre Israel i los payizes arabos se amelyoran de dia en dia i se aspera muevos rekonosimientos de la parte de los payizes muzulmanos una vez ke la Arabia Seudita lo azera. De otro lado la Turkiya potensya jeopolitika de la rejyon desidyo finalmente a establisir komo en el pasado, buenas relasyones kon Israel en mandando su ambasador. El prezidente Erdogan i su ekipo sovre la enfluensa de la doktrina de los Ermanos Muzulmanos durante kaji 10 anyos pasados se deklararon pro Palestinianos i rompieron los pontes de amistad kon Israel en akuzandolo sin razon de rasizmo, imperyalizmo i mas. Oy visto el entereso ke el gaz reprezenta para la Turkiya i espesialmente el demenester de technolojia alta ke ayudara a transformar la grande industria turka, ke salvara a su torno la enflasyon kronika egzistente, Erdogan mira de estar en buenos termos kon Israel. Es ke un diya se pode ver la mizma atitud de la parte de los mollahes del Iran? No mos alvidaremos ke el Medyo Oriente istorikamente es el lugar de los mirakolos.

En rezultado Israel tiene la kapachidad de dar a un grande nombre de payizes del mundo lo ke nesesitan, empesando de los sistemas de defensya, asta los de la irigasyon i de transmitir las inovasyones medikalas para amelyorar la vida del umano. Esto eksplika el adelantamiento aktual i importante en sus relasyones diplomatikas malgrado los entrompesos ke le son echos en las Nasyones Unidas. Sin duvda los akordos komersiales, las vendidas de armamientos, la kooperasyon technolojika i el kambyo de intelijensya tienen un grande impakto sovre el prestijyo de Israel en la shena internasyonal i oy se siente ke se dize en esta shena, ke es un payis demokratiko, adelantado i fuerte.

101 Kuentos Modernos de Djoha-Dr. SELİM YEHOSHUA SALTİ

Buy Now

Apretar al boton para ver todos los eskritos