(Teksto-Audio)
(Yazarı sesli dinlemek için tıklayınız)
Komo esplikar la diferensya entre el diskorso ramay i inimigo de los dirijentes palestinianos enverso Israel i de la otra parte la kolavorasyon de sekuridad ke se mantiene entre las dos partidas dezde los akordos de Oslo. Difisil de entender esta politika ke nunka ayudo i ayudara a ke ayga buenas relasyones de vizindado entre los djudyos i los arabos palestinianos.
Oy, los yamamos arabos palestinianos porke kon la konkista de Yehuda i Shomron i de Yerushalayim por Israel, Arafat dezesperado miro de dar un titro nasyonalisto a los arabos ke kedaron a bivir en los teritoryos aktualmente en pleto. Koza ke le reucho i ke fue adaptado por la mayoriya de los payizes del mundo. En realita no ay kaji dinguna diferensya de etniya entre el arabo siriano, irakiano, seudito o jordanyano kon el palestiniano. Por esta razón a ma umilde opinyón komo nunka egzistyo un payis independiente palestiniano todo modo de arabo ke es dezirozo de yamarse palestiniano lo pode, si mizmo este kalifikativo no tiene dingun sensyo en realita.
El arabo del Medyo Oriente es el arabo de orijin semitika en mayoriya de relijiyon muzulmana. Una ves dado a entender este fakto, sovre la tradisyon jenerala, el djudyo i el arabo se estiman primos. Dunke deke ke se agan la gerra por un chiko territorio onde los djudyos establisyeron durante un sieglo sus unika patriya, Israel.
Las luchas para destruyir Israel no dyeron dingun resultado fin oy en dia i no darán visto ke los djudyos en Israel se establisyeron por la eternidad. No sera fasil de agora en delantre para azerle la gerra , por ke el tiene al seno de los payizes arabos mizmo lechanos aliados. Por esta razón difisil de entender las echas ipokritas de los dirijentes palestinianos a los kualos los israelianos achetaron de darles siertas partidas del teritoryo ke konkistaron en 1967 kon los akordos de Oslo. La retorika inimiga i mala de La Otoridad Palestiniana krea un ekivoko sovre la manera ke eya se komporta en el terreno en kolavorando positivamente en las kestyones de seguridad.
Munchos diplomatos i mizmo palestinianos serkanos de la Otoridad se demandan komo pode egzistir semejante situasyon. Para darvos un echemplo en pasadas uvo un insidente onde 2 israelianas de ayedad medyana kon sus oto, por yerro entraron al kampo de refujiados, famoso por ser danjorozo, Al Ama’ri serka de Ramallah. El kampo es konsiderado ser un sentro de teroristos palestinianos onde siertos grupos se opozan al Fatah i al prezidente Mahmud Abbas. Mizmo las fuersas palestinianas de segurita se detienen de entrar al kampo por no tener trato kon los grupos teroristos. Kuando la novela se sintyo ke las 2 mujeres se peryeron i están en perikolo de ser matadas, las fuersas palestinianas entraron al kampo, oras de tadre, las toparon i las entregaron a Tsahal prezente serka del kampo.
Komo se save, es defendido para los israelianos de entrar en la zona A kontrolada solamente por los palestinianos. Uvo munchos kavzos semejantes a akel de las 2 israelianas, ke kedaron en sekreto, por la razón ke la Otoridad palestiniana no kere publikamente ser embarasada i dar la empresyon de ser kolaboradora de Tsahal. Espesialmente no dar la posibilita de enchular la fama de Abbas por los de Hamas, del Djihad Islamiko i del Iran akuzandolo de ser el moso de Israel. Ma Abbas tiene un grande intereso a kolavorar kon Tsahal visto ke sin el ayudo de Israel los teritoryos kontrolados por el Fatah supito podrán pasar debasho de la influensa del inimigo komun el Hamas.
Presizamente este entendimiento inevitavle entre las 2 partidas, mareya muncho los israelianos i siertos palestinianos ke no intienden la intensyon negativa i inimiga de la politika echa por la Otoridad al nivel mundial kontra Israel. Duna parte kolabora, de la otro se kesha i akuza Israel de kerer etnikamente destruir los arabos, de kometer aktos kriminales de gerra, de mirar de aronjar a los moradores arabos de Yerushalayim i de judaizar la sivdad. Komo de politika es de una parte mandar sus ministros i su personal ofisial a tratar kon los ekivalentes israelianos, i de la otra tener una retorika inimiga kontra Israel.
No se entiende ansi si La Otoridad es amiga o inimiga de Israel. La atitud ipokrita de la intelijensya palestinyana apoya a ke Abbas kede en poder i para mentenerse ke resiva de los Estados Unidos, de la Evropa i de los payizes muzulmanos, el ayudo ekonomiko sin el kual la Otoridad peryera todo el intereso egzistente en la kaye palestiniana. Este statua konviene mizmo al Hamas ke su buto prinsipal es de derokar Israel. Sin duvda, kuando konviene a tener pas en sus territoryos las dos entitades mostran un jinero de kolavorasyon aktiva kon Israel, si no al kontraryo mostran ke sus buto final fue i será de nunka azer la pas kon el establesimyento sionisto.