ESKE EL ANTISEMITIZMO ARABO PODE DESPARESER?

(Teksto-Audio)

(Yazarı sesli dinlemek için tıklayınız)

Malgrado ke los dirijentes palestinianos no mankan dinguna okazyon de manifestar sus inimistades enverso del puevlo djudyo, estos dalkavos mezes se ven kambyamentos entre los arabos de Israel i akeyos de los payizes ke afirmaron los akordos de Avraam.

A la okazyon de la komemorasyon de la Shoa uvo deklarasyones de siertos politikos i akademikos arabos ke finalmente achetan la realita istorika de la trajedia ke los djudyos bivieron durante la Segunda Gerra Mondiala. Por kontra los dirijentes antisemitos palestinianos no mankaron de deklarar kon umor ke el Olokosto es un buen model para matar mas djudyos.

Fina poko antes, avlar del Olokosto pratikamente era taboo en el mundo arabo. Dainda oy en diya munchos manaderos de la medya refuzan de tratar el sujeto i esto es muy komun. Para munchos de eyos la komedia falsa del Olokosto es un djugo enventado por el puevlo djudyo i espasialmente por Israel para justifikar la prezensya de los djudyos en tyerra de Kanaan. En Egypto i en los payizes del Golfo fueron publikados sienes de livros ke dainda se venden en todas las butikas bibliotekaryas del mundo arabo onde se inyega el jenosido nazisto.

En la anyada 2009 la Universidad de Haifa avia echo una enkuesta sovre la kuala el kuarto de los Arabos israelianos inyegaron el Olokosto. Ademas basta de echar un ojo en Twitter o en Facebook onde se pode topar miles de resultados ke deklaran ke el Olokosto es una piesa metida en chena de la falsedad de la Shoa. Ke esto es un elemento de propaganda djudyo espandido en el mundo entero. No se deve kreer ke los alemanes mataron 6 miliones de djudyos. Los pokos aktivistos arabos ke miraron a dar a konoser el Olokosto i de azer vijitar a la manseves araba israeliana los kampos de la muerte fueron kondanados por la opinión araba komo kolaboradores de la propaganda israeliana. El mijor echemplo fue en 2014, la vijita de Auschwitz por el Profesor Muhammad Dajani de la Universita Al-Kuds kon un grupo de 27 estudiantes el kual fue tratado de kolaborador, inimigo de la kavza palestiniana por los aktivistos palestinianos.

Ma la situasyon ampesa a trokar en estos dalkavos anyos, después de la sinyatura de los akordos de Avraam. Antes un anyo una egzibisyon permanente del memorial del Olokosto, por la primera vez en el mundo arabo, fue inogurada en Dubai kon testimonyos de los sovrebivientes, fotos i objektos de akel tiempo. Es ansi ke este anyo el dia de la ‘komemorasyon’ fue markado en munchas sivdades del mundo arabo, de Manama a Abu Dhabi i a Rabat. La ambasada amerikana en Kairo finanso en partida la primera ‘ofisyal komemorasyon’ del Olokosto en Egypto, evenemento ke no se asperava antes poko tiempo. En el anyo 2020 el sekretaryo jeneral de la Liga del Mundo Muzulmano Mohammad al-Isa se yevo una delegasyon kompozada de lideres relijiozos muzulmanos a Auschwitz, los kualos repetaron los biervos “Mas No” en azyendo orasyones en memorya de los 6 milyones de viktimas djudias.

Este anyo una grande delegasyon de mansevos arabos israelianos partisiparon a la ‘Kaminada de la vida’ en Auschwitz koza ke se esplika ke en las eskolas los elevos arabos resiven korsos sovre la Shoa. Ma komo disho Jalal Banna, eksperto de las kestyones arabas i eskrivano, las otoridades del governo israeliano no azen a bastansa la promosyon del Olokosto entre los sivdadinos arabos. El Olokosto dize el sinyor Banna fue un evenimineto umano, no solo djudyo i por su puesto no solo israeliano. En apatronandose el kavzo enteramente, Israel kreye un antagonizmo. El ajusta, la situasyon en los territoryos de la Otoridad Palestiniana es muncho mas mala. Visto ke en los livros de eskola nunka se inkluo o se mansyono el Olokosto, koza ke la opinión publika lo konsidera komo mintira.

Malgrado todo se ve trokamientos positivos en siertos payizes arabos sovre la kestyon de la Shoa. Ma kon esto, Israel , el memorial Yad Vashem i otras organizasyones ke tratan el sujeto tienen dainda un grande lavoro para dar a entender, a mostrar i a ensenyar el Olokosto no muncho lechos de kaza, ma en Israel mizmo i en los territoryos kontrolados por la Otorita Palestiniana.

Yazarın tüm yazıları için tıklayınız