El livro de Miguel de Cervantes, ‘’Don Quijote de la Mancha’’ ke es uno de los mas emportantes livros de la literatura espanyola, fue publikado a la fin del diisejen siglo.
En un artikolo de Aki Yerushalaim, Moshe Shaul esta dizyendo ke segun algunos eskridores, ‘’Don Quijote de la Mancha’’ se puede entender mijor si akseptamos ke Cervantes era konverso.
Komo lo savemos, duspues de la ekspulzyon de los judyos de la Espanya en 1453, munchos judyos se konvertyeron al kristyanizmo para pueder savlar. Ma, los vyejos kristyanos los defendyeron de entrar a la armada, a los orden relijyozos, i de tomar profesyones ke keriyan. Para tomar estos postos, kaliya provar ‘la pureza de su sangre’. Los konversos se puediyan azer solo medikos, komersantes, administratores i kolektores de taksas .
El padre de Cervantes era mediko, lavoro vente anyos komo kolektor de taksas i fue arestado en la Engizisyon. Esto mos esta azyendo suspektar ke era konverso.
Segun el Profesor Leandro Rodriges, el livro de Cervantes esta reflektando los sentimentos de revolta i de protesta de los kristyanos muevos enverso la sosyedad mueva del diisejen siglo.
En el livro, Don Quijote esta dizyendo ke el biviya en un kazal de la Mancha i ke no se esta akodrando el nombre del kazal. Los konversos teniyan espanto ke un vizino los puediya dar en mano i puediyan ser investigados por la Engizisyon.
Rodrigez esta dizyendo ke Don Quijote teniya una mancha i no puediya provar la limpyeza de su sangre.
Segun Rodrigez, Cervantes nasyo en Sanabria (ande biviyan munchos judyos i konversos) ma el eskondyo el nombre del lugar de su nasimyento komo lo aziyan los konversos, para ke no ayga en las manos de los enemigos sinyos para akuzarlos por ser konversos.
En su livro, Cervantes esta dizyendo ke la djente ke el rankontro en su kamino, avlaron de la ermozura de Dulcinea, malgrado ke no la vyeron i no la konosen. Segun Rodrigez, Dulcinea es una metafora de ‘Shehina’ ke es la prezensya divina en la relijjyon judiya.
Aparte de Rodrigez ke afirmo kon detalyos la identidad judiya de Cervantes, ay munchos otros investigatores ke estan pensando ke Cervantes desho munchos sinyos de su persanaladid judiya.
El Profesor Brown ke izo munchas investigasyones sovre la Engizisyon, esta konsiderando el livro de Cervantes komo uno de los livros de la persekusyon ke esta deskrivyendo las vengansas kontra los judyos en la istorya.
Segun el Profesor Brown, en el livro, la kritika de Cervantes kontra la Engizisyon, su kritika de la forma del kompartamyento de la Engizisyon puede ser de las memoryas de Cervantes. Prof. Brown esta dizyendo ke no puediya aver pozisyones pozitivas por los judyos en el livro, por modo de la atmosfera negativa kontra los judyos en akel tyempo.
Es muy seguro ke el livro esta reflektando la kritika del kompartamyento de la sosyedad espanyola de akel siglo kontra los konversos ke eran ovligados a tener una doble vida en una atmosfera de espanto de kayer en las manos de la Engizisyon.