ES KE LOS ROBOTES VANA TOMAR MI ECHO DE LA MANO EN EL FUTURO?

La kestion, ‘’Es ke los robotes vana tomar mi echo de la mano en el futuro?’’, es una kestion muy real i muy espantavle par munchas personas. Lo ke los preokupa no son los robotos fízikos, sino la Intelijensia Artifisial. Todos los echos fizikos monotones i rutineros vana ser echos por brasos robotikos i ansi mas presisos. Tambien ya se save ke echos mas komplikados, komo konduizar, vana ser realizados por robotes. La verdadera kestion es: Kualo va ser kon los empleos ke keren abilidades i konosimientos espesializados en la ekonomia dijital? Por egzamplo, kualo va ser si so mediko? Es ke los robotes me vana kitar del echo? O si so enjenior?

En primero kale entender ke la Intelijensia Artifisial es el ambezamiento otomatiko. El ambezamiento otomatiko es la kapasidad de ansenyar a una makina a rekonoser kalupes i realizar echos semplos komo rekonoser una sinyal en una fotografia, determinar el artisto de una kantika, azer una pintura o eskrivir una nota muzikal.

La Intelijensia Artifisial Jeneral es la kapasidad de una komputadora para azer absolutamente kualsiker koza ke los umanos pueden azer. I lo ke los umanos puedemos azer mijor ke kualsiker makina es ke puedemos jeneralizar muestras eksperiensas. Puedemos rezolver un problema kompletamente muevo i diferente. Los robotos, por otra parte, solo pueden realizar echos muy repetitivos.

Las komputadoras oy en dia solo pueden utilizarsen para echos muy espesifikos. Por egzamplo, las komputadoras pueden azer akordo al formato de kestion i respuesta, i memorizar los datos neseserios. De manera similar, las komputadoras son ekselantes para djugar djugos estrukturados. Ma las komputadoras no son buenas para adaptarse rapidamente kuando las reglas del djugo trokan. Para entender la kestion  si los robotos vana pueder azer mi lavoro, tenemos de mirar un lugar ande las personas estan muy adelantre de las makinas. Una de las prensipales kozas ke diferensia las persınas de las mainas es muestra kapasidad de innovar. Puedemos rekopiar diferentes datos en forma de eksperiensas i utilizarlos para deskuvrir una solusion mueva a un problema ke nunka antes aviamos visto. Las komputadoras no pueden azer esto. Nunka vaja ver una komputadora gritando "Eureka" despues de konektar los puntos para topar la solusion a un problema ke dingunos saven la ropuesta. 

Kale demandarse a si; "Komo puedo ser mas innovador?" Es una kestion muncho mijor ke "Los robotos vana tomar mi lavoro". Ademas, las komputadoras en realidad no pueden entender lo ke estan aziendo, solo lo estan aziendo. Por egzamplo, Google Translate puede konvertir un mesaje del franses al ingles ma no puede meldar el mesaje i no puede entender si este mesaje tiene una sinyifikasion. Las komputadoras son kompletamente inkapables de determinar kualo es "bueno" i kualo es ‘’negro’’. Las makinas son bazadas en kriterios programados por personas.

Otro aspekto en el kual las personas tienen avantaj sovre las makinas es  las emosiones i la empatia. Muestros neurones espejo mos permeten de sintir lo ke otra persona esta sintiendo i responden en konsekuensia. Si muestro echo emplika avlar kon otras personas sovre temas delikadas, dar notisias de manera delikada o responder a personas inyervozas o emosionadas, la respuesta a la kestion " eske los robotes vana tomar mi echo?" es definitivamente "No" en el futuro previzivle.

Los robotes pueden azer los echos ande las reglas nunka trokan. Por egzamlo echos monotonos de montaj en una fabrika ande el mizmo echo se repeta kontinualmente. Tambien los echos de limpieza ande los tipos de suziedad ke se alimpian son siempre similares. En lugar de luchar kontra las makinas para estos echos, devemos enkorajar las makinas a enkargarsen este tipo de echos ke son de basha katekoria en la ekonomia dijital.

En lugar de demandarsen "Eske los robotes vana tomar mi echo?", la djente kale ke se demanden: “Kualo va ser mi echo muevo kuando los robotes vana azer mi echo?”. Si, los robotes vana enkargarsen algunos echos. Esto es lo mizmo ke kuando la makina de vapor i el telar tekstil otomatiko tomo el echo de munchas personas durante la revolusion endustrial. Ma esto no signifika ke los lavorantes vana estar dezempleados porke los robotes saven azer estos echos mijor de las personas. Estos empleados vana topar una mueva manera de kontribuar prodaktivamente a la ekonomia. El gato entero se va ekspandir para todos mozotros. Para entender egzaktamente komo va fonksionar esto en la ekonomia dijital, devemos de azer una chika vijita al ekonomisto ke demostro matematikamente en 1891 ke la kantidad de lavoro ke kale ke ser realizada en una ekonomia en kualsiker momento no es fiksada. Esta es la  respuesta a la kestion: ‘’Eske los robotos vana tomar mi lavoro?’’

Apretar al boton para ver todos los eskritos