top of page

ENTRIGAS SOVRE YERUSHALAYIM









Achakes de la gerra ke kontinua en Gazza, en el norte del payis kon el Libano i la kestyon de los arevatados ke no se solusyona, los dirijentes israelianos ansi ke la mayoriya de los sivdadinos djudyos de Yerushalayim no se preokupan i miran seryozamente de arestar las entrigas malas ke los Kataris i los Turkos krean en la povlasyon araba de la sivdad. Les inkulkan la inimista de Israel, koza ke se save dezde muncho tiempo ma ke por las oras ni el governo, ni el shin bet embabukados en los konfliktos kon el Hamas i el Hezbollah dan importansa.  Yerushalayim kapitala de Israel devra ser un lugar de pas para los djudyos, los muzulmanos i los kristryanos, los kualos biveran eternalamente enjuntos.

El JCAP (el sentro yerushalmit politiko) okupandose de lo ke se pasa en la sivdad esta en estos diyas investigando las aktividades de los Kataris i de los Turkos en Yerushalayim i en otros lugares del payis. La ajensiya TIKA (el sentro de kooperasyon i de kordinasyon turko) empeso de muevo sus aktividades sekretas al seno de Yerushalayim Oveste malgrado ke anyos antes el governo Israeliano lo avia defendido de ovrar. Dependyendo de la direksyon del Prezidente Tayyip Erdogan la Tika lavora debasho la kacha del sentro kultural Yunus Emre de Yerushalayim. Su ajenda es de delegalizar Israel, de asistir a la ‘rezistensya’ kontra el i de azer aktividades i evenementos anti Israelianos. Eya además da ayudo a la Asosiasyon de Kultura turka i a la asosiasyon enkavesada por un dirijente del Hamas, Djihaad Yaamur ke es nomada ‘Miratana’. Estas dos organizasyones representan la vitrina del Hamas en Yerushalayim.

En el anyo 2021 el Katar anonsyo ke empeso por de muevo a finansar las aktividades de los Arabos de Yerushalayim a traverso su ‘Komite permanente Katari’ establisido en la sivda. En este komite se topan ofisiales de la Otoridad Palestiniana i del Fatah. Una otra organizasyon del Katar en Yerushalayim es la ‘Jerusalem Support Foundation’, fundasyon ke fue kreada por el emir del Katar en el anyo 2013 para salir kontra i azer propaganda mala sovre el Ayifto i la Arabia Seudita en apuyando los Ermanos Muzulmanos i además dar apoyo al Iran i la Turkiya ke estavan en pleto kon estos 2 payizes. Su buto siendo de enkorajar la rezistensya kontra Israel entre los arabos otoktones de la sivdad, los dirijentes de esta fundasyon miraron de krear un negasyonizmo sovre la Arabia Seudita i el Ayifto. Eya resivyo para su establisimiento un miliarda de dólares del Katar.

Se entendye ke los arabos palestinianos kontinuaran a resistir a la prezensya israeliana en Yerushalayim i mizmo a la egzistensya de Israel komo payiz djudyo viendo ke son apuyados materyalamente i diplomatikamente en sus luchas por manaderos etranjeros, razón por la kuala no keren i no kereran azer una pas djusta. No es mas kestyon según eyos de bivir kon los vizinos djudyos en pas, en Yerushalayim. Imposivle de poder mirar de tomarlos de mano i establisir una atmosfera de kolaborasyon kon los ke keren bivir en pas kon los djudyos, los kualos son bastante nombrozos. El Katar i la Turkiya impiden a ke ayga pas entre los djudyos i los arabos de Yerushalayim, además a ke los arabos no se asimilen a la sosiedad israeliana. Las aksyones de estos 2 payizes enkorajan elementos ekstremistos, tal el Hamas, los Ermanos Muzulmanos, la organizasyon Tahrir i los relijiozos fanatikos muzulmanos a establisir grupos de terror en kamuflandolos en asosyasyones de bien fezensya i otras. La situasyon siendo alarmante pensamos ke el governo Israeliano devra tomar mizuras justas para enderechar i enfuerteser las relasyones kon los arabos de Yerushalayim de una parte i malgrado todo de kortar para siempre todo modo de mesklatina inimiga en las relasyones entre los djudyos i los arabos en esta sivdad.

Myentes mos demandamos los israelianos de orijin turka ke mal Israel pudo azer a la Turkiya ke debasho la direksyon diktatoryala del AKP, el partido en poder dezde 20 anyos, deside a deklarar una grande inimista, ke es difisil de entenderla enverso muestro payis dezde el 7 Octobre 2023. Seve una grande influensa de los prensipyos de los Ermanos Muzulmanos ariento de la klik ke dirija el payis i de la prensa turka ke miran de establisir un islamizmo duro i intoleravle, kontraryo a los prensipyos del kemalizmo de Ataturk el kual kijo pas en el payis i en el mundo.  Se ve ke la Turkiya kada diya ke pasa se esta ‘arabizando’ malgrado ke los arabos en la istorya, en regla jeneral, nunka kijyeron bien a los turkos kolonizatores ke les tomaron el kalifat kon fuerza.

El mijor egzemplo de trokar la kamiza i deklararse el grande amigo del mundo arabo, lo vimos en pasadas kuando Tayyip Erdogan debasho del diktad amerikano se fue a bezar la mano del prezidente ejipsyano Sissi por el kual 10 anyos antes no se detuvo de mentarlo i de akuzarlo de ser asasino.

Espero ke los israelianos no vana tener garez enverso la Turkiya, i ke en los anyos vinideros malgrado la mala konjoktura aktual las relasyones kon el payis onde nasi se vana normalizar demuevo.

      










Comentarios


Bizi Takip Edin
  • Facebook Basic Square
  • Twitter Basic Square
  • Google+ Basic Square
bottom of page