top of page

EL STEREOTIPO “LA MADRE DJUDIYA”





No puede aver en el mundo una madre mas jeneroza ke la madre djudiya. La madre djudiya es tanto tanto protektora ke esto esta arivando a un grado eksesivo i konstitue 'un stereotipo' ke podemos topar mezmo en los livros.

Ma, antes de sitar las karakteristikas eksesivas de la madre djudiya, kero sitar los motivos ke krearon este stereotipo. Antes de todo, las kondisyones fizikas i psikolojikas de las komunidades djudiyas eran tan difisil ke las madres djudiyas deviyan okuparsen de sus kreaturas a un grado eksesivo. En una karikatura ke enkontri en un livro, la madre djudiya esta dizyendo a su ijo: “Tu deves lavorar dopyo para ser otrotanto reushido ke los otros". Mezmo en estas kondisyones, los djudyos fueron reushidos i esto es el merito de la madre djudiya.

En munchas anekdotas podemos topar las karakteristikas de la madre djudiya. Un orgolyo eksesivo en la reushita de sus ijos es su mas tipika karakteristika. 'Mi ijo el avokato', 'mi ijo el doktor', 'mi ijo el enjenyor' es un egzemplo umoristiko de sus avlas. El kantador Alian Sherman dyo el nombre 'Mi Ijo El Kantador' a uno de sus albumes para tomar su madre al pelo.

La madre djudiya forsa sus ijos a reushir en la eskola i en la vida i a kazarsen si no son dayinda kazados. Sus ijos para eya son chikos, mezmo si tyenen sinkuenta anyos. Ay una dicha ke dize 'El ombre djudyo ke tyene su madre en vida, es un mansevo de kinze anyos'.

La madre djudiya es en kudyado por sus ijos, se espanta de permeter ke agan syempre lo ke keren, porke eya egzajera los perikolos de la vida afuera de kaza. Esto es la influensya de la kultura djudiya ke se formo en la diaspora. Eya ensiste en la immaturidad de sus ijos. 'Alevantate Moshe, kale ke te vaygas a la eskola' le esta dizyendo su madre. 'No kero' respondyo Moshe. 'No, kale ke te vaygas'. 'Dame una razon' disho Moshe. 'Tyenes sinkuenta i dos anyos i sos el direktor de la eskola'.

Este sendrom de la madre fuerte es el rezultado de la filozofiya djudiya tradisyonal: el ombre dirijendo el mundo eskteryor i la mujer okupandose de su famiya i del echo de kaza.

Ma, oy no es komo antes. Las kondisyones trokaron muncho. La mujer djudiya esta lavorando para ayudar a su marido a mantener la famiya. Eya no tyene mas tyempo para mesklarse a todos los echos de sus ijos, i esto es mijor para la formasyon psikolojika de las kreaturas. Ma, mezmo syendo tan okupada, la madre djudiya no neglija sus ijos, topa tyempo a enteresarse de sus problemas, se okupa de eyos, i forma una relasyon kayente kon eyos.

Kreygo ke estos son los aspektos pozitivos de la kultura djudiya ke da emportansa a la famiya i mas de todo, apresya la kontinuasyon de la famiya.









Bizi Takip Edin
  • Facebook Basic Square
  • Twitter Basic Square
  • Google+ Basic Square
bottom of page