La ayudante del primer ministro espanyol, Yolanda Diaz repeto en una de sus deklarasyones sovre el konflikto israelo-arabo el slogan ’Del rio fin a la mar la Palestina sera liberada’, lo ke kere dizir la destruksyon de Israel. Kuando la komunidad djudia espanyola le demando de eksplikarse a este sujeto, eya kometyo una mas grande torpedad en eskondiendose detrás su inyorensa i dizyendo, ke para eya este slogan reprezenta el símbolo de 2 payis uno al lado de otro, uno djudyo i el otro arabo! Absurdita kategorika. Pekado de ver en ke djenero de personas la politika etranjera española se topa.
Eya no fue solo un kavzo isolado, la ministra de la defensya Margarita Robles akuzo Israel de kometer ‘un verdaredo djenosidyo’ en Gaza. El ministro de los echos sosyales Pablo Bunstiduy miembro del partido de la siedra el Sumar se permetyo de mandar letras a las kompanias ke azen komersyo kon Israel de ser atentivos a ke sus aktividades no ayuden al djenosidyo aktual de los palestinianos de Gaza. Ademas el primer ministro Sanches kuando formo su koalisyon en 2023 kon el partido Sumar el kual se rekonose komo el partizante el mas serka de los palestinianos, de inkluir en el kontrato de koalisyon ke la Espanya devra rekonoser el estado de Palestina koza ke fue echo dalkavomente.
Las relasyones entre la Espanya i Israel siempre tuvieron altos i bachos. Durante el establisemiento de Israel el diktator Francisco Franco refuzo de rekonoser a Israel en dizyendo ke este payis no tenia derecho de egzistir. Ademas el avia siempre deklarado ke el komploto de la ‘Internasyonal Djudia’ era muy danjorozo para la Espanya. Koza ke parese justifikar la razón por la kuala la Espanya se ajunta a la Afrika del Sud serka de la Korte Internasyonal de Djustisya sovre el kavzo del pretendido djenosidyo kometido por Israel en Gaza.
Las relasyones ofisialas entre la Espanya i Israel no fueron establisidas ke en 1986, despues ke la Espanya se izo miembro de la Unyon Evropea, onde la rekonosiensa de Israel era una de las kondisyones del pakto. El rey Felipe vijito Israel en 2011 a la okazyon del 25en aniversario del establisemiento de las relasyones entre los 2 payizes, momentos onde las partidas miravan de tener relasyones bastante amikalas. La Espanya ansi rekonosiendo el yerro grande echo antes 5 siglos por los reyes katolikos, el egzilo de los djudyos de Espanya onde bivieron mas de miles de anyos. Despues de 45 diyas del 7 Octobre 2023 el primer espanyol Pedro Sanchez arrivo en Israel en juntos kon el ministro del eksterior Jose Manuel Albares los kualos kondenaron el masakro barbariko echo por los palestinianos de Gaza, ma no uvo muncha otra kondanasyon a este sujeto en Espanya.
En los dalkavos mezes la situasyon politika i diplomatika kon la Espanya, empeso demuevo a rebasharse en seguida de la rekonosensya del estado Palestiniano, koza ke fue visto en Israel komo una grande injustisya. El Ministro del eksterior de Israel Israel Katz konvoko a la ambasadrisa de Espanya kon sus kolegas norvejianas i irlandezas a ver los filmos echos sovre las abominasyones, las desgrasyas kometidas por la djente de Gaza durante el 7 Ocrobre. Ademas el ministro mando una ’note diplomatique’ defendiendo al konsolato ispaniko de Yerushalayim de dar servisyo a los palestinianos.
Despues de la deklarasyon de rekonoser el estado palestiniano, munchas asosiasyones propalestinianas se aparejan a ayudar a munchos Gazaouis a obtener el statuto de refujiados para ke puedan emigrar en Espanya. El ministaryo del eksteryo espanyol esta al koriente de estas aksyones, i munchos en el ministaryo se demandan kualo azer si una povlasyon de 2 milyones de djente demandan asilum en Espanya. Mizma kestyon es valivle para la Irlanda i la Norvergya. Sovre el jurnal espanyol Okdiario la Korte Suprema de Espanya esta en favor de resivir refujiados palestinianos a kondisyon ke sean aprovados por las otoridades.
En ajuntandosen a la kola de los payizes ke akuzan Israel de djenosidyo, la Espanya se topa en una situasyon de ayudo al Hamas, el inimigo el mas grande de Israel. Hamas ke mato mujeres, ombres, kreaturas enfrente de sus miembros familiares i ke detiene mas de 100 arevatados ke son abuzados mentalmente, siendo una organizasyon terrorista no lo merese, es koza ke no es achetavle. Israel deve de revizar sus relasyones kon la Espanya i darle a entender ke el dikta i las echas de la inkizisyon kedaron en la istoria.
Comments