DISPARISYON DEL SONYO PALESTINIANO

(Teksto-Odio)

(Yazarı sesli dinlemek için tıklayınız)

El prezidente Trump ,komo se save, en los 4 anyos pasados en la Kaza Blanka no manko okazyon de ayudar a Israel i de mirar a trayer paz en el Medyo Oriente. El fue el prezidente el ke ayudo lo mas a Israel a ke pueda alkansar a una paz justa kon los palestinianos i ke seya rekonosido por los 22 payizes miembros de la Liga Araba. En poko el dechara su posto al muevo prezidente Biden el kual no se pensa ke kontinuara a suportar Israel kon la mezma kadensya en la shena internasyonal i en partikular en el konflikto teritoryal kon los palestinianos. Trump fue el uniko prezidente amerikano ke izo despareser el sonyo palestiniano en aplikando su diplomasia ke dereglo el sistema de asperar i ver del mundo arabo el kual pensava ke kon el tiempo eyos venseran i destruiyeran la prezensiya djudia en el Medyo Oriente grasias a sus politikas de propaganda antisemita a traverso todos los payizes del mundo. Por esto las Nasyones Unidas servyo i servira de instrumento onde 54 payizes muzulmanos son reprezentados. Eyos votaran siempre en favor de los palestinianos en nosyones kondanando Israel de todos los males del mundo. Ansi arebashandolo a un nivel de parya.

Altiempo los palestinianos i la Liga Araba eran konvensidos ke el tiempo sera en sus favores, los anyos pasando, la viktorya sera suyas. La demografía araba pujara tanto ke los djudios en Palestina seran minoritarios a un nivel de despareser. Ademas estuvieron por yerro konvensidos ke las guerras se ganan en meza de negosyasyones i no en los terrenos de batalya. Entremientes Los Estados Unidos miraron multiple vezes de ajuntar las dos partidas en negosiasyones de paz i al final no tuvieron resultado favoravle porke los palestinianos suportado por sus ermanos arabos siempre se fuyeron de achetar Israel komo estado djudyo. Oy las kondisyones i la vizion de los dirijentes arabos trokan i es ansi ke Israel establise relasyones diplomatikas i ekonomikas kon siertos payizes arabos los kualo rekonosen a Israel komo antidad djudia i responden al boykot palestiniano kon medya boka .

Trump i su administrasyon fueron los primeros a rendersen kuento despues de anyos de diplomasiya en partida pro araba del sekretaryado del estado amerikano, ke las esperansas de los palestinianos eran demazyadas i ke la infleksividad de las kondisyones sovre Yerushalayim, los territoryos de Yehuda i Shomron, del retorno de los refujiados i mas no pueden kontinuar eternelmente a ser diktadas si una pas es kerida. La administrasyon amerikana viendo esta situasyon, desidyo i aperejo el famoso plan el kual amenguo las pretansyones palestinianas a un nivel akseptable onde las formulas de las egzijensias maksimalas fueron en partida refuzadas, ma por kontra las demandas israelianas de seguridad i de derecho nasyonal bazado sovre la istoria djudia achetadas. Ansina Yerushalayim fue proklamada por los amerikanos la kapitala del estado djudyo, parte de Yehuda i Shomron puede pasar sovre la juridiksyon de Israel i la frontiera kon la Jordania será kontrolada por el. Enfin el Golan aze enteramente partida de Israel.

El golpe el mas dechizivo de Trump en este konflikto fue su kapachidad de konvenser los payizes arabos a rekonoser Israel de yure. El parvino komo se save a konvenser a 2 payizes del golfo el Bahrain i los Emirates Arabos a tener relasyones amikavles kon Israel. Sovre esto tomando koraje del atmosfera positivo kreyado al seno del mundo arabo el Sudan i en los dalkavos dias el Maroko rekonosyeron a Israel. En los días vinideros de aspera muevas reaksyones semejantes de mas payizes arabos komo el Oman i la Arabia Seudita. Ay rumores ke la Endonezia, el Pakistan, el Djibuti establiseran misyones en Tel Aviv. Esperamos ke Biden i su sekretaryo de estado kontinuaran a enkorajar mas payizes muzulmanos en Afrika a tener relasyones kon Israel. Todo esto ayudara la paz tanto ke los palestinianos en estado de chok se desperten de sus eshuenyos i se renden kuento ke la kaye araba de ayer no es la mizma de oy.

En los payizes arabos muevas jenerasyones se están formando kon ideas diferentes de sus antepasados, por ke esta klaro ke los días vinideros no serán los mezmos, repetitivos komo los del pasado. Israel ke lo keran o no oy es una potensya en la jeografia del Medyo Oriente ke se aze respektar por sus aspektos sosyales i ekonomikos. Es la sola demokrasia potente de ser kapache de defenderse sola, rika en teknolojia i endustria al nivel de los grandes payizes del oksidente. No frekuentarlo i no kontarlo en no dándole importansa es una peryita para el arabo ke nesesita apoyo para sovrebivir en el mundo difisil en el kualo se topa. El dia ke la mueva jenerasyon palestiniana se rendera kuente de los progresos echos por sus ermanos los arabaos israelianos o akeyos del golfo, de mi perspektiva personal digo, eyos keraran adjuntarsen sin egzijensias demazyadas a azer la paz kon Israel.

Trump merese un grande aplozo i imensos regrasyamentos por su amistad i apoyo a Israel, porke sin el, nada de lo ke estamos biviendo aktualmente seria realidad.