AL KAIDA & ISIS NO DESPARESYERON

Anyos pasaron ma estas dos maldichas organizasyones del muvemento islam politiko no desparesyeron malgrado ke los payizes evropeos i los Estados Unidos miraron de arankar sus rayises en atakandolos en Afganistan, en el Irak en la Suriya i mas. Se konta ke en la dalkavo batalya kontra el Isis en Musul los amerikanos, los franseses i los inglezes mataron miles de djente sin tener piadad de los siviles de la sivda. Sovre lo ke deklararon los investigatores de la lucha kontra los terroristas muzulmanos sunnitos, en Musul, mas de 50mil siviles fueron matados sin distinsyon de sus apartenensyas. Los aliados oksidentales no se preokuparon del todo si los sivdadinos eran partrizantes o no del Isis. Uvo un masakro jeneral onde ayedados, mujeres i kreaturas fueron matados. Ansi se miro de alimpyar la gangrena islamista. El mundo demokratiko aplodisyo la desparasyon del estado Islamiko sin rendyendose kuento del jenosito kometido a su nombre.

Ma la realita aktuala mos indika el kontraryo, estas dos organizasyones kontinuan a egzistir. Eyas miran de organizar en el oksidente, espesialmente en Los Estados Unidos, en la Ingleterya, en la Fransa i además en los payizes muzulmanos del Medyo Oriente tal la Turkia i mas, a traverso los medyos sosyales, de topar individuales muzulmanos para indoktrinarlos a azer atakos terroristas. Las organizasyones kontra- terroristas a traverso el mundo miran de stopar este fenómeno, ma difisil de poder impedir todas las menasas ke vemos oy en diya. El Isis opera por lo mas a traverso los medyos sosyales i es difisil de solvelyarlos. Por dos razones es difisil de meterse en kontakto kon eyos, la primera es ke miran de eskojer el kandidado, de informarse sovre el si puede ser un espion i de refuzar un ‘chat’ kon personas ke les parese ser sin enteresso a sus kavzas, la segunda kontrolar si el kandidado no apartiene a grupos inimigos del Isis.

Michael Barak investigador en la Universidad Reichman de Hertzelia, Israel mos ambeza ke el famozo ‘RocketChat’ es un instrumento uzado por estas dos organizasyones. El sistema tiene kamaretas internas de chat onde topan muevos kandidados. En despartes ay ‘Discord’ otro instrumento ke les serve a muevos partizanos a ambezarsen komo partisipar a los rangos del Isis. Sovre Al Kaida Michael Barak dize ke kale ver el egzemplo del ‘Inspire’ magazin eskrito en 13 linguas diferentes el kual fasilita para los ke no konosen el arabo de entender komo planifyar atakos terroristos a traverso el mundo, a fabrikar eksplozivos i komo eskojer la djente ke se deve suprimar.  Barak eskplika ke el magazín Inspire sierve a topar lodos asolados ke se interesan a la kavza de Al Kaida, i ke biven en payizes oksidentales kon pasaportos de estos payizes. Seve situasyon semejante entre los lodos asolados ke biven en la zona MENA (Medyo Oriente, Afrika del norte) i ke se interesan al terrorizmo.

En despartes de esto, las dos organizasyones topan muevos kandidados en usando varyas metodas diferentes, komo los diskorsos radikalistos echos en las mishkitas i en las priziones onde la povlasyon salafista es importante. De demandar a miembros de la organizasyon de azer presyon sovre amigos i parientes mansevos para ke se angajen en el radikalizmo kontra la sosiedad evropea en la kuala biven i ke se les asemeja difererentes de las suyas. Isis i Al Kaida miran de embabukar la diaspora araba biviendo en Evropa a konverserla ke el djihadizmo es el solo remedyo para las inegualidades rasialas i sosyalas egzistentes enverso los muzulmanos. Mizma reaksyon se ve en Los Estados Unidos onde Isis mira de engager imigrantes Somalianos biviendo en Minnesota.

Isis i Al Kaida despues del atako del Hamas del 7 Octobre ampesaron a pujar sinyifikamente sus informasyones en las platformas sosyalas yamando a destruyir Israel. La gazeta ‘Voice of Khurasan’ en repuesta a la gerra de Gazza publiko un manual operativo komo ovrar para kometer un djenosito djudyo i ke los muzulmanos biviendo en el oksidente ataken las sinagogas i los sentros kulturales djudyos. Al Kaida demanda a los palestinianos de soslevantarsen kontra el rey de Jordaniya i ansi mirar a atakar Israel a traverso el Jordano. Al Kaida se deklara inimigo del prezidente Fattah el Sisi de Ayifto i de la Arabiya Seudita ke pretenden ser aliados de Israel.

Isis en Turkiya grupo ke organizo el atako de Moskova, ke en pasadas desho sienes de muertos, se enfuertesyo en la Anatolya, onde organiza las finansyas para ayudar a los refujiados Afganos vinyendo del Iran. Dezde 2014 la Turkiya permetyo a munchos djihadistos viniendo de diferentes lugares, de entrar en el payis sin ke se preokupen de ser arestados, los kualos pasaron i pasan a la Siriya para ajuntarsen a los miembros del Isis.

Malorozamente el mundo no se rende kuento de la gravita de los sabotajes i de los atakos mortales ke estas dos organizasyones inimigas de la demokrasiya están aparejando en los tiempos vinideros kon el ayudo finansyal de los fondamantalistos arabos, rikos grasyas al petrol, tal el Katar i el Kuveyt. Dezde poko tiempo los seudianos desharon de ayudarlos ma el Iran malgrado su difikultad politika interna kontinua a tener relasyones kon sus inimigos sunnitos. 

101 Kuentos Modernos de Djoha-Dr. SELİM YEHOSHUA SALTİ

Satın Al

Apretar al boton para ver todos los eskritos