ROSHASHANA EN LOS DİYAS DEL OLOKOSTO

Naftali Stern, un sovrebiviente del Olokosto,tres mezes antes de su muerte, vijito Yad Vashem kon uno sako yeno de ojas arazgadas. En estas ojas, estavan eskritas las orasyones de Roshashana.

Naftali Stern biviya en Romania antes del Olokosto. En el anyo 1944, Naftali, su mujer i sus kuatro ijos, fueron deportados a Auschwitz. Su mujer i sus ijos fueron asasinados en las kamaretas de gaz. Naftali, komo akeyos diyas era un mansevo forsudo de 34 anyos, fue deportado a Wolfsberg, un kampo de lavoros forsados en Alemania.

El diya de Roshashana se estava aserkando. Naftali empeso a pensar komo ivan a poder azer los servisyos de Roshashana. A la fin, topo una solusion. İva vender su rasyon de pan para pueder obtener un kalem i unos kuantos sakos de papel. İ ansina fue. Naftali aranko los sakos de papel, los izo ojas uno a uno, i empeso a eskrivir las orasyones de Roshashana enriva de los papeles.

Noche de Roshashana, el enkargado Nazi, los permetyo de reunirsen, i de komer endjuntos sus rasyones de pan. Naftali ke era un kantor antes de la gerra, distribuyo las ojas, una a una, a sus amigos, i ansi, todos endjuntos meldando a boz alta, i kon grande antuziazmo, akeya noche podieron azer las orasyones del anyo muevo.

Los sovreviventes daynda se akodran de este evenemyento komo un momento espesyal en la vida del kampo.

Naftali guadro estos papeles en su puerpo, asta su liberasion. Asta el anyo 1978, kada Roshashana, en las orasyones de la fyesta, Naftali estuvo detenyendo estos papeles en la mano derecha, komo un artikolo muy valorozo.

En el anyo 1978, en prezentando estos papeles a Yad Vashem, Naftali Stern disho ke estos dokumentos son muy emportantes para las jenerasyones futuras, para ke veygan komo los djudios, mezmo en los diyas terivles del Olokosto, mentenyeron la identidad djudia, i nunka peryeron la esperansa.

Kada anyo, para tomar parte en la edukasyon del Olokosto, el diya del Olokosto, mas de un milion de sovrebivientes en el mundo entero, vijitan el Yad Vashem.

En azyendo el turno del Muzeo del Olokosto, todos los ven los papeles de Naftali Stern, tambyen miles de otros dokumentos, kada uno de estos dokumentos, kontando la proprya estorya de la viktima, kon su proprya sinyifikasyon espesyal.

Akel diya, kada djudyo sale de Yad Vashem, espiritualmente riko, i prometyendose de fortaleser la komunidad djudiya, gerreyar kon el antisemitizmo, i la entolerensya.

Kada diya, Yad Vashem reafirma su prometa a Naftali Stern, i a todos los otros sovrebivientes, de kompartir sus istoryas kon el mundo entero.