(Yazarın yazısını sesli dinlemek için tıklayınız)
Vino el tiempo ke Mahmud Abbas , presidente de la Otoridad Palestiniana i sus kompanyeros politikos finalmente se esperten i ke entiendan la realita del diya ke no pueden mas inyorar. Vino el tiempo final sovre las sirkonstansyas aktualas a no refuzar de asentarsen a la meza de negosiasiones kon Israel. Bien entendido si les gustara a tener un payis palestiniano independiente sovre la formula del plano Trump, el solo ke podra konvenir a Israel. Ansi eyos azeran partida de la istorya del Medyo Oriente ke finalmente metieron fin a 70 anyos de konflikto entre djudios i arabos.
La kaye araba en los payizes sunnitos arabos ampeso a renderse kuento ke vino el tiempo de no mas dar apoyo sin kondisyon a la Otoridada Palestiniana i a los de Gazza si no miran a akumplir una paz negosiada mizma yelada kon el inimigo israeliano. La kaye ademas esta entendiendo ke mas el tiempo pasa mas sera la peryita grande para la parte araba. Munchas bozes ofisyalas se sienten en el Golfo i en la Arabia Seudita kritikando en sus deklarasyones Mahmud Abbas ke peryo okaziones 3 vezes antes 10, 15 i 20 anyos de no establisir un estado palestiniano independiente, kon mijor kondisyones del dia de oy. Eyos dizen ke es pekado de dechar mas sufrir i enganyar a los arabos palestinianos. Ademas los payizes del Golfo i la Arabia Seudita miran de estar en buenos termos kon Israel achakes del inimigo komun, el Iran. No ven mas Israel komo inimigo ma komo un sosyo stratejiko ke los ayudara a sostener sus sekuridad i sus resfolgo. A la ora aktual las preokupasyones internas de estos payizes son grandes i la kestyon palestiniana peryo de ser de aktualidad i empeso a enfasyar a los puevlos sunitos.
Sinyor Abbas ke inyego la Shoa, deve realizar ke el mundo esta indose adelantre i ke el nesesita eskabuyirse de su enganyo de meoyo de destruyir Israel, porke los ermanos(¡) arabos no ven mas Israel komo inimigo. Para eyos Israel es una realita i un kavdal de defensya. No solo el deve entender estas realidades, ma todo su doredor i los pokos intelektuales palestinianos ultra nasyonalistos ke djuraron de destruyir Israel i sus valores spiritualas i istorikas i ke no deven de enganyarsen a las palavras dichas kon medya boka por los dirijentes arabos, ke no reprezentan mas grande koza.
El ‘akordo del sieglo’ komo lo yaman los dirijentes amerikanos fue dezvelopado en konsultasyon kon Netanyahu, las partidas se metieron de akordo sovre su contenido i para Abbas de refuzar de vista de negosyar kon Los Estados Unidos agravara mas en Washington la situasyon diplomatika enverso los palestinianos los kualos seran kondanados a no resivir del todo asistensya finansial del trezoro amerikano. Ademas Los Estados Unidos, potensya mondiala es el solo payiz ke pode azer presyon sovre Israel para ke aga konsesyones mizmo dolorozas para parvenir a un akordo. Si maniana Netanyahu dechisa de meter sovre la jurisdiksyon una partida de Yehuda i Shomron , mizmo si Joe Biden gana las eleksyones de Novembre 2020 nada no trokara en el terreno visto ke sera imposivle i muy tadre de trokar la aplikasyon de la ley israeliana en estos territoryos. No olvidar ke al muevo presidente, el puevlo amerikano amigo sensero de los israelianos no le permete de dinguna manera de forsarlo a retrogradar.
De otra parte si los dirijentes palestinianos pensan ke la Unyon Evropeya va vinir a apiyadarlos en las sirkonstensyas aktualas de la aneksyon de los teritoryos disputados eyos se yerraran una vez mas. Israel es el mas grande sosyo de negosyo de EU en esta partida del Medyo Oriente, difisil de kastigarlo sin malas konsikuensas para las dos partidas. Si mizmo se atriveran pokas seran las reaksyones en las dinamikas ekonomikas al seno del estado djudyo. Si estos mizmos dirijentes palestinianos asperan piadad de las Nasyones Unidas para impedir Israel de komportarse komo le konviene en los territoryos disputados, no tendran grande esperensa de akuistar una dechizyon en sus favores, por ke los Estados unidos dara su ‘veto’ supito.
Abbas en frente de estas dilemas save muy bien ke el buto de Netanyahu es kon el apuyo de Trump de aneksar una partida de Yehuda i Shomron tyerras biblikas ke apartenyeron al puevlo ebraiko, pormo de esto no negosyar oy kere dizir olvidar la kreasyon del estado independiente palestiniano. Es ke Abbas kere dechar detras de el, un buen o un mal rekordo istoriko? Por las oras no se save, ma pekado si piedre la okazyon unika ke se le prezenta para ser akodrado komo un ero de la pas.