ULVIDO REYAL

Rekonoser el pasado i demandar pardon no es una formalita fasil para un puevlo ma es el fondamyento de una rekonsiliasyon profonda por el akto indjustamente echo i es un mesaje edukativo ke empide persekusyones futuras.

Durante la komemorasyon del 75en aniversaryo de la Shoa en el sinken forum internasyonal ke tuvo lugar en el mes pasado en Yerushalayim, el rey de Espanya Felipe VI fue enkargado de avlar,- sovre el protokol israeliano- ,siendo el sinyor invitado de muestro estado-, onde partisiparon mas de kuarenta kapos de estados, a dar el punto de vista de su payis en lo ke se trata de la liberasyon del kampo de eksterminasyon de Auschwitz.

Remarki kon tristesa en analizando el diskorso del rey aktual, ke el komo 28 anyos antes en el 31 de Marso 1992 su padre el rey Juan Karlos en la sinagoga de Madrid no demandaron eskuzas al nombre de la korona espanyola, pardon del puevlo djudio por el akto kruel de Ferdinand i Isabella ke aronjaron a miles de djudios de Espanya en 1492. Ansi mil anyos de vida en tyerra iberika tomo fin kon esta desgrasya ke mozotros sefaradis guadrimos en muestras memorias durante mas de 500 anyos. Juan Karlos en su deskorso no avia aprovado este egzilo forsado ma no avia kon esto demandado eskuzas del puevlo sefaradi komo el estado Portuges lo izo en 1988. El pretendyo ke este egzilio fue la konsekuensia de una razon de estado de akel tiempo porke la relijyon impedia la uniformita de la nasyon.

El rey Felipe ademas mensyono en su deskorso ke la Espanya tiene un pasado djudio riko, ma no disho nada sovre la menospresiasyon, la ekspropiasyon de los byenes, el tormento inflikto de la ekspulsyon de sus proprias tyerras por la sola razon ke eyos eran djudios. Ironikamente el famozo dekreto del Alhambra de la ekspulsyon no fue anulado ke 476 anyos mas tadre en 1968 por el diktator Franko.

Rekonoser el pasado i demandar pardon no es una formalita fasil para un puevlo ma es el fondamyento de una rekonsiliasyon profonda por el akto indjustamente echo i es un mesaje edukativo ke empide persekusyones futuras.

Me permeto de trasmeter aki unos kuantos paragrafos de mi deskorso ke ize en Desembre 2016 a la okazyon del enkontro en el Instituto Salti en la universitad Bar Ilan entre las otoritades espanyolas en Israel i los miembros del Instituto sovre el rekonosimiento de yure entre los dos estados Espanya i Israel.

“La Espanya otorga a los sefaradis el derecho de tener dos suditansas i de retornar a Espanya si lo dezean. Los djudios sefaradis, espanyoles sin patria, durante mas de 500 anyos despues del egzilo forsado, bivieron sea en Evropa sea en el Medio Oriente i finalmente retornaron en mayoriya a Israel a sus tyerra istorika. No les emporta mas de retornar a bivir en Espanya, bien entendido kon una chika eksepsyon ke tomaron la nasyonalidad espanyola en estos ultimos anyos.”

“Porke la Espanya metyo tantos sieklos a rekonoser su kulpa? La repuesta esta en el antisemitizmo rasyal i relijiozo ke se dezvelopo antes i durante la perioda de la konkista i en los anyos ke sigieron la deportasyon de los djudyos. Mas despues los konversos ke kedaron a bivir en Espanya grasias a sus saverisyos i kreativitades se adelantaron tanto en la vida del payis, ke esto puso a krear el ‘statuto de limpieza de la sangre’. La inkizisyon se dezvelopo ansi a traverso la eglisya katolika. Las konsekuensas istorikas mos akodran la kruelda de los espanyoles ke duro sieklos.”

“ Henry Meshoulam, investigador fransez afirma ke la teoriya de la pureza de la rasa de los nazistos tiene la mizma obsesyon de la limpieza de la sangre espanyola . La Espanya moderna demokratika i djusta deve de mirar a enfasar este punto de vista en demandando pardon de la nasyon djudia, en eskabuyendose definitivamente del antisemitizmo i del anti israelizmo komo lo izo la Alemanya moderna. No ay diferensia entre el Olokosto i el egzilio forsado de los sefaradis, los kualos a sus tornos fueron matados i por los nazistos. Trenta anyos de rekonosimiento del estado de Israel por la Espanya es kurto para pardonar las viejas inimistades ma bastante largo para aboltar la pajina i krear una verdareda amistad emosyonala entre los espanyoles i los sefaradis israelianos. Sin duvda la kultura komuna mos ayudara en esto largo kamino.”

De mi perspektiva personal rekomendo a las otoridades espanyolas de organizar manifestasyones kulturalas anchas entre los espanyoles i los israelianos sea en Espanya komo en Israel sovre el pasado de los djudios en tyerra iberika. Es ansi ke la Espanya aktuala meresera un pardon del puevlo djudio . ‘Al ke kera entender un saludo’ se dize en fransez.