KEN ES EL VERDADERO AUTOR DEL ZO’HAR?

El Zohar, el livro de baza de la Kabala (mistisizmo djudio). es tambien konsiderado komo una de las tres ovras mas importantes del djudaizmo, al lado de la Biblia i del Talmud.

Sigun la tradision, su autor es Rabi Shimon Bar Yohay ke bivio en la Tierra Santa en el siglo II. Se konta ke despues de su muerte el livro desparesio i fue deskuvierto de muevo, mas de mil anyos despues, por el famozo rabino i kabalista espanyol ‘Ha-Ramban (Nahmanides) ke bivio en Gerona, salio de Espanya en 1263 (en segito a la polemika de Barcelona) i se establesio en la Tierra Santa. Ayi, segun la lejenda, topo el Zohar i lo embio a su ijo ,en Gerona, de onde este livro santo fue yevado milagrozamente por el viento a Zaragoza i es ayi ke lo topo R. Moshe de Leon.

Ma sigun la opinion de investigadores ke estudiaron esta kestion, entre eyos el Profesor Gershom Sholem i el Prof. Yeshaya Tishbi, de la Univrsidad Ebrea de Yerushalayim, el verdadero autor de esta ovra no es R. Shimon Bar Yohay simo ke R. Moshe de Leon, ke nasio en 1240 en la sivdad de Leon, en el Norte de Castilla, i murio en 1305 en Avila, onde paso la mas grande parte de su vida.

Aun ke, sigun lo dishimos, la tradision atribuye la redaksion del Zohar a R. Shimon Bar Yohay, uvo munchos ke tuvieron dudas a este sujeto, ainda antes de los profesores Sholem i Tishbi. Uno de eyos fue el kabalista Yitshak de Ako ke en el anyo 1305 yego de Erets Israel a Espanya, djustamente kon la intension de investigar las raizes del Zohar i la identidad de su autor.

El reusho a enkontrarse en Valladolid kon R. Moshe de Leon, ke lo invito a su kaza en Avila para amostrarle el manuskrito orijinal del Zohar ke tenia en su poder. Moshe de Leon murio antes ke tuviera lugar el enkontro, ma Yitshak de Ako kontinuo en su investigasion, yegando a la konkluzion ke el autor del Zohar no era otro ke el rabino Moshe de Leon.

Parese ke su opinion no fue akseptada por todos, a lo menos asta ke fueran publikados los rezultados de las investigasiones de los profesores Gershom i Tishbi, i uvo munchas teorias i eksplikasiones sovre la manera de la kuala nasio este livro.

Sigun una de eyas, Yitshak de Ako avria demandado a la bivda de Moshe de Leon, despues de su muerte, kuala es la razon ke el no izo nada para ke se sepa ke fue el mizmo ke eskrivio esta tan importante ovra de la literatura relijioza djudia. A esto eya avria respondido ke para su marido, lo mas importante era ke su ovra sea bien resivida por los djudios i sovre todo, por los rabinos ke eran sus lideres espirituales. Ke eran las shanses ke este livro sea akseptado sin kritikas i opozisiones, si se pensava ke su autor no era el famozo rabino Shimon Bar Yohay, sino ke un rabino apenas konosido afuera de su komunidad?

Si esta anekdota es verdadera se puede dizir ke la modestia de R. Moshe de Leon ayudo muncho a ke el Zohar sea akseptado komo la ovra fondamentala de la Kabala, malgrado ke este es un livro muy difisil a entender, a tal punto ke los rabinos rekomendavan de no empesar a estudiarlo antes de de aver yegado a la edad de 40 anyos i de tener una buena konosensia de la Biblia i del Talmud.